ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມເຈົ້າໜ້າທີ່ອາວຸໂສອາຊຽນວ່າດ້ວຍການຕ້ານອາຊະຍາກໍາຂ້າມຊາດຄັ້ງທີ 24 ໄດ້ປິດລົງດ້ວຍຜົນສໍາເລັດຢ່າງຈົບງາມ ໃນວັນທີ 28 ມິຖຸນາ 2024, ພາຍຫຼັງທີ່ດໍາເນີນມາເປັນເວ ລາ 3 ວັນ ກອງປະຊຸມໃນຄັ້ງນີ້ ບັນດາຄະນະຜູ້ແທນເຈົ້າໜ້າທີ່ອາວຸໂສອາອາຊຽນ ໄດ້ມີການປຶກສາຫາລືກັນຢ່າງເລິກເຊີ່ງ ແລະ ກົງໄປ-ກົງມາ, ທັງເປັນການແລກປ່ຽນປະສົບການ, ຂໍ້ສະເໜີ ແລະ ຍຸດທະສາດ ໃນການຕ້ານອາຊະຍາກໍາຂ້າມຊາດທຸກຮູບແບບ ເພື່ອຫຼຸດຜ່ອນໄພຂົ່ມຂູ່ທີ່ເປັນຜົນກະທົບຕໍ່ຄວາມສະຫງົບ, ຄວາມ ເປັນລະບຽບຮຽບຮ້ອຍ ແລະ ການພັດທະນາເສດຖະກິດ-ສັງຄົມ ຂອງພາກພື້ນ. ພ້ອມດຽວກັນນີ້, ບັນດາປະເທດສະມາຊິກອາ ຊຽນ ຍັງໄດ້ ພ້ອມທັງກໍານົດທິດທາງແຜນການຮ່ວມມືໃນການຕ້ານອາຊະຍາກໍາຂ້າມຊາດ ລະຫວ່າງ ປະເທດສະມາຊິກອາຊຽນ ແລະ ຄູ່ຮ່ວມອື່ນໆ ເພື່ອເປັນການປະກອບສ່ວນສ້າງປະຊາຄົມອາຊຽນໃຫ້ມີຄວາມປອດໄພ.
ພາຍຫຼັງກອງປະຊຸມເຈົ້າໜ້າທີ່ອາວຸໂສອາຊຽນວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 24 ໄດ້ປິດລົງດ້ວຍຜົນສໍາເລັດຢ່າງຈົບງາມ, ທ່ານ ພົນຕີ ສຸລິນະ ແກ້ວປະສີດ ຫົວໜ້າຫ້ອງວ່າການກະຊວງ ປກສ, ຫົວໜ້າເຈົ້າໜ້າທີ່ອາວຸໂສຮັບຜິດຊອບວຽກງານຕ້ານອາຊະຍາກໍາຂ້າມຊາດ ສປປ ລາວ ໃນນາມປະທານກອງປະຊຸມໄດ້ຖະແຫຼ່ງຂ່າວຕໍ່ກັບຜົນສໍາເລັດຂອງກອງປະຊຸມ ເຊິ່ງທ່ານໄດ້ກ່າວວ່າ: ກອງປະຊຸມເຈົ້າໜ້າທີ່ອາວຸໂສອາຊຽນວ່າດ້ວຍການຕ້ານອາຊະຍາກໍາຂ້າມຊາດຄັ້ງທີ 24 ນີ້ ມີບັນດາຄະນະຜູ້ແທນຈາກປະເທດສະມາຊິກອາຊຽນ, ປະເທດສັງເກດການ, ກອງເລຂາອາຊຽນ ແລະ ປະເທດຄູ່ຮ່ວມເຈລະຈາ ເຂົ້າຮ່ວມຫຼາຍກ່ວາ 200 ທ່ານ.
ກອງປະຊຸມໃນຄັ້ງນີ້ ແມ່ນໄດ້ແລກປ່ຽນບົດຮຽນໃນການຕ້ານອາຊະຍາກໍາຂ້າມຊາດ ລະຫວ່າງປະເທດສະມາຊິກອາຊຽນດ້ວຍກັນ ແລະ ລະຫວ່າງອາຊຽນກັບປະເທດຄູ່ຮ່ວມເຈລະຈາ ພ້ອມທັງແລກປ່ຽນທັດສະນະກ່ຽວກັບສະພາບການກໍ່ອາຊະຍາກໍາທີ່ເກີດຂຶ້ນໃນພາກພື້ນ ແລະ ສາກົນ, ທົບທວນຄືນຜົນການຈັດຕັ້ງປະຕິບັດບັນດາແຜນງານ, ໂຄງການ, ຂໍ້ຕົກລົງຕ່າງໆ ຂອງກອງປະຊຸມຄັ້ງທີຜ່ານມາ ແລະ ປຶກສາຫາລືກ່ຽວກັບທິດທາງແຜນການຮ່ວມມືໃນຕໍ່ໜ້າໃນການຕ້ານອາຊະຍາກໍາຂ້າມຊາດ ພາຍໃຕ້ 10 ຂົງເຂດອາຊະຍາກໍາ ຄື: ການຄ້າຂາຍຢາເສບຕິດ, ການກໍ່ການຮ້າຍ, ການຄ້າມະນຸດ, ການລັກລອບຄ້າຂາຍອາວຸດເສິກ, ອາຊະຍາກໍາທາງເສດຖະກິດ, ການຟອກເງີນ, ອາຊະຍາກໍາທາງຄອມພິວເຕີ, ການໂຈລະກໍາທາງທະເລ, ການຄ້າຂາຍສັດປ່າ ແລະ ໄມ້ຫວງຫ້າມ ແລະ ການລັກລອບນໍາຄົນເຂົ້າ-ອອກເມືອງ.
ກອງປະຊຸມເຈົ້າໜ້າທີ່ອາວຸໂສອາຊຽນວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 24 ໄດ້ມີບັນດາກອງປະຊຸມປິ່ນອ້ອມທີ່ສໍາຄັນລວມທັງໝົດ 12 ກອງປະຊຸມ, ໃນນີ້ມີກອງປະຊຸມຄົບຄະນະສາໍລັບປະເທດສະມາຊິກອາຊຽນມີ 1 ກອງປະຊຸມ ແລະ ກອງປະຊຸມປຶກສາຫາລືລະຫວ່າງປະເທດສະມາຊິກອາຊຽນກັບບັນດາປະເທດຄູ່ຮ່ວມເຈລະຈາ 11 ກອງປະຊຸມ ເຊິ່ງແຕ່ລະກອງປະຊຸມແມ່ນດໍາເນີນໄປດ້ວຍຜົນສໍາເລັດອັນຈົບງາມຕາມແຜນການທີ່ກໍານົດໄວ້, ກອງປະຊຸມໄດ້ຮັບຮອງເອົາແຜນວຽກ ແລະ ໂຄງການຕ້ານອາຊະຍາກໍາຂ້າມຊາດ ໃນປີຕໍ່ໄປ ເພື່ອຮັບປະກັນຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍຂອງສັງຄົມ, ແນໃສ່ສ້າງເງື່ອນໄຂອໍານວຍຄວາມສະດວກໃຫ້ແກ່ການພັດທະນາເສດຖະກິດ-ສັງຄົມ ແລະ ຍົກລະດັບຊີວິດການເປັນຢູ່ຂອງປະຊາຊົນໃຫ້ນັບມື້ນັບດີຂຶ້ນ.
ພິເສດກອງປະຊຸມໃນຄັ້ງນີ້ໄດ້ພິຈາລະນາ 7 ເອກະສານທີ່ເປັນຂໍ້ລິເລີ່ມຂອງ ສປປ ລາວ ໃນນາມປະເທດເຈົ້າພາບ ແລະ ປະທານກອງປະຊຸມເຈົ້າໜ້າທີ່ອາວຸໂສອາຊຽນວ່າດ້ວຍການຕ້ານອາຊະຍາກໍາຂ້າມຊາດຄັ້ງທີ 24 ປະກອບມີ: ຖະແຫຼງການຜູ້ນໍາອາຊຽນວ່າດ້ວຍການເພີ່ມທະວີການຮ່ວມມືຕ້ານການລັກລອບຄ້າຢາເສບຕິດ ແລະ ສານເຄມີຕົ້ນ; ຖະແຫຼງການວຽງຈັນວ່າດ້ວຍການຍົກສູງການຮ່ວມມືປະຕິບັດກົດໝາຍຕ້ານການຫຼອກລວງການຈ້າງງານທາງອອນລາຍ; ລະບຽບການວ່າດ້ວຍການປະສານງານທີ່ມີປະສິດທິພາບຂອງຈຸດປະສານງານກອງປະຊຸມລັດຖະມົນຕີອາຊຽນວ່າດ້ວຍການຕ້ານອາຊະຍາກໍາຂ້າມຊາດ ແລະ ກົນໄກທີ່ຂຶ້ນກັບ; ລະບຽບການປະຕິບັດ ແລະ ພິທີການ ສໍາລັບກອງປະຊຸມລັດຖະມົນຕີອາຊຽນ ວ່າດ້ວຍອາຊະຍາກໍາຂ້າມຊາດ ແລະ ກົນໄກທີ່ຂຶ້ນກັບ; ເອກະສານໂຄງຮ່າງບົດສະເໜີໂຄງການ ສໍາລັບການຈັດຕັ້ງປະຕິບັດຂໍ້ລິເລີ່ມ ພາຍໃຕ້ກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກໍາຂ້າມຊາດ ແລະ ກົນໄກທີ່ຂຶ້ນກັບ; ເອກະສານພາລະບົດບາດຂອງກອງປະຊຸມໜ່ວຍງານວິຊາການຮ່ວມອາຊຽນ-ລັດເຊຍ ວ່າດ້ວຍການຕ້ານການກໍ່ການຮ້າຍ ແລະ ອາຊະຍາກໍາຂ້າມຊາດ ແລະ ເອກະສານພາລະບົດບາດຂອງກອງປະຊຸມລັດຖະມົນຕີອາຊຽນວ່າດ້ວຍການຕ້ານອາຊະຍາກໍາຂ້າມຊາດ. ໃນນີ້ 5 ເອກະສານແມ່ນຈະໄດ້ນໍາສະເໜີຕໍ່ກອງປະຊຸມລັດຖະມົນຕີອາຊຽນວ່າດ້ວຍການຕ້ານອາຊະຍາກໍາຂ້າມຊາດຄັ້ງທີ 18 ໃນເດືອນ ສິງຫາ 2024 ເພື່ອພິຈາລະນາຮັບຮອງ, 1 ເອກະສານແມ່ນຈະໄດ້ສະເໜີຢູ່ກອງປະຊຸມສຸດຍອດອາຊຽນໃນເດືອນຕຸລາ 2024 ແລະ 1 ເອກະ ສານແມ່ນຮັບຮອງຢູ່ໃນຂັ້ນກອງປະຊຸມເຈົ້າໜ້າທີ່ອາວຸໂສອາຊຽນ.
ພ້ອມນີ້, ທ່ານ ພົນຕີ ສຸລິນະ ແກ້ວປະເສີດ ໄດ້ຕາງໜ້າໃຫ້ເຈົ້າໜ້າທີ່ອາວຸໂສລາວ ສະແດງຄວາມຂອບໃຈ ແລະ ຍ້ອງຍໍຊົມເຊີຍມາຍັງຄະນະຜູ້ແທນປະເທດສະມາຊິກອາຊຽນ, ປະເທດຄູ່ຮ່ວມເຈລະຈາ, ປະເທດສັງເກດການ, ບັນດາອະນຸກໍາມະການຕ່າງໆ ແລະ ພະນັກງານກ່ຽວຂ້ອງ ທີ່ໄດ້ປະກອບສ່ວນເຮັດໃຫ້ກອງປະຊຸມຄັ້ງນີ້ ມີຜົນສໍາເລັດຕາມຈຸດປະສົງ ແລະ ຄາດໝາຍທີ່ວາງໄວ້.
ທີ່ມາ: ຄວາມສະຫງົບລາວ