ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສະຖາປະນາ ສປປ ລາວ ຄົບຮອບ 45 ປີ
( 02 ທັນວາ 1975 – 2020 ) ຢ່າງສຸດໃຈ

ຜົນສໍາເລັດກອງປະຊຸມໃຫຍ່ຜູ້ແທນອົງຄະນະພັກ ແຂວງວຽງຈັນ ຄັ້ງທີ VI

ກອງປະຊຸມໃຫຍ່ຜູ້ແທນອົງຄະນະພັກ ແຂວງວຽງຈັນ ຄັ້ງທີ VI ໄດ້ອັດລົງດ້ວຍຜົນສໍາເລັດໃນໃນວັນທີ 19 ພະ ຈິກ 2020 ທີ່ສະໂມສອນໃຫຍ່ຂອງແຂວງ ພາຍຫລັງດໍາເນີນມາເປັນເວລາ 2 ວັນ ພາຍໃຕ້ການເປັນປະທານຂອງ ສະຫາຍ ຄຳພັນ ສິດທິດຳພາ, ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ ໂດຍການໃຫ້ກຽດເຂົ້າຮ່ວມຂອງ ສະຫາຍ ຈັນສີ ໂພສີຄຳ, ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ພ້ອມດ້ວຍສະມາຊິກພັກສົມ ບູນ 257 ສະຫາຍ, ຍິງ 35 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກ19.728 ສະຫາຍພາຍໃນແຂວງ ແລະ ແຂກຮັບເຊີນເຂົ້າຮ່ວມ.

ຕະຫລອດໄລຍະເວລາ 2 ວັນ, ກອງປະຊຸມໃຫຍ່ ໄດ້ພ້ອມກັນຄົ້ນຄ້ວາ, ປະກອບຄໍາເຫັນ ແລະ ຮັບຮອງເອົາຮ່າງບົດລາຍງານການເມືອງໂດຍໄດ້ເປັນເອກະພາບຢ່າງສູງຕໍ່ຜົນສຳເລັດຂອງການຈັດຕັ້ງປະຕິບັດມະຕິກອງປະຊຸມໃຫຍ່ອົງຄະນະພັກແຂວງວຽງຈັນ ຄັ້ງທີ V ໃນ 5 ປີຜ່ານມາ (2016-2020), ພ້ອມກັນນີ້ ໄດ້ຕິລາຄາການຊີ້ນຳ-ນຳພາລວມຂອງຄະນະບໍລິຫານງານພັກແຂວງໃນໄລຍະຜ່ານມາຢ່າງພາວະວິໄສໄຈ້ແຍກໃຫ້ເຫັນເຖິງຜົນສຳເລັດ, ດ້ານດີແລະຈຸດອ່ອນ ຂໍ້ຄົງຄ້າງທີ່ເປັນພື້ນຖານ ແລະ ສາມາດຖອດຖອນໄດ້ບົດຮຽນພຶດຕິກໍາແຫ່ງການຊີ້ນຳ-ນໍາພາຂອງອົງຄະນະພັກແຂວງໃນ 5 ປີຜ່ານມາ ເພື່ອສືບຕໍ່ຊີ້ນໍາ-ນໍາພາໃນຊຸມປີຕໍ່ໜ້າ.

ກອງປະຊຸມໃຫຍ່ ຍັງໄດ້ເປັນເອກະສັນກັນຮັບຮອງເອົາຄາດໝາຍສູ້ຊົນໃນ 5 ປີຕໍ່ໜ້າ (2021-2025) ໂດຍຈະສຸມໃສ່ປະຕິບັດຕາມຄຳຂັວນ:“ ຍົກສູງຄວາມສາມາດນຳພາ ແລະ ຄວາມເປັນແບບຢ່າງນຳໜ້າຂອງພັກ, ສືບຕໍ່ບູລະນະລະບົບການເມືອງໃຫ້ປອດໃສ ເຂັ້ມແຂງ ໜັກແໜ້ນ,ຍູ້ແຮງການຫັນເປັນອຸດສາຫະກຳ ແລະ ທັນສະໄໝ, ເປັນໃຈກາງການພັດທະນາ ແລະ ການເຊື່ອມໂຍງທີ່ເຂັ້ມແຂງ ແລະ ຍືນຍົງ ” ຊຶ່ງໄດ້ກຳນົດບາງເນື້ອໃນຕົ້ນຕໍ ຄື: ສືບຕໍ່ຍູ້ແຮງການພັດທະນາເສດຖະກິດໄປຖືກທິດ, ຮັບປະກັນໃຫ້ເສດຖະ ກິດຂະຫຍາຍຕົວສະເລ່ຍ 6%. ຮອດປີ 2025 ຂະຫຍາຍຕົວບໍ່ໃຫ້ຫຼຸດ 6,5%, ລວມຍອດຜະລິດຕະພັນພາຍໃນ (GDP)ໃຫ້ບັນລຸ 11.742,48 ຕື້ກີບ, ສະເລ່ຍຕໍ່ຫົວຄົນໄດ້ 23,60 ລ້ານກີບ ຫຼື 2.663 ໂດລາສະຫະລັດ. ສູ້ຊົນຈັດເກັບລາຍຮັບໃຫ້ໄດ້ 15-20% ຂອງລວມຍອດຜະລິດຕະ ພັນພາຍໃນ, ດຶງດູດການລົງທຶນຈາກພາຍໃນ ແລະ ຕ່າງປະເທດ ດ້ວຍການສ້າງສິ່ງອໍານວຍຄວາມສະ ດວກດ້ານພື້ນຖານໂຄງລ່າງ ແລະ ແກ້ໄຂກົນໄກການບໍລິຫານລັດ ທີ່ກົດໜ່ວງຖ່ວງດຶງການພັດທະນາເສດຖະກິດ-ສັງຄົມ, ແນໃສ່ເຮັດໃຫ້ແຂວງວຽງຈັນ ກາຍເປັນໃຈກາງແຫ່ງການພັດທະນາ ແລະ ການເຊື່ອມໂຍງ, ສຸມໃສ່ຜະລິດເຂົ້າໃຫ້ບັນລຸໄດ້ 1,72 ລ້ານໂຕນ, ສະເລ່ຍ 691 ກິໂລ/ຄົນ/ປີ, ຫັນລົງກໍ່ສ້າງຮາກຖານການເມືອງ ຕາມ 4 ເນື້ອໃນ 4 ຄາດ ໝາຍ, ພັດທະນາຊົນນະບົດຮອບດ້ານຕິດພັນກັບວຽກງານ 3 ສ້າງ, ຍູ້ແຮງຂະບວນການແຂ່ງຂັນຮັກຊາດ ແລະ ພັດທະ ນາ, ສ້າງບ້ານໃຫຍ່ກາຍເປັນສີສັນຕົວເມືອງໃນຊົນນະບົດໃຫ້ຫຼາຍຂຶ້ນ, ແກ້ໄຂບ້ານທຸກຍາກທີ່ຍັງເຫລືອ 1 ບ້ານ ແລະ ຄອບຄົວທຸກຍາກຍັງເຫລືອ 692 ຄອບຄົວ ໃຫ້ໝົດໄປ ແນໃສ່ບັນລຸຕາມເນື້ອໃນມາດຖານການສ້າງບ້ານເປັນຫົວໜ່ວຍພັດທະນາໃຫ້ກວມເອົາ 82,6%, ພັດທະນາບັນ ດາເມືອງ ຕາມທິດສີຂຽວຍືນຍົງ, ສຸມໃສ່ພັດທະນາ 4 ເມືອງທົ່ງພຽງ, ສ້າງໃຫ້ເມືອງວຽງຄຳ ກາຍເປັນເມືອງໃຈ ກາງຂອງເທດສະບານແຂວງວຽງຈັນ.

ກອງປະຊຸມໃຫຍ່ ໄດ້ປ່ອນບັດເລືອກຕັ້ງເອົາຄະນະບໍລິ ຫານງານພັກແຂວງ ສະໄໝທີ VI ເຊິ່ງມີຜູ້ອອກຮັບສະໝັກເລືອກຕັ້ງ 40 ສະຫາຍ, ຍິງ 5 ສະຫາຍ, ເລືອກເອົາ 35 ສະຫາຍ, ຍິງ 5 ສະຫາຍ.
ກອງປະຊຸມຄັ້ງປະຖົມມະລຶກຂອງຄະນະບໍລິຫານງານພັກແຂວງສະໄໝທີ VI ໄດ້ເປັນເອກະພາບສູງ ເລືອກຕັ້ງເອົາຄະນະປະຈຳພັກແຂວງ ຈຳນວນ 11 ສະຫາຍ, ຍິງ 1 ສະຫາຍ
– ເລືອກຕັ້ງເອົາ ສະຫາຍ ຄຳພັນ ສິດທິດຳພາ ກຳມະການສູນກາງພັກ ເປັນເລຂາຄະນະບໍລິຫານງານພັກແຂວງ ສະໄໝທີ VI.
– ເລືອກຕັ້ງເອົາ ສະຫາຍ ບຸນສອນ ເພັດລາວັນ ແລະ ສະຫາຍ ທອງສອນ ວົງສໍາພັນ ເປັນຮອງເລຂາ ຄະນະບໍລິຫານງານພັກແຂວງ ສະໄໝທີ VI.
– ເລືອກຕັ້ງເອົາ ສະຫາຍ ສົມດີ ແກ້ວດາລາວິນ ເປັນປະທານຄະນະກວດກາພັກແຂວງ ແລະ ເລືອກຕັ້ງເອົາ :
ສະຫາຍ ຄໍາປ່ຽນ ຈັນທະມັງຄຸນ, ສະຫາຍ ກອງແພງ ແກ້ວພູທອງ ແລະ ສະຫາຍ ເຄນ ເຮືອງຄໍາແສງ ເປັນຮອງປະທານຄະນະກວດກາພັກແຂວງ ສະໄໝທີ VI.
– ກອງປະຊຸມໄດ້ເລືອກເອົາຜູ້ແທນສົມບູນ 27 ສະຫາຍ ແລະ ຜູ້ແທນສໍາຮອງ 3 ສະຫາຍ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ XI ຂອງພັກທີ່ຈະໄຂຂຶ້ນໃນຕໍ່ໜ້າ.

ກອງປະຊຸມ ຍັງໄດ້ຮັບຟັງການໂອ້ລົມຈາກ ສະຫາຍ ຈັນສີ ໂພສີຄໍາ, ກຳມະການກົມການເມືອງສູນກາງພັກ, ເລຂາທິ ການສູນກາງພັກ, ຫົວໜ້າຄະນະຈັດຕັ້ງສູນກາງພັກ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳ-ນຳພາຂອງຄະນະບໍລິຫານງານພັກແຂວງວຽງຈັນຊຸດເກົ່າ ເຫັນວ່າໄດ້ຮັບຜົນສຳເລັດໃນຫຼາຍດ້ານ ເຮັດໃຫ້ການພັດທະນາເສດຖະກິດ-ສັງຄົມຂອງແຂວງນັບມື້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ, ພ້ອມກັນນັ້ນ, ສະຫາຍ ໄດ້ໃຫ້ທິດຊີ້ນໍາຕໍ່ຄະ ນະບໍລິຫານງານພັກແຂວງຊຸດໃໝ່ສືບຕໍ່ເສີມຂະຫຍາຍດ້ານດີທີ່ຕັ້ງໜ້າ ແລະ ປັບປຸງແກ້ໄຂຂໍ້ຄົງຄ້າງ ແຕ່ລະດ້ານໃຫ້ໝົດໄປ, ທັງຮຽກຮ້ອງໃຫ້ສືບຕໍ່ຊີ້ນຳ-ນຳພາ ແລະ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ອົງຄະນະພັກແຂວງຄັ້ງທີ VIເຂົ້າສູ່ຊີວິດຕົວຈິງຂອງບັນດາຂະແໜງການ ແລະ ສັງຄົມໃຫ້ມີຜົນສຳເລັດຢ່າງເປັນຮູບປະທໍາ.

ຂ່າວ: ບຸນຕຽງ ຈັນທະວົງ
ພາບ: ຄຳກອງ ກິດຕິຄຸນ