ກອງປະຊຸມຜູ້ບັນຊາການທະຫານສູງສຸດອາຊຽນ ຄັ້ງທີ 21 ໄດ້ປິດລົງດ້ວຍຜົນສຳເລັດໃນວັນທີ 5 ກັນຍານີ້ ພາຍໃຕ້ການເປັນປະທານຂອງທ່ານ ພົນໂທ ຄຳລຽງ ອຸທະໄກສອນ ຮອງລັດ ຖະມົນຕີກະຊວງປ້ອງກັນປະເທດ ຫົວໜ້າກົມໃຫຍ່ເສນາທິການກອງທັບປະຊາຊົນລາວ ກອງປະຊຸມໄດ້ຈັດຂຶ້ນພາຍໃຕ້ຄໍາຂວັນ “ຮ່ວມມືກັນເພື່ອສັນຕິພາບ, ຄວາມໝັ້ນຄົງ ແລະ ຄວາມເຂັ້ມ ແຂງຂອງອາຊຽນ” ຊຶ່ງມີຜູ້ບັນ ຊາການທະຫານສູງສຸດ 10 ປະ ເທດອາຊຽນ ພ້ອມຄະນະຜູ້ແທນ ແລະ ຕີມໍແລັດສະເຕ ໃນນາມເປັນປະເທດສັງເກດການເຂົ້າຮ່ວມ.
ທ່ານ ພົນໂທ ຄຳລຽງ ອຸທະໄກສອນ ໄດ້ຖະແຫຼງຂ່າວຜົນສໍາເລັດໃນວັນທີ 5 ກັນຍານີ້ວ່າ: ຜົນສໍາເລັດກອງປະຊຸມຫົວໜ້າສືບຂ່າວທະຫານອາຊຽນ ຄັ້ງທີ 21 ແລະ ກອງປະຊຸມຫົວໜ້າສູ້ຮົບອາຊຽນ ຄັ້ງທີ 14. ພ້ອມນັ້ນ, ບັນດາຜູ້ບັນຊາການທະຫານສູງ ສຸດກອງທັບປະເທດອາຊຽນຍັງໄດ້ພ້ອມກັນແລກປ່ຽນສະພາບທີ່ພົ້ນເດັ່ນໃນພາກພື້ນ ແລະ ປຶກສາຫາລືກ່ຽວກັບການຮ່ວມມືວຽກງານປ້ອງກັນຊາດເພື່ອເສີມສ້າງຂີດຄວາມສາມາດ, ຄວາມ ເຊື່ອໝັ້ນ ແລະ ຄວາມໄວ້ເນື້ອເຊື່ອໃຈ ຊຶ່ງກັນ ແລະ ກັນລະຫວ່າງກອງທັບຂອງບັນດາປະເທດສະມາຊິກອາຊຽນໃນການຮັບມືກັບສິ່ງທ້າທາຍຕໍ່ຄວາມໝັ້ນຄົງໃນປັດຈຸບັນ ແລະ ໃນອະນາຄົດ ທັງ ເປັນການປະກອບສ່ວນເຂົ້າໃນການຮັກສາສັນຕິພາບ, ຄວາມໝັ້ນຄົງ ແລະ ຄວາມເຂັ້ມ ຝແຂງຂອງພາກພື້ນ.
ກອງປະຊຸມຍັງໄດ້ຮັບຮອງເອົາແຜນການ 2 ປີຂອງທະຫານອາຊຽນ 2024-2026 ຊຶ່ງລວມມີບັນດາກອງປະຊຸມ ແລະ ກິດຈະກໍາຕ່າງໆ ພາຍໃຕ້ແຜນງານຂອງກອງປະຊຸມລັດຖະມົນຕີປ້ອງກັນປະ ເທດອາຊຽນ, ອາຊຽນ-ບວກ, ກອງປະຊຸມຜູ້ບັນຊາການທະຫານສູງສຸດອາຊຽນ ແລະ ອື່ນໆ; ພ້ອມດຽວກັນນີ້, ກອງປະຊຸມຍັງໄດ້ພິຈາລະນາ, ຮັບຮອງ ແລະ ລົງນາມຖະແຫຼງການຮ່ວມກອງປະຊຸມຜູ້ບັນຊາການທະຫານສູງສຸດອາຊຽນ ຄັ້ງທີ 21 ຊຶ່ງເປັນພື້ນຖານອັນສໍາຄັນໃຫ້ແກ່ການສືບຕໍ່ຈັດຕັ້ງປະຕິບັດທິດທາງການຮ່ວມມືຂອງທະຫານອາຊຽນ; ສິ່ງສຳຄັນອັນໜຶ່ງໃນກອງປະຊຸມກອງທັບປະຊາຊົນລາວຍັງໄດ້ມອບໂອນການເປັນປະທານຂອງກອງປະຊຸມຜູ້ບັນຊາການທະຫານສູງສຸດອາຊຽນ ຄັ້ງທີ 22, ກອງປະຊຸມຫົວໜ້າສືບຂ່າວທະຫານອາຊຽນ ຄັ້ງທີ 22 ແລະ ກອງປະຊຸມຫົວໜ້າສູ້ຮົບອາຊຽນ ຄັ້ງທີ 15 ໃຫ້ແກ່ປະເທດມາເລເຊຍ ສືບຕໍ່ເປັນປະທານກອງປະຊຸມໃນປີ 2025.
ທ່ານ ພົນໂທ ຄຳລຽງ ອຸທະໄກສອນ ກ່າວຕື່ມວ່າ: ກອງປະຊຸມຜູ້ບັນຊາການທະຫານສູງສຸດອາຊຽນ ຄັ້ງທີ 21 ໄດ້ດໍາເນີນໄປດ້ວຍບັນຍາກາດທີ່ສ້າງສັນ ແລະ ມີເນື້ອໃນຄົບຖ້ວນ ຊຶ່ງເຮັດໃຫ້ກອງປະຊຸມຄັ້ງນີ້ປະສົບຜົນສໍາເລັດໄດ້ຕາມລະດັບຄາດ ໝາຍ; ໃນນາມປະທານກອງປະຊຸມ, ຕາງໜ້າໃຫ້ນາຍ ແລະ ພົນ ທະຫານຂອງກອງທັບປະຊາຊົນລາວ ສະແດງຄວາມຂອບໃຈມາ ຍັງກອງ ທັບບັນດາປະເທດສະ ມາຊິກອາຊຽນ ແລະ ຕີມໍແລັດສະເຕ ທີ່ໄດ້ໃຫ້ການສະໜັບສະໜູນຊ່ວຍເຫຼືອ ແລະ ປະກອບສ່ວນຢ່າງຕັ້ງ ໜ້າເຂົ້າໃນກອງປະຊຸມຄັ້ງນີ້; ສະແດງຄວາມຂອບໃຈ ແລະ ຊົມ ເຊີຍມາຍັງກອງເລຂາອາຊຽນຂອງກະຊວງປ້ອງກັນປະເທດ, ບັນດາອະນຸກໍາມະການ ແລະ ທຸກພາກສ່ວນທີ່ກ່ຽວຂ້ອງທີ່ໄດ້ປະກອບສ່ວນເຂົ້າໃນການຫ້າງຫາກະກຽມ ແລະ ຈັດຕັ້ງກອງປະ ຊຸມດ້ວຍຜົນສໍາເລັດອັນຈົບງາມ.
