ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຜົນສຳເລັດຂອງກອງປະຊຸມສາມັນຄົບຄະນະກຳມະການສູນກາງແນວລາວສ້າງຊາດ ຄັ້ງທີ 4 ສະໄໝທີ X

ໃນຕອນບ່າຍວັນທີ 13 ມີນາ 2019, ຢູ່ສູນຝຶກອົບຮົມ ແລະ ການຮ່ວມມືສາກົນ, ນະຄອນ ຫຼວງວຽງຈັນ, ກອງປະຊຸມສາມັນຄົບຄະນະກຳມະການສູນກາງແນວລາວສ້າງຊາດ ຄັ້ງທີ 4 ສະໄໝທີ 10 ໄດ້ປິດລົງດ້ວຍຜົນສຳເລັດອັນຈົບງາມ, ພາຍຫຼັງທີ່ໄດ້ດຳເນີນມາເປັນເວລາ 2 ວັນ, ໂດຍການເປັນປະທານຂອງ ທ່ານ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ໂດຍມີບັນດາພະເຖລະນຸເຖລະ, ຮອງປະທານສູນກາງແນວລາວສ້າງຊາດ, ກຳມະການສູນກາງແນວລາວສ້າງຊາດອ້ອມຂ້າງສູນກາງ, ປະຈຳແຂວງ-ນະຄອນຫຼວງທົ່ວປະເທດ ແລະ ຢູ່ຕ່າງປະເທດ, ລວມທັງບັນດາຜຸ້ຕາງໜ້າກະຊວງ-ອົງການ, ຕາງໜ້າອົງການພາຄີ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ. ກອງປະຊຸມໃນຄັ້ງນີ້ໄດ້ສະຫຼຸບຕີລາຄາການເຄື່ອນໄຫວຂອງຄະນະກຳມະການສູນກາງແນວລາວສ້າງຊາດປະຈຳປີ 2018 ແລະ ຜ່ານທິດທາງແຜນການສຳລັບປີ 2019 ເພື່ອຍົກໃຫ້ເຫັນວຽກງານພົ້ນເດັ່ນຂອງຄະນະກຳມະການສູນກາງແນວລາວສ້າງຊາດ, ເປັນ ຕົ້ນ ແມ່ນວຽກງານສຶກສາອົບຮົມການເມືອງ-ແນວຄິດ, ການເຕົ້າໂຮມ ແລະ ການກໍ່ສ້າງກ້ອນກຳລັງມະຫາສາມັກຄີປອງດອງທົ່ວວົງສາຄະນາຍາດແຫ່ງຊາດ, ວຽກງານສ້າງຄວາມເຂັ້ມແຂງໃຫ້ອົງການແນວລາວສ້າງຊາດແຕ່ລະຂັ້ນ, ວຽກງານເສີມຂະຫຍາຍສະຕິເປັນເຈົ້າຂອງປະຊາຊົນປົກປັກຮັກສາຮີດຄອງປະເພນີອັນດີງາມຂອງຊາດ, ເອກະລັກຂອງແຕ່ລະຊົນເຜົ່າ ແລະ ວຽກງານອື່ນໆ, ລວມເຖິງດ້ານອ່ອນ, ຂໍ້ຄົງຄ້າງ, ເພື່ອສືບຕໍ່ປັບປຸງແກ້ໄຂໃຫ້ດີຂຶ້ນໃນຕໍ່ໜ້າ. ນອກຈາກນີ້, ກອງປະຊຸມຍັງໄດ້ ຮັບຟັງການປະກອບຄຳເຫັນຂອງຜູ້ຕາງຫນ້າຂອງອົງການພາຄີ ຂອງບັນດາກະຊວງ-ອົງການ ແລະ ບັນດາແນວລາວສ້າງຊາດແຂວງ-ເມືອງຈຳນວນໜຶ່ງ, ການປະກອບຄຳເຫັນຕາມການເຈາະຈີ້ມຂອງປະທານກອງປະຊຸມ ແລະ ຮັບຟັງການປະກາດແຕ່ງຕັ້ງກຳມະການສູນກາງແນວລາວສ້າງຊາດສະໄໝທີ 10 ຕື່ມອີກ.

  

ໃນກອງປະຊຸມຄັ້ງນີ້, ທ່ານ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ໄດ້ໂອ້ລົມຫຼາຍບັນຫາຕໍ່ຄະນະກຳມະການສູນກາງແນວລາວສ້າງຊາດ ເພື່ອເປັນບ່ອນອີງໃຫ້ແນວລາວສ້າງຊາດແຕ່ລະຂັ້ນສືບຕໍ່ຈັດຕັ້ງປະຕິບັດຢ່າງມີຜົນສຳເລັດເປັນກ້າວໆ, ໂດຍສະເພາະແມ່ນສະເໜີໃຫ້ແນວລາວສ້າງຊາດນັບແຕ່ສູນກາງລົງຮອດທ້ອງຖິ່ນ, ສົມທົບກັບຄະນະພັກ, ອົງການປົກຄອງທ້ອງຖິ່ນຂັ້ນຂອງຕົນ ເອົາໃຈໃສ່ກະກຽມສ້າງຂະບວນການຕ້ອນຮັບວັນສ້າງຕັ້ງແນວລາວສ້າງຊາດ ວັນທີ 13 ສິງຫາຄົບຮອບ 70 ປີ ໃຫ້ກວ້າງຂວາງດ້ວຍຫຼາຍຮູບການຕ່າງໆ, ແລະ ເພີ່ມທະວີປະຕິບັດພາລະບົດບາດຕິດຕາມກວດກາຂອງແນວລາວສ້າງຊາດໃຫ້ເຂັ້ມແຂງ. ຄຽງຄູ່ກັນນັ້ນ, ທ່ານຍັງໄດ້ແນະ ນຳໃຫ້ ແນວລາວສ້າງຊາດທຸກຂັ້ນໃຫ້ສືບຕໍ່ຊີ້ນຳ-ນຳພາຕໍ່ການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ໃຫ້ເປັນຂະບວນກວ້າງຂວາງ, ຕິດພັນກັບການສ້າງຄອບຄົວ, ການສ້າງບ້ານພັດທະນາຢູ່ທ້ອງຖິ່ນຮາກຖານຕາມມະຕິສາມສ້າງຂອງພັກ. ພ້ອມກັນນັ້ນ, ກໍ່ໃຫ້ເບິ່ງຄືນອັນພົ້ນເດັ່ນ, ແລະ ຈຸດອ່ອນທີ່ກົດໜ່ວງຕໍ່ວຽກງານແນວໂຮມຢູ່ທ້ອງຖິ່ນຮາກຖານ, ເພື່ອຄົ້ນຄວ້າປັບປຸງແກ້ໄຂ ໃຫ້ບັນດາແຂວງຈັດຕັ້ງກອງປະຊຸມຄົບຄະນະປະຈຳປີ ເພື່ອປຶກສາຫາລືຕີລາຄາວຽກງານແນວໂຮມຂອງແຂວງ, ແນ່ໃສ່ເຮັດໃຫ້ມະຕິຕ່າງໆທີ່ກຳນົດໄວ້ນັ້ນ ບັນລຸຜົນສຳເລັດຕາມຄາດໝາຍ.