ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຜົນສໍາເລັດກອງປະຊຸມສາມັນຄົບຄະນະກໍາມະການສູນກາງແນວລາວສ້າງຊາດ ຄັ້ງທີ 5 ສະໄໝທີ X

ກອງປະຊຸມສາມັນຄົບຄະນະກໍາມະການສູນກາງແນວລາວສ້າງຊາດ ຄັ້ງທີ 5 ສະໄໝທີ X ອັດລົງດ້ວຍຜົນສໍາເລັດໃນຕອນບ່າຍວັນທີ 12 ສິງຫາ 2020 ພາຍຫລັງດໍາເນີນມາເປັນເວລາ 2 ວັນເຕັມ ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ, ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ.

ຕະຫລອດໄລຍະເວລາ 2 ວັນ ຜູ້ແທນກອງປະຊຸມໄດ້ຮັບຟັງ, ປະກອບຄຳເຫັນ, ເປັນເອກະພາບຕໍ່ເນື້ອໃນຂອງກອງປະຊຸມ ແລະ ພ້ອມກັນຮັບຮອງເອົາຮ່າງບົດສະຫຼຸບຕີລາຄາການເຄື່ອນໄຫວວຽກງານແນວລາວສ້າງຊາດປີ 2019-2020 ແລະ ທິດທາງແຜນການເຄື່ອນໄຫວ ປີ 2020-2021, ຮັບຟັງການປະກອບຄຳເຫັນຂອງຜູ້ຕາງໜ້າຈາກອົງການພາຄີ, ຕາງໜ້າຄະນະທີ່ປຶກສາຂອງສູນກາງແນວລາວສ້າງຊາດ ແລະ ແນວລາວສ້າງຊາດແຂວງຈໍານວນໜຶ່ງ. ນອກນີ້, ຍັງໄດ້ປະກອບຄໍາເຫັນຕໍ່ໂຄງຮ່າງບົດລາຍງານການເມືອງກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດ ຄັ້ງທີ XI ແລະ ຮ່າງກົດລະບຽບແນວລາວສ້າງຊາດສະໄໝທີ XI ສະບັບປັບປຸງ ເພື່ອເປັນພື້ນຖານໃຫ້ແກ່ການກະກຽມພິ ຈາລະນາຮັບຮອງເອົາໃນກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດສະໄໝທີ XI ໃນປີ 2021.

ໃນກອງປະຊຸມຄັ້ງນີ້ ຍັງໄດ້ມີພິທີຍ້ອງຍໍຜົນງານ 10 ປີຂອງບຸກຄົນໃຫ້ການນໍາຂອງສູນກາງແນວລາວສ້າງຊາດ, ກໍາມະການສູນກາງແນວລາວສ້າງຊາດອ້ອມຂ້າງສູນກາງ, ໃນນີ້ ໄດ້ປະດັບຫລຽນໄຊອິດສະຫລະຊັ້ນ II ຈໍານວນ 5 ທ່ານ, ຫລຽນໄຊອິດສະຫລະຊັ້ນ III ຈໍານວນ 2 ທ່ານ, ຫລຽນໄຊແຮງງານຊັ້ນ I ຈໍານວນ 18 ທ່ານ, ຫລຽນໄຊແຮງງານຊັ້ນ II ຈໍານວນ 19 ທ່ານ, ຫລຽນໄຊແຮງງານຊັ້ນ III ຈໍານວນ 29 ທ່ານ ແລະ ຫລຽນກາແຮງງານ ຈໍານວນ 28 ທ່ານ. ນອກຈາກນີ້ ຍັງໄດ້ມອບໃບຍ້ອງຍໍລັດຖະບານ ແລະ ໃບຍ້ອງຍໍຂອງສູນກາງແນວລາວສ້າງຊາດໃຫ້ພະນັກ ງານ-ລັດຖະກອນຂອງສູນກາງແນວລາວສ້າງຊາດຈໍານວນໜຶ່ງ ແລະ ມອບຫຼຽນກາ 70 ປີແນວລາວສ້າງຊາດໃຫ້ປະ ທານແນວລາວສ້າງຊາດແຂວງ, ນະຄອນຫຼວງວຽງຈັນ ແລະ ກໍາມະການສູນກາງແນວລາວສ້າງຊາດຈາກບັນດາແຂວງ-ນະຄອນຫຼວງຜູ້ທີ່ມີຜົນງານດີເດັ່ນປະກອບສ່ວນວຽກງານແນວລາວສ້າງຊາດຕະ ຫຼອດໄລຍະການປະຕິບັດໜ້າທີ່ວຽກງານຂອງຕົນ.

ກອງປະຊຸມຄັ້ງນີ້ ຍັງໄດ້ຮັບຟັງການໂອ້ລົມເພື່ອຊີ້ທິດເຍືອງທາງ ຈາກ ທ່ານ ໄຊສົມພອນ ພົມວິຫານ, ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ທ່ານໄດ້ເນັ້ນໜັກ6 ບັນຫາສໍາຄັນ ເປັນຕົ້ນ: ໃຫ້ຄະ ນະຮັບຜິດຊອບກະກຽມດໍາເນີນກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດສະໄໝທີ XI ໂດຍສະເພາະແມ່ນວຽກງານການກະກຽມຮ່າງບົດລາຍງານການເມືອງກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດຄັ້ງທີ XI ແລະຮ່າງກົດລະບຽບຂອງແນວລາວສ້າງຊາດສະໄໝທີ XI ສະບັບປັບປຸງສືບຕໍ່ເອົາໃຈໃສ່ຮີບຮ້ອນສັງລວມຄໍາຄິດຄໍາເຫັນເພື່ອປັບປຸງເນື້ອໃນຕາມການປະກອບຄໍາເຫັນຂອງຜູ້ແທນກອງປະຊຸມ ແລະທິດຊີ້ນໍາຈາກຄະນະປະຈໍາສູນກາງແນວລາວສ້າງຊາດເພື່ອເອົາລົງໄປທາບທາມຢູ່ທ້ອງຖິ່ນອີກຮອບໜຶ່ງກ່ອນຈະນໍາມາຜ່ານກອງປະຊຸມຄະນະປະຈໍາສູນກາງແນວລາວສ້າງຊາດເປີດກວ້າງແລ້ວນໍາໄປຜ່ານໃນກອງປະຊຸມໃຫຍ່ຜູ້ແທນແນວລາວສ້າງຊາດ ທົ່ວປະເທດສະໄໝທີ XIພິຈາລະນາ ແລະ ຮັບຮອງເອົາ ແລະ ບັນຫາອື່ນຯ ຕື່ມອີກ. ທັ້ງນີ້ ເພື່ອເຮັດໃຫ້ການເຄື່ອນ ໄຫວວຽກງານຂອງແນວລາວສ້າງຊາດຂັ້ນສູນກາງ ກໍຄື ຂັ້ນທ້ອງຖິ່ນໃນທົ່ວປະເທດນັບມື້ໄດ້ຮັບຜົນສໍາເລັດ ແລະ ປະ ກອບສ່ວນສໍາຄັນໃນການປົກປັກຮັກສາ ແລະ ພັດທະນາປະເທດຊາດໃຫ້ນັບມື້ຈະເລີນກ້າວໜ້າຢ່າງບໍ່ຢຸດຢັ້ງ.

ຂ່າວ: ບຸນຕຽງ ຈັນທະວົງ
ພາບ: ຄໍາກອງ ກິດຕິຄຸນ