ຕະຫຼອດໄລຍະຂອງການເຄື່ອນໄຫວຢ້ຽມຢາມ ແລະ ເຮັດວຽກຢູ່ ສະຫະພັນຣັດເຊຍຄັ້ງນີ້. ສະຫາຍ ພົນເອກ ຈັນສະໝອນ ຈັນຍາລາດ ພ້ອມດ້ວຍຄະນະ ໄດ້ເຂົ້າຮ່ວມພິທີເປີດງານວາງສະແດງອຸປະກອນເຕັກນິກການທະຫານສາກົນ 2024 ທີ່ສູນປະຊຸມ ແລະ ວາງສະແດງສາກົນ, ປາຕຣີອົດ, ກູບີນກາ, ມົດສະກູ. ຈັດຂຶ້ນໃນລະຫວ່າງວັນທີ 12-14 ສິງຫາ, ພາຍໃນງານໄດ້ວາງສະແດງບັນດາເຕັກໂນໂລຊີຕ່າງໆຫຼາກຫຼາຍຮູບ ແບບ, ມີທັງອາວຸດຍຸດໂທປະກອນເຕັກນິກການທະຫານທີ່ມີຄວາມທັນສະໄໝທີ່ສຸດ, ມີເອກະລັກສະເພາະຕົວຈາກປະເທດຣັດເຊຍ ຊຶ່ງມີບໍລິສັດຊັ້ນນຳທີ່ໄດ້ຮັບການຍ້ອງຍໍໃນລະດັບສາກົນ. ນອກນັ້ນຍັງມີ 4 ປະເທດເຂົ້າຮ່ວມຄື: ສປ ຈີນ, ເບຣາລຸດ, ອີຣານ, ອິນເດຍ ແລະ ຕົວແທນບໍລິສັດຈາກຕ່າງປະເທດທີ່ລົງທະບຽນເຂົ້າຮ່ວມຫຼາຍກວ່າ 120 ແຫ່ງ. ໃນປີນີ້ໄດ້ຈັດຂຶ້ນເປັນຄັ້ງທີ 10 ມີຜະລິດຕະພັນປະມານ 1.500 ລາຍ ການ ແລະ ໄດ້ຮັບຄວາມສົນໃຈຈາກຕົວແທນຜູ້ຊ່ຽວຊານ ແລະ ສື່ຈາກຕ່າງປະເທດຢ່າງສະໝໍ່າສະເໝີ. ທັງນີ້ ກໍຍັງເປັນບ່ອນພົບປະ, ປຶກສາຫາລື, ແລກປ່ຽນປະສົບ ການ, ເພີ່ມທະວີການຮ່ວມມືດ້ານການຜະລິດ, ສະໜອງອຸປະກອນເຕັກນິກການທະຫານໃຫ້ບັນດາບໍລິສັດຕ່າງໆຂອງຣັດເຊຍ ແລະ ບໍລິສັດອື່ນໆຈາກຕ່າງປະເທດ ເພື່ອສ້າງຄວາມເຂົ້າອົກເຂົ້າໃຈຊຶ່ງກັນ ແລະ ກັນ, ຊຸກຍູ້ປົກປັກຮັກສາສັນຕິພາບ ແລະ ສະຖຽນລະພາບຢູ່ພາກພື້ນ ແລະ ສາກົນ.
ໃນໂອກາດດັ່ງກ່າວ ສະຫາຍ ພົນເອກ ຈັນສະໝອນ ຈັນຍາລາດ ພ້ອມຄະນະ ຍັງໄດ້ຢ້ຽມຊົມງານວາງສະແດງອຸປະກອນເຕັກນິກການທະຫານ 2024 ຊຶ່ງໃນນີ້ໄດ້ຢ້ຽມຊົມບູດວາງສະແດງບໍລິສັດອາວມາສ-ອັນເຕວ ບໍລິສັດຜະລິດລະບົບປ້ອງກັນອາກາດ ແລະ ເຣດາ, ຢ້ຽມຊົມບູດວາງສະແດງບໍລິສັດຍົນຂຶ້ນຊື່ຂອງ ຣັດເຊຍ, ບໍລິສັດ ໂຣສອາບາໂຣນເອັກສະປອດ ແລະ ພົບປະກັບບໍລິສັດຈຳນວນໜຶ່ງຕື່ມອີກ.
ຈາກນັ້ນ, ສະຫາຍ ພົນເອກ ຈັນສະໝອນ ຈັນຍາລາດ ພ້ອມດ້ວຍຄະນະ ໄດ້ພົບ ປະສອງຝ່າຍ ກັບ ສະຫາຍ ອານເດຣ ແຣມມົບວິດຈ ເບຍລາອູຊົບ ລັດຖະມົນຕີກະຊວງປ້ອງກັນປະເທດ ແຫ່ງ ສ ຣັດເຊຍ, ພ້ອມທັງສະແດງຄວາມຂອບໃຈມາຍັງລັດຖະບານ ກໍຄືກະຊວງປ້ອງກັນປະເທດແຫ່ງ ສ ຣັດເຊຍ ທີ່ໄດ້ໃຫ້ການຊ່ວຍເຫຼືອອັນລ້ຳຄ່າ ແກ່ ສປປ ລາວ ກໍຄືກອງທັບປະຊາຊົນລາວ ໃນຫຼາຍດ້ານ ຕະຫຼອດໄລຍະຜ່ານມາ, ເປັນຕົ້ນແມ່ນການກໍ່ສ້າງພະນັກງານບັນຊາ ແລະ ວິຊາການເຕັກນິການທະ ຫານ, ການພົວພັນຮ່ວມມືດ້ານການເກັບກູ້ລະເບີດບໍ່ທັນແຕກເພື່ອມະນຸດສະທຳ ຢູ່ ສປປ ລາວ ແລະ ວຽກງານດ້ານອື່ນໆ ຊຶ່ງເປັນການປະກອບສ່ວນອັນສໍາຄັນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄື ການສ້າງກອງທັບປະ ຊາຊົນລາວ ໃຫ້ເຕີບໃຫຍ່ເຂັ້ມແຂງ ແລະ ທັນສະໄໝ. ພ້ອມດຽວກັນນັ້ນ, ສອງຝ່າຍກໍໄດ້ຕີລາຄາຜົນສໍາເລັດຂອງການຮ່ວມມືທາງດ້ານການທະຫານໃນໄລຍະຜ່ານມາ ແລະ ແຜນການພົວພັນຮ່ວມມືໃນຕໍ່ໜ້າ.
ໃນໂອກາດດຽວກັນ, ສະຫາຍ ພົນເອກ ຈັນສະໝອນ ຈັນຍາລາດ ແລະ ສະຫາຍ ອານເດຣ ແຣມມົບວິດຈ ເບຍລາອູຊົບ ໄດ້ຕາງໜ້າໃຫ້ລັດຖະບານຂອງທັງສອງປະເທດ ລົງນາມ ກ່ຽວກັບການພົວພັນຮ່ວມມືດ້ານການທະຫານສະບັບໃໝ່ ເພື່ອເປັນບ່ອນອີງໃນການເສີມຂະຫຍາຍມູນເຊື້ອການພົວພັນຮ່ວມມື ລະຫວ່າງສອງປະເທດ ເວົ້າສະເພາະແມ່ນ ກອງທັບປະຊາຊົນລາວ ແລະ ຣັດເຊຍ ໃຫ້ນັບມື້ໄດ້ຮັບການພັດທະນາດີຂຶ້ນ.
ຕໍ່ມາ ສະຫາຍ ພົນເອກ ຈັນສະໝອນ ຈັນຍາລາດ ພ້ອມຄະນະ ກໍ່ໄດ້ສືບຕໍ່ເຄື່ອນ ໄຫວເຂົ້າຢ້ຽມຂ່ຳນັບ ສະຫາຍ ດີມີຕຣີ ເມັດເວເດັບ ຮອງປະທານສະພາຄວາມໝັ້ນຄົງ ແຫ່ງ ສ ຣັດເຊຍ, ພ້ອມທັງກ່າວສະແດງຄວາມຂອບໃຈຕໍ່ ສະຫາຍ ດີມີຕຣີ ເມັດເວເດັບ ພ້ອມຄະນະ ທີ່ໃຫ້ກຽດຕ້ອນຮັບຢ່າງອົບອຸ່ນ, ເຕັມໄປດ້ວຍໄມຕີຈິດມິດຕະ ພາບ ເພື່ອນມິດສະຫາຍ ແລະ ສະແດງຄວາມຮູ້ບຸນຄຸນຢ່າງສູງມາຍັງລັດຖະບານ ກໍຄື ສະພາຄວາມໝັ້ນຄົງ ສ ຣັດເຊຍ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າ ໃຫ້ແກ່ ສປປ ລາວ ໃນດ້ານຕ່າງໆຕະຫຼອດໄລຍະຜ່ານມາ ຊຶ່ງການພົວພັນລາວ-ຣັດເຊຍ ແມ່ນໄດ້ຮັບການຂະຫຍາຍຕົວຢ່າງຕັ້ງໜ້າ ເພື່ອກ້າວໄປສູ່ການເປັນຄູ່ຮ່ວມມືຍຸດທະສາດຮອບດ້ານ ທີ່ມີຄວາມໄວ້ເນື້ອເຊື່ອໃຈຊຶ່ງກັນ ແລະ ຮ່ວມມືຊ່ວຍເຫຼືອຊຶ່ງກັນ ແລະ ກັນຢ່າງຕໍ່ເນື່ອງ, ເປັນການເສີມຂະຫຍາຍມູນເຊື້ອແຫ່ງມິດຕະພາບ, ຄວາມສາມັກຄີ ເພື່ອຜົນປະໂຫຍດຂອງປະເທດຊາດ ກໍຄືປະຊາຊົນສອງຊາດລາວ-ຣັດເຊຍ, ຣັດເຊຍ-ລາວ.
ພ້ອມນີ້, ສະຫາຍ ພົນເອກ ຈັນສະໝອນ ຈັນຍາລາດ ພ້ອມຄະນະ ຍັງໄດ້ຢ້ຽມຊົມສະຖານທີ່ສຳຄັນຕ່າງໆ ຈຳນວນໜຶ່ງຢູ່ນະຄອນຫຼວງມົດສະກູ ສ ຣັດເຊຍ ຕື່ມອີກ.
ຜົນສຳເລັດຂອງການເດີນທາງຢ້ຽມຢາມ ແລະ ເຮັດວຽກ ຢູ່ ສະຫະພັນຣັດເຊຍ ຂອງສະຫາຍ ພົນເອກ ຈັນສະໝອນ ຈັນຍາລາດ ໃນຄັ້ງນີ້ເປັນການປະກອບສ່ວນເຂົ້າໃນການເສີມສ້າງສາຍພົວພັນທີ່ເປັນມູນເຊື້ອລະຫວ່າງສອງປະເທດ, ສອງກອງທັບ ແລະປະຊາຊົນສອງຊາດ ລາວ-ຣັດເຊຍ ທີ່ມີມາແຕ່ດົນນານແລ້ວນັ້ນໃຫ້ໝັ້ນຄົງຂະໜົງແກ່ນແຕກດອກອອກຜົນຈະເລີນງອກງາມຂຶ້ນຢ່າງບໍ່ຢຸດຢັ້ງ.
(ຂ່າວ-ພາບ: ຮ້ອຍເອກ ທອງມາ ໄຊຍະເພັງສາ).
