ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຜົນສຳເລັດ ກອງປະຊູມຄົບຄະນະ ຄັ້ງທີ 8 ຂອງຄະນະບໍລິຫານງານສູນກາງພັກ ສະໄໝທີ X

ກອງປະຊຸມຄົບຄະນະ ຄັ້ງທີ 8 ຂອງຄະນະບໍລິຫານງານສູນກາງພັກ ສະໄໝທີ X ໄດ້ດໍາ​ເນີນຢ່າງເປັນທາງການ ແຕ່ວັນທີ 06 ເຖິງວັນທີ 14 ພຶດສະພາ 2019 ທີ່ສໍານັກງານສູນກາງພັກ, ພາຍໃຕ້ການເປັນປະທານຂອງ ສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ.

– ກອງຊຸມ ໄດ້ຄົ້ນຄວ້າ, ປຶກສາຫາລື ແລະ ໃຫ້ທິດຊີ້ນຳຕໍ່ບັນຫາສຳຄັນຈຳນວນໜຶ່ງ ດັ່ງນີ້:

 ຕີລາຄາຄວາມຄືບໜ້າ ການຈັດຕັ້ງຜັນຂະຫຍາຍມະຕິກອງປະຊຸມຄົບຄະນະ ຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ X ກ່ຽວກັບ ການແກ້ໄຂຄວາມຫຍຸ້ງຍາກດ້ານເສດຖະກິດມະຫາພາກ ເປັນຕົ້ນແມ່ນ: ການຈັດຕັ້ງ​ປະຕິບັດ​ງົບປະມານ​ຂອງ​ລັດ, ການແກ້ໄຂໜີ້ສິນສາທາລະນະ; ການປັບປຸງລັດວິສາຫະກິດ; ການບໍລິການ​ຂອງລັດ ເພື່ອອຳນວຍຄວາມສະດວກໃຫ້ແກ່ພາກທຸລະກິດ, ການຫລຸດຜ່ອນຂອດຂັ້ນ ທີ່ກົດໜ່ວງຖ່ວງດຶງການພັດທະນາ; ການແກ້ໄຂບັນຫາເງິນຕາ; ການ​ຈໍລະ​ຈອນ​ສິນຄ້າ; ການຊຸກຍູ້ສົ່ງເສີມວິສາຫະກິດຂະໜາດກາງ-ຂະໜາດນ້ອຍ ແລະ ການສ້າງຖານລາຍຮັບໃໝ່.

ກອງປະຊຸມ ເປັນເອກະພາບກັນ ຮັບຮອງເອົາທິດທາງ, ​ແຜນວຽກຈຸດສຸມ ​ແລະມາດຕະການໄລຍະສັ້ນ, ໄລຍະຍາວ ​ເພື່ອແກ້ໄຂບັນຫາ​ດັ່ງກ່າວ ຕິດ​ພັນ​ກັບ​ການສ້າງເງື່ອນໄຂ ແລະປັດໄຈຕົວຈິງ ເພື່ອເສີມຂະຫຍາຍບັນດາທ່າແຮງບົ່ມຊ້ອນຂອງຊາດ, ພັດທະນາ ໃຫ້ເກີດຂະແໜງເສດຖະກິດປາຍແຫຼມ, ສ້າງຄວາມສາມາດໃໝ່ຂອງພື້ນຖານການຜະລິດ ແລະ ການບໍລິການ, ຮັບປະກັນທິດພັດທະນາແບບຍືນຍົງ ​ແລະ​ສີ​ຂຽວ.

ກອງປະຊຸມ ​ໄດ້​ຮັບ​ຟັງ​ລາຍ​ງານ ກ່ຽວ​ກັບ​ສະພາບ​ການ​ພັດທະນາ​ຊົນນະບົດ ​​ໃນ​ໄລຍະ​ຜ່ານ​ມາ ​ເຊິ່ງພັກ​ເຮົາຍາມ​ໃດກໍຖືເອົາວຽກ​ງານຊົນນະບົດ​ ແມ່ນ​ໜ້າ​ທີ່ຍຸດທະສາດ, ທັງ​ເປັນ​ວຽກ​ບູລິ​ມະ​ສິດ​ສໍາຄັນ ​ແລະ ເປັນແຜນນະໂຍບາຍໃຫຍ່ ທີ່ຕ້ອງດໍາເນີນໄປຢ່າງຕໍ່ເນື່ອງ ເພື່ອແກ້ໄຂຄວາມທຸກຍາກ ແລະ​ ສ້າງຄວາມ​ຮັ່ງມີ​ໃຫ້​​ແກ່​ປະຊາຊົນ. ຕະຫລອດໄລຍະຜ່ານມາ ຊົນນະບົດ​ຢູ່​ປະ​ເທດ​ເຮົາ ​ໂດຍ​ລວມ​ໄດ້​ມີ​ໂສມ​ໜ້າ​ຫັນປ່ຽນ​​ໃໝ່​ຢ່າງ​ຈະ​ແຈ້ງ, ນັບ​ທັງ​ພື້ນຖານ​ໂຄງ​ລ່າງ,​ ລະບົບ​ສາທາລະ​ນຸປະ​ໂພ​ກ, ການ​ຜະລິດ, ບໍລິການ ລ້ວນ​ແຕ່​ໄດ້​ມີ​ການ​ພັດທະນາ, ຄວາມທຸກ​ຍາ​ກໄດ້​ຫລຸດ​ລົງ​ເປັນ​ກ້າວໆ; ລະບົບການ ເມືອງຢູ່​ຮາກ​ຖານ ໄດ້ຮັບການປັບປຸງ ມີ​ຄວາມ​ໜັກ​ແໜ້ນ, ​ເຂັ້ມ​ແຂງ; ແຕ່ພ້ອມ​ນັ້ນ ກໍ​ເຫັນ​ວ່າ ຍັງ​ມີຂໍ້ຄົງຄ້າງຈໍານວນ​ໜຶ່ງ ທີ່ຍັງຕ້ອງໄດ້ສືບຕໍ່ແກ້ໄຂທີ່​ພົວພັນ​ເຖິງຄວາມ​ຮັບຜິດຊອບ​ນໍາພາ​-ຊີ້​ນໍາ​ຂອງ​ຄະນະ​ພັກ​ ​ແລະ​ ອໍານາດ​ການ​ປົກຄອງແຕ່ລະ​ຂັ້ນ, ຄວາມເປັນເຈົ້າຂອງປະຊາຊົນ, ບັນຫາການບໍລິການສາທາ ລະນະສຸກ, ຄຸນນະພາບຂອງການສຶກສາ ຢູ່​ຊົນນະບົດ ​ແລະ ອື່ນໆ.

ກອງ​ປະຊຸມ​ ມອບ​ໃຫ້​ກົມ​ກາ​ນ​ເມືອງ​ສູນ​ກາງ​ພັກ ສືບ​ຕໍ່​ຊີ້​ນໍາ​ການ​ຄົ້ນຄວ້າ​ບັນຫາ​ໃຫ້ເລິກ​ເຊິ່ງ, ຈະ​ແຈ້ງ ​​ແລະອອກ​ເປັນ​ຄໍາ​ສັ່ງ​ ຂອງ​ກົມ​ການ​ເມືອງ​ສູນ​ກາງ​ພັກ ​ເພື່ອຊີ້​ນໍາ​ວຽກ​ງານພັດທະນາ​ຊົນນະບົດ ​ໃຫ້​ມີ​ການ​ຫັນປ່ຽນ​ໃໝ່ ​​ໃນ​ຊຸມ​ປີ​ຕໍ່ໜ້າ.

ກອງປະຊຸມ ​ໄດ້​ຕີ​ລາຄາຕໍ່ບັນຫາການ​​ແບ່ງ​ຂັ້ນ​ຄຸ້ມ​ຄອງ​ບໍລິຫານ​ລັດ​​ ເຊິ່ງ​ເປັນ​ບັນຫາ​ສໍາຄັນ​ໜຶ່ງ ​ໃນ​ການສືບ​ຕໍ່​ສ້າງ ​ແລະບູລະນະ ລັດປະຊາທິປະໄຕປະຊາຊົນ ຕາມ​ຈຸດໝາຍ​ກ້າວ​ຂຶ້ນ​ສູ່​ສັງຄົມ​ນິຍົມ; ໃນ​ໄລຍະ​ຜ່ານ​ມາ ພັກ-ລັດ ​ໄດ້​ເອົາ​ໃຈ​ໃສ່​ຊີ້​ນໍາ​ການ​ແບ່ງ​ຂັ້ນ​ຄຸ້ມ​ຄອງ ຕາມ​ທິດ​ແບ່ງຄວາມ​ຮັບ ຜິດຊອບ, ​ແບ່ງ​ສິດ ​ແລະຄວາມ​ເປັນ​ເຈົ້າ​ການ​ ໃຫ້​ທ້ອງ​ຖິ່ນ​ຫຼາຍ​ຂຶ້ນ, ​​ ສູນ​ກາງ ​ເຮັດ​ໜ້າ​ທີ່​ຄຸ້ມ​ຄອງ​ມະ ຫາ​ພາກ ​​ເປັນ​ຕົ້ນຕໍ, ​ໂດຍ​ສະ​ເພາະ​ແມ່ນ​ການ​ສ້າງ​ແຂວງ​ເປັນ​ຫົວໜ່ວຍ​ຍຸດ​ທະ​ສາດ, ສ້າງ​ເມືອງ​ເປັນ​ຫົວໜ່ວຍ​ເຂັ້ມ​ແຂງ​ຮອບດ້ານ, ສ້າງ​ບ້ານ​ເປັນ​ຫົວໜ່ວຍ​ພັດທະນາ, ອັນ​ໄດ້​ເຮັດ​ໃຫ້ ໜ້າທີ່, ຂອບເຂດສິດ ແລະ ຄວາມຮັບຜິດຊອບ ຂອງບັນດາອົງການບໍລິຫານຂັ້ນສູນກາງ ແລະ ທ້ອງຖິ່ນແຕ່ລະຂັ້ນ ໄດ້ຖືກກໍານົດໄວ້ໃນກົດໝາຍຢ່າງຈະແຈ້ງ ທັງໄດ້ຮັບການປັບປຸງໃຫ້ໜັກແໜ້ນ ແລະ ເຂັ້ມແຂງຂຶ້ນຕື່ມ, ທ້ອງຖິ່ນມີຄວາມຫ້າວຫັນ, ເປັນເຈົ້າການ​ໃນ​ການ​ປະຕິບັດ​ພາລະ​ບົດບາດ, ໜ້າ​ທີ່ ​ໃນ​ການ​ຄຸ້ມ​ຄອງ​ລັດ ຄຸ້ມ​ຄອງ​ສັງຄົມ​ດ້ວຍ​ກົດໝາຍ ກໍ​ຄື​ການ​ພັດທະນາ​ເສດຖະກິດ-ສັງຄົມ ຢູ່​ທ້ອງ​ຖິ່ນ-ຮາກ​ຖານ ຢ່າງ​ມີ​ປະສິດທິ​ຜົນ.

ພ້ອມ​ນັ້ນ ຄະນະ​ບໍລິຫານ​ງານ​ສູນ​ກາງ​ພັກ ​ຍັງໄດ້ສຸມ​ໃສ່​ຄົ້ນຄວ້າ, ວິ​ເຄາະ​ວິ​ໄຈ​ບັນດາ​ບັນຫາຄົງ​ຄ້າງ ແລະ​ສາ​ເຫດຈໍານວນ​ໜຶ່ງ ​ເພື່ອ​ວາງ​ທິດ​ທາງ​ການ​ປັບປຸງ​ໃນ​ຕໍ່ໜ້າ ​ໂດຍ​ຊີ້​ໃຫ້​ເຫັນ​ວ່າ ປັບປຸງການແບ່ງຂັ້ນຄຸ້ມຄອງ ລະຫວ່າງອົງການບໍລິຫານລັດຂັ້ນສູນກາງ, ແຂວງ, ເມືອງ ແລະ ບ້ານ ຕ້ອງຮັບປະກັນສ້າງຄວາມເປັນລະບົບ ໂດຍອີງໃສ່ກົດໝາຍທີ່ກ່ຽວຂ້ອງ ເປັນຕົ້ນ ກົດໝາຍວ່າ​ດ້ວຍ​ລັດຖະບານ, ກົດໝາຍ​ວ່າ​ດ້ວຍການປົກຄອງທ້ອງຖິ່ນ, ກົດໝາຍ​ທີ່​ດິນ, ກົດໝາຍສົ່ງເສີມການລົງທຶນ, ກົດໝາຍງົບ ປະມານ ແລະ ກົດໝາຍອື່ນໆ ເພື່ອເພີ່ມຄວາມຮັບຜິດຊອບ ແລະ ຜົນປະໂຫຍດໃຫ້ທ້ອງຖິ່ນຮາກຖານ ໃນການນໍາໃຊ້ທ່າແຮງບົ່ມ​ຊ້ອນ ເຂົ້າໃນການພັດທະນາບ້ານຊ່ອງຂອງຕົນເອງ.

ຄະນະ​ບໍລິຫານ​ງານ​ສູນ​ກາງ​ພັກ​ ມອບ​ໃຫ້​ກົມ​ກາ​ນ​ເມືອງ​ສູນ​ກາງ​ພັກ ສືບ​ຕໍ່​ຊີ້​ນໍາ​ການ​ຄົ້ນຄວ້າ​ບັນຫາ​ໃຫ້ລະອຽດ, ເລິກ​ເຊິ່ງຕື່ມ ​ເພື່ອ​ກຽມອອກມະຕິ ຕໍ່ວຽກ​ງານດັ່ງກ່າວ.

ກອງປະຊຸມ ​ໄດ້ພິຈາລະນາ, ​ໃຫ້​ທິດ​ຊີ້​ນໍາ ກ່ຽວ​ກັບ​ການ​ດໍາ​ເນີນ​ຄະດີ​ຕາມ​ຂະ​ບວນຍຸຕິ​ທໍາ ເຊິ່ງ​ເປັນ​ວຽກ​ສໍາຄັນ​ໜຶ່ງ ​ແລະ​ ພວມ​ເປັນ​ບັນຫາ​ພົ້ນ​ເດັ່ນ ​ໃນ​ປະຈຸ​ບັນ; ໄລຍະ​ຜ່ານ​ມາ ​ການ​ດໍາເນີນ​ຄະດີ​ຕາມ​ຂະ​ບວນຍຸຕິ​ທໍາ ​ໄດ້​ຮັບ​ການ​ປັບປຸງ ໃຫ້ມີຄວາມໜັກແໜ້ນເຂັ້ມແຂງເປັນກ້າວໆ, ສາມາດປົກປ້ອງສິດ ແລະ ຜົນປະໂຫຍດ ຂອງລັດ, ລວມໝູ່ ແລະ ພົນລະເມືອງ ຕາມ​ລັດຖະທໍາ​ມະນູນ ​ແລະ​ກົດໝາຍ, ປະກອບສ່ວນ​ໃນ​ການ​ຮັບປະກັນ​ສະຖຽນ​ລະ​ພາບ​ການ​ເມືອງ, ຄວາມ​ສະຫງົບ​ຄວາມ​ປອດ​ໄພ​ໃນ​ສັງຄົມ ​ແລະ​ ຊຸກຍູ້​ການ​ພັດທະນາ​ເສດຖະກິດ​-ສັງຄົມ; ແຕ່ຄຽງຄູ່ກັນນັ້ນກໍຍັງມີຫລາຍອັນທີ່ຕ້ອງໄດ້ສືບຕໍ່ປັບປຸງແກ້ໄຂ ​ເພື່ອ​ຮັບປະກັນຄຸນນະພາບຂອງການ​ແກ້​ໄຂ​ຄະດີ ກໍ​ຄື​ການ​ປະຕິບັດ​ຄໍາ​ຕັດສິນ​ຂອງ​ສານ ​ເພື່ອ​ແນ​ໃສ່​ເພີ່ມ​ທະວີການຄຸ້ມຄອງລັດ, ຄຸ້ມຄອງສັງຄົມ ຕາມລັດຖະທໍາ​ມະນູນ ​ແລະ​ກົດ  ໝາຍ ໃຫ້ມີຄວາມເຂັ້ມງວດ,  ສັກສິດ ​ແລະມີ​ຄວາມ​ຍຸຕິ​ທໍາ.

ກອງ​ປະຊຸມ​ມອບ​ໃຫ້​ກົມ​ການ​ເມືອງ​ສູນ​ກາງ​ພັກ ສືບ​ຕໍ່​ຊີ້​ນໍາພາ​ກສ່ວນ​ກ່ຽວຂ້ອງ​ຄົ້ນຄວ້າ ອອກ​ເປັນ​ມະຕິ ​ຂອງ​ກົມ​ການ​ເມືອງ​ສູນ​ກາງ​ພັກ​ ວ່າ​ດ້ວຍ​ການ​ຍົກ​ສູງ​ປະສິດທິພາບ​ການ​ດໍາ​ເນີນ​ຄະດີ​ຕາມ​ຂະ​ບວນຍຸຕິ​ທໍາ.

ກອງປະຊຸມ ໄດ້ປຶກສາ​ຫາລື, ໃຫ້ທິດຊີ້ນໍາ ​ແລະຮັບຮອງເອົາໂຄງຮ່າງລາຍງານການເມືອງ ຕໍ່ກອງປະຊຸມໃຫຍ່ຄັ້ງທີ XI ຂອງພັກ ​​ໂດຍມອບໃຫ້ກົມການເມືອງສູນກາງພັກ ຊີ້ນຳການກະກຽມເນື້ອໃນຮ່າງລາຍງານການເມືອງ ໃຫ້ມີຄວາມໜັກແໜ້ນ, ຮັດກຸມ ແລະ ແທດຕົວຈິງ ເພື່ອສືບຕໍ່ບູລະນະ ແລະ ເພີ່ມເຕີມເສີມຂະຫຍາຍ, ແນວທາງປ່ຽນແປງໃໝ່ຂອງພັກ ໃຫ້ນັບມື້ນັບອຸດົມສົມບູນ, ປະດິດສ້າງ ແລະ ແກ້ໄຂບັນຫາຕົວຈິງທີ່ເກີດຂຶ້ນ, ຮັບປະກັນ​ໃຫ້​ແກ່ການນຳພາ ພາລະກິດປົກປັກຮັກສາ ແລະ ພັດທະນາສ້າງສາປະເທດຊາດ ຕາມຈຸດໝາຍສັງຄົມນິຍົມ ໄດ້ຮັບຜົນສຳເລັດໃໝ່ໃນຊຸມປີຕໍ່ໜ້າ.

– ກອງປະຊຸມຄົບຄະນະ ຄັ້ງທີ 8 ຂອງຄະນະບໍລິຫານງານສູນກາງພັກ ສະໄໝທີ X ມອບໃຫ້ກົມການເມືອງ, ຄະນະເລຂາທິການສູນກາງພັກ ນຳພາຊີ້ນຳ ການເຊື່ອມຊຶມ ແລະຜັນຂະຫຍາຍບັນດາບັນ ຫາທີ່ໄດ້ຮັບຮອງໃນກອງປະຊຸມສູນກາງຄັ້ງນີ້ ໃຫ້ກ້ວາງຂວາງ, ເລິກເຊິ່ງ, ພ້ອມທັງຊີ້ນຳຢ່າງໃກ້ຊິດ ຕໍ່ບັນດາອົງການຂອງລັດ ຮີບຮ້ອນຫັນໃຫ້ເປັນແຜນປະຕິບັດງານລະອຽດ, ລວມທັງດຳເນີນການປັບປຸງບັນດານິຕິກຳທີ່ຈຳເປັນ ໃຫ້ສອດຄ່ອງກັບທິດທາງທີ່ວາງອອກ ຢ່າງ​ເປັນລະບົບ, ຮັດກຸມ ທັງຈັດຕັ້ງປະຕິບັດ​ໃຫ້ເຂັ້ມງວດ ​ແລະມີປະສິດທິຜົນສູງ.

– ຄະນະບໍລິຫານງານສູນກາງພັກ ຮຽກຮ້ອງມາຍັງທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະປວງຊົນລາວທັງຊາດ ພ້ອມກັນເພີ່ມທະວີຄວາມສາມັກຄີເປັນປືກແຜ່ນ, ເຊີດຊູ ແລະ ເສີມຂະ ຫຍາຍຈິດໃຈຮັກຊາດ, ເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ ສົມທົບກັບການຂຸດຄົ້ນກຳ ລັງແຮງພາຍໃນ ແລະກຳລັງແຮງສັງລວມຂອງຍຸກສະໄໝ ເຂົ້າໃນການປົກປັກຮັກສາ ແລະສ້າງສາພັດ ທະນາປະເທດຊາດ; ຍົກສູງຄວາມຮັບຜິດຊອບ ແລະເປັນເຈົ້າການໃນການເຊື່ອມຊຶມ, ກຳແໜ້ນ ແລະ ພ້ອມກັນຈັດຕັ້ງຜັນຂະຫຍາຍມະຕິກອງປະຊຸມຄົບຄະນະຄັ້ງທີ 8 ຂອງຄະນະບໍລິຫານງານສູນກາງພັກ ສະໄໝທີ X ກໍຄືໃນການນຳພາ-ຊີ້ນຳຜັນຂະຫຍາຍ ມະຕິ, ຄຳສັ່ງ ລວມທັງບັນດານິຕິກຳຕ່າງໆ ຂອງສູນກາງພັກ, ສະພາ​ແຫ່ງ​ຊາດ ແລະລັດຖະບານ ວາງອອກໃຫ້ເປັນຂະບວນການຟົດຟື້ນ, ແຂງແຮງ, ຕໍ່ເນື່ອງ, ສ້າງການຫັນປ່ຽນໃໝ່ ທີ່ຕັ້ງໜ້າໃນການແກ້ໄຂບັນຫາຄົງຄ້າງຕ່າງໆ, ສ້າງພື້ນຖານອັນ​ໜັກແໜ້ນ ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ໄດ້ຮັບຜົນສຳເລັດຢ່າງຈົບງາມ.