ວັນທີ 13 ສິງຫາ 2024, ທ່ານ ລັດສະໝີ ແກ້ວມະນີ, ເອກ ອັກຄະລັດຖະທູດ, ຜູ້ຕາງໜ້າຖາວອນ ແຫ່ງ ສປປ ລາວ ທີ່ເຊີແນວ ໃນຖານະເປັນປະທານຄະນະກໍາມະການອາຊຽນ-ເຊີແນວ (ASEAN Committee in Geneva (ACG)) ໄດ້ນໍາພາກອງປະຊຸມຄະນະກໍາມະການອາຊຽນ-ເຊີແນວ ຄັ້ງທີ 2/2024 ດ້ວຍຜົນສໍາເລັດອັນຈົບງາມ ໂດຍມີບັນດາທູດອາຊຽນ ແລະຕີມໍເລັດສະເຕ ເຂົ້າຮ່ວມຢ່າງພ້ອມພຽງ.
ທ່ານທູດ ລັດສະໝີ ໄດ້ຕີລາຄາສູງຕໍ່ຜົນສໍາເລັດຂອງກອງປະຊຸມລັດຖະມົນຕີຕ່າງປະເທດ ອາຊຽນ ຄັ້ງທີ 57, ກອງປະຊຸມລັດຖະມົນຕີຕ່າງປະເທດອາຊຽນກັບຄູ່ຮ່ວມເຈລະຈາອາຊຽນ ແລະກອງປະຊຸມລະດັບລັດຖະມົນຕີອື່ນໆທີ່ກ່ຽວຂ້ອງ ທີ່ຈັດຂຶ້ນໃນລະຫວ່າງວັນທີ 22-27 ກໍລະກົດ 2024 ທີ່ ນະຄອນຫຼວງວຽງ ຈັນ ຜ່ານມາ, ເຊີ່ງສະແດງອອກທັງທາງດ້ານປະລິມານກອງປະຊຸມ; ດ້ານເນື້ອໃນ, ໂດຍພິເສດ, ແມ່ນສາມາດອອກຖະແຫລງການຮ່ວມກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ 57 (57th AMM Joint Communique); ດ້ານລະດັບການເຂົ້າຮ່ວມກອງປະຊຸມລ້ວນແຕ່ແມ່ນລະດັບລັດຖະມົນຕີຶຂື້ນເມືອ; ແລະຜົນກອງປະຊຸມຄັ້ງນີ້ເປັນການກະກຽມໃຫ້ແກ່ກອງປະຊຸມ ສຸດຍອດອາຊຽນ ຄັ້ງທີ 44 ແລະ 45 ແລະກອງປະຊຸມສຸດຍອດທີ່ກ່ຽວຂ້ອງອື່ນ, ເຊີ່ງຈະຈັດຂຶ້ນໃນລະຫວ່າງວັນທີ 6-11 ຕຸລາ 2024, ທີ່ ນະຄອນຫລວງວຽງຈັນ, ພາຍໃຕ້ການເປັນປະທານ ຂອງ ສປປ ລາວ.
ພ້ອມນີ້, ກອງປະຊຸມຄະນະກໍາມະການອາຊຽນ-ເຊີແນວຄັ້ງທີ 2 ນີ້ ຍັງໄດ້ຕີລາຄາສູງຕໍ່ຜົນສໍາເລັດໃນການຈັດຕັ້ງປະຕິບັດວຽກງານຂອງຕົນໃນໄລຍະຜ່ານມາ, ເຊີ່ງສະແດງອອກໃນການອອກຖະແຫລງການຮ່ວມອາຊຽນ, ການກ່າວຄໍາປາໃສສະໜັບ ສະໜູນເຊີ່ງກັນ ແລະກັນ ແລະການສະໜັບສະໜູນຜູ້ລົງສະໝັກຂອງກັນ ແລະກັນ ໃນຕໍາ ແໜ່ງຫວ່າງຕ່າງໆຂອງຂອບການຮ່ວມມື ສປຊ. ນອກນີ້, ຍັງໄດ້ພ້ອມກັນກໍານົດທິດທາງໃນຕໍ່ໜ້າວຽກ ງານຂອງຕົນ ລວມທັງວຽກຂອບສິດທິມະນຸດ, ວຽກງານຫຼຸດຜ່ອນອາວຸດ, ວຽກຂອບການຮ່ວມມືດ້ານການຄ້າ ແລະ ການພັດ ທະນາ ສປຊ (UNCTAD), ວຽກຂອບອົງການຈັດຕັ້ງແຮງງານສາກົນ, ວຽກຂອບອົງການການຄ້າໂລກ ແລະອື່ນໆ.
ປະເທດສະມາຊິກອາຊຽນ ແລະ ຕີມໍເລັດສະເຕ ໄດ້ສະແດງຄວາມຊົມເຊີຍ ແລະຕີລາຄາສູງຕໍ່ຜົນສໍາເລັດຂອງການເປັນປະ ທານຄະນະກໍາມະການອາຊຽນ-ເຊີແນວ ຂອງ ສປປ ລາວ, ເວັ້າລວມ, ແລະເວົ້າສະເພາະແມ່ນຜົນສໍາເລັດຂອງກອງປະຊຸມຄະນະ ກໍາມະການອາຊຽນ-ເຊີແນວ ຄັ້ງທີ 2 ແລະໄດ້ຢືນຢັນຈະສືບຕໍ່ໃຫ້ການຮ່ວມມື ແລະສະໜັບສະໜູນການເປັນປະທານອາຊຽນຂອງ ສປປ ລາວ ລວມທັງການຈະຈັດກອງປະຊຸມຄະນະກໍາມະ ການອາຊຽນ-ເຊີແນວ ຄັ້ງທີ 3 ແລະກອງປະຊຸມສຸດຍອດຜູ້ນໍາອາຊຽນ ຄັ້ງທີ 44 ແລະ45 ພາຍໃຕ້ການເປັນປະທານຂອງ ສປປ ລາວ ໃນຕົ້ນເດືອນ ຕຸລາ 2024, ທີ່ ນະຄອນຫລວງວຽງຈັນ.
