ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ໄດ້ດຳເນີນ ຢ່າງເປັນທາງການແຕ່ວັນທີ 13-15 ມັງກອນ ປີ 2021 ທີ່ນະຄອນຫຼວງວຽງຈັນ ພາຍໃຕ້ຄຳຂວັນ “ຍົກສູງຄວາມສາມາດນໍາພາຂອງພັກ, ເພີ່ມທະວີຄວາມສາມັກຄີເປັນປຶກແຜ່ນຂອງປະຊາຊົນໃນຊາດ, ຮັບປະກັນສະຖຽນລະພາບດ້ານການເມືອງຢ່າງໜັກແໜ້ນ, ຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ, ສ້າງການຫັນປ່ຽນການພັດທະນາເສດຖະກິດ-ສັງຄົມໄປສູ່ຄຸນນະພາບໃໝ່ ຢ່າງແຂງ ແຮງ, ຍົກລະດັບຄຸນນະພາບຊີວິດຂອງປະຊາຊົນໃຫ້ສູງຂຶ້ນ, ສືບຕໍ່ ນໍາປະເທດຊາດພົ້ນຈາກສະຖານະພາບດ້ອຍພັດທະນາ ແລະ ກ້າວເດີນສູ່ຈຸດໝາຍສັງຄົມນິຍົມ” ໂດຍມີຜູ້ແທນສົມບູນເຂົ້້າຮ່ວມທັງໝົດ 768 ສະຫາຍ, ເຊິ່ງເປັນຕົວແທນໃຫ້ແກ່ສະມາຊິກພັກທັງໝົດໃນທົ່ວປະເທດ 348.686 ສະຫາຍ, ພ້ອມທັງ ມີແຂກຖືກເຊີນເຂົ້າຮ່ວມຈໍານວນ 147 ສະຫາຍ.
ຕະຫລອດໄລຍະເວລາ 3 ວັນ ກອງປະຊຸມໃຫຍ່ ໄດ້ຄົ້ນຄວ້າຢ່າງເລິກເຊິ່ງກົງໄປກົງມາ ແລະ ໄດ້ຮັບຮອງເອົາຢ່າງເປັນເອກະສັນລາຍງານການເມືອງຂອງຄະນະບໍລິ ຫານງານສູນກາງພັກ ສະໄໝທີ X ທີ່ໄດ້ຕີລາຄາໝາກຜົນແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ໃນ 5 ປີຜ່ານມາ ເຫັນວ່າໄດ້ຮັບຜົນສໍາເລັດອັນສໍາຄັນໃຫຍ່ຫລວງ ແລະຜົນງານອັນພົ້ນເດັ່ນຮອບດ້ານທີ່ຍາດມາໄດ້, ເຊິ່ງໄດ້ສ້າງໜໍ່ແໜງສໍາຄັນໃນທຸກຂົງເຂດ ເພື່ອເປັນປັດໄຈຍູ້ການຫັນປ່ຽນໃຫ້ແຂງແຮງ ເລິກເຊິ່ງ ແລະຮອບດ້ານ ໃນຊຸມປີຕໍ່ໜ້າ. ພ້ອມທັງເປັນເອກະພາບຢ່າງພາວະວິໄສ ດ້ານຂໍ້ຄົງຄ້າງ, ຂໍ້ຂາດຕົກບົກຜ່ອງ ໃນການນໍາພາຊີ້ນໍາຂອງພັກ ກໍຄືການຈັດຕັ້ງປະຕິບັດໜ້າທີ່, ວຽກງານຈຸດສຸມໃນບາງດ້ານ ທີ່ບໍ່ສາມາດບັນລຸຜົນຕາມຄາດໝາຍທີ່ວາງອອກ, ທັງຊີ້ໃຫ້ເຫັນສາເຫດຕົ້ນຕໍ ເພື່ອກໍານົດທິດທາງມາດຕະການແກ້ໄຂທີ່ສອດຄ່ອງ ແລະແທດເໝາະ ເພື່ອຮັບປະກັນໃຫ້ແກ່ການຫັນປ່ຽນໃໝ່ຢ່າງຈິງຈັງ ໃນການຈັດຕັ້ງປະຕິບັດແນວທາງຂອງພັກໃນຕໍ່ໜ້າ. ພ້ອມນັ້ນ ກອງປະຊຸມ ຍັງໄດ້ປະເມີນຜົນກວມລວມບັນດາຜົນສໍາເລັດ ແລະ ບາງດ້ານທີ່ຕ້ອງໄດ້ສືບຕໍ່ເອົາໃຈໃສ່ແກ້ໄຂ ແລະຍົກລະດັບ ກ່ຽວກັບການສ້າງບັນດາປະຖົມປັດໄຈ ໃຫ້ແກ່ການກ້າວເດີນສູ່ສັງຄົມ ນິຍົມ ຕາມແນວທາງປ່ຽນແປງໃໝ່ຮອບດ້ານ ແລະ ມີຫລັກການຂອງພັກເຮົາ
ກອງປະຊຸມໃຫຍ່ ຍັງໄດ້ຮັບຮອງເອົາບົດສໍາຫຼວດການນໍາພາລວມ ຂອງຄະນະບໍລິ ຫານງານສູນກາງພັກ ສະໄໝທີ X ທີ່ໄດ້ຕີລາຄາສູງຕໍ່ຄວາມບາກບັ່ນພະຍາຍາມອັນຕັ້ງໜ້າ ແລະ ຄວາມເປັນເຈົ້າການປະດິດສ້າງໃນການເສີມຂະຫຍາຍມູນເຊື້ອ ແລະບົດຮຽນຂອງພັກ ເຮັດໃຫ້ການຈັດຕັ້ງປະ ຕິບັດມະຕິກອງປະຊຸມໃຫຍ່ X ໄດ້ຮັບຜົນສໍາເລັດອັນສໍາຄັນໃນຫຼາຍດ້ານ, ພ້ອມທັງວາງມາດຕະ ການ ກໍາຈັດ, ແກ້ໄຂຈຸດບົກ ຜ່ອງ ແລະຄົງຄ້າງທີ່ຜ່ານມາຢ່າງຈິງຈັງ, ຍົກສູງຄວາມສາມາດນໍາພາ ແລະ ຄວາມເປັນແບບຢ່າງນໍາໜ້າຂອງຄະນະນໍາຂອງສູນກາງພັກໃຫ້ສູງຂຶ້ນຕື່ມອີກ, ເປັນຫຼັກ ແຫຼ່ງນໍາໜ້າສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະຮອບດ້ານໃນຊຸມປີຕໍ່ໆໄປ.
ກອງປະຊຸມໃຫຍ່ ໄດ້ຮັບຟັງການລາຍງານ ກ່ຽວກັບການດັດແປງກົດລະບຽບຂອງພັກ ແລະ ໄດ້ຮັບຮອງເອົາກົດລະບຽບຂອງພັກ ສະໄໝທີ XI, ພ້ອມນີ້ ໄດ້ເລືອກຕັ້ງເອົາຄະນະບໍລິຫານງານສູນກາງພັກສະໄໝທີ XI ປະກອບດ້ວຍກຳມະການສົມ ບູນ 71 ສະຫາຍ, ຍິງ 12 ສະຫາຍ ແລະ ກຳມະການສຳຮອງ 10 ສະຫາຍ, ຍິງ 2 ສະຫາຍ.
ກອງປະຊຸມຄົບຄະນະຄັ້ງປະຖົມມະລືກຂອງຄະນະບໍລິຫານງານສູນກາງພັກ ສະ ໄໝທີ XI ໄດ້ເປັນເອກະພາບກັນເລືອກຕັ້ງເອົາກຳມະການກົມການເມືອງສູນກາງພັກ ປະກອບດ້ວຍ 13 ສະ ຫາຍ, ຍິງ 2 ສະຫາຍ ລວມມີ:
1. ສະຫາຍ ທອງລຸນ ສີສຸລິດ
2. ສະຫາຍ ພັນຄໍາ ວິພາວັນ
3. ສະຫາຍ ນາງ ປານີ ຢາທໍ່ຕູ້
4. ສະຫາຍ ບຸນທອງ ຈິດມະນີ
5. ສະຫາຍ ໄຊສົມພອນ ພົມວິຫານ
6. ສະຫາຍ ພົນເອກ ຈັນສະໝອນ ຈັນຍາລາດ
7. ສະຫາຍ ຄຳພັນ ພົມມະທັດ
8. ສະຫາຍ ສິນລະວົງ ຄຸດໄພທູນ
9. ສະຫາຍ ສອນໄຊ ສີພັນດອນ
10. ສະຫາຍ ກິແກ້ວ ໄຂຄຳພິທູນ
11. ສະຫາຍ ພົນໂທ ວິໄລ ຫລ້າຄຳຟອງ
12. ສະຫາຍ ນາງ ສີໃສ ລືເດດມູນສອນ
13. ສະຫາຍ ສະເຫລີມໄຊ ກົມມະສິດ
ກອງປະຊຸມໃຫຍ່ ໄດ້ເລືອກເອົາກຳມະການຄະນະເລຂາທິການສູນກາງພັກ 9 ສະຫາຍ, ຍິງ 2 ສະຫາຍ ລວມມີ:
1. ສະຫາຍ ທອງລຸນ ສີສຸລິດ
2. ສະຫາຍ ບຸນທອງ ຈິດມະນີ
3. ສະຫາຍ ຄຳພັນ ພົມມະທັດ
4. ສະຫາຍ ນາງ ສີໃສ ລືເດດມູນສອນ
5. ສະຫາຍ ຄຳພັນ ເຜີຍຍະວົງ
6. ສະຫາຍ ອະນຸພາບ ຕຸນາລົມ
7. ສະຫາຍ ທອງສະລິດ ມັງໜໍ່ເມກ
8. ສະຫາຍ ນາງ ສູນທອນ ໄຊຍະຈັກ
9. ສະຫາຍ ນາງ ວຽງທອງ ສີພັນດອນ
ກອງປະຊຸມ ໄດ້ເຫັນດີ ເລືອກເອົາ ສະຫາຍ ບຸນທອງ ຈິດມະນີ ເປັນຜູ້ປະຈຳ ການຄະນະເລຂາທິການສູນກາງພັກ.
ກອງປະຊຸມໃຫຍ່ ຍັງໄດ້ເລືອກຕັ້ງເອົາປະທານ ແລະ ຮອງປະທານຄະນະກວດກາສູນກາງພັກ ໃນນີ້ ເຫັນດີເອກະພາບ ເລືອກ ສະຫາຍ ຄໍາພັນ ພົມມະທັດ ເປັນປະທານຄະນະກວດກາສູນກາງພັກ ແລະ ເລືອກຮອງປະທານຄະນະກວດກາສູນກາງພັກ 6 ສະຫາຍ ຄື:
1. ສະຫາຍ ວິໄລວັນ ບຸດດາຄຳ
2. ສະຫາຍ ສີໄນ ມຽງລາວັນ
3. ສະຫາຍ ສຸກຄຳເພັດ ເຮືອງບຸດສີ
4. ສະຫາຍ ດາວບົວລະພາ ບາວົງເພັດ
5. ສະຫາຍ ໄຊຄໍາ ອຸ່ນມີໄຊ
6. ສະຫາຍ ວັນໄຊ ຊົງຊາຢູ
ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ສະໄໝທີ XI, ນາຍົກລັດຖະມົນຕີ ກ່າວສູນທອນພົດອັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ວ່າ: ກອງປະຊຸມໃຫຍ່ຂອງພັກໃນຄັ້ງນີ້ໄດ້ຮັບຜົນສຳເລັດຢ່າງສະຫງ່າງາມ ເປັນການຢັ້ງຢືນຢ່າງຈະ ແຈ້ງເຖີງຄວາມສາມັກຄີເປັນເອກະພາບສູງ ແລະ ຄວາມຮັບຜິດຊອບຢ່າງເຕັມທີ່ຂອງພັກເຮົາໃນການຕົກລົງບັນຫາໃຫຍ່ທີ່ສໍາຄັນ ແລະ ເປັນພື້ນຖານຂອງພັກ, ຂອງການປະຕິວັດ ແລະ ຂອງປະເທດຊາດ, ທຸກບັນຫາທີ່ຍົກຂຶ້ນໃນກອງປະຊຸມລ້ວນແຕ່ໄດ້ຮັບການຄົ້ນຄວ້າພິຈາລະນາຢ່າງເລິກເຊີ່ງ ແລະ ຖືກຮັບຮອງເອົາຢ່າງເປັນເອກະສັນ. ກອງປະຊຸມຄັ້ງນີ້ ໄດ້ຢັ້ງຢືນຄືນຢ່າງໜັກແໜ້ນໃນການຢຶດໝັ້ນ ແລະ ເສີມຂະຫຍາຍແນວທາງປ່ຽນແປງໃໝ່ທີ່ມີຫລັກ ການຂອງພັກເຮົາ ແນ່ໃສ່ສ້າງພື້ນຖານ ແລະ ທ່ວງທ່າໃໝ່ອັນໜັກແໜ້ນໃຫ້ແກ່ການສືບຕໍ່ບູລະນະລະບອບປະຊາທິປະໄຕ ປະຊາຊົນໃຫ້ສົມບູນຍິ່ງຂຶ້ນ, ສ້າງປະຖົມປັດໃຈສູ່ຈຸດໝາຍສັງຄົມນິຍົມຢ່າງໜັກແໜ້ນ.
ພ້ອມນີ້ ສະຫາຍຍັງໄດ້ສະແດງຄວາມ ຊົມເຊີຍ ທຸກພາກສ່ວນ ລວມທັງ ປະຊາ ຊົນລາວບັນດາເຜົ່າ ແລະ ບັນດາພັກອ້າຍນ້ອງ, ບັນດາປະເທດເພື່ອນມິດ ແລະອົງ ການຈັດຕັ້ງສາກົນ ທີ່ໄດ້ໃຫ້ການສະໜັບສະໜູນຊ່ວຍເຫລືອອັນລໍ້າຄ່າ ແກ່ພາລະ ກິດພັດທະນາ ແລະສ້າງສາປະເທດຊາດຂອງປະຊາຊົນເຮົາ ລວມທັງປະກອບສ່ວນເຮັດໃຫ້ກອງປະຊຸມໃຫຍ່ຂອງພັກຄັ້ງນີ້ປະສົບຜົນສຳເລັດຕາມທີ່ຄາດໝາຍໄວ້ທຸກປະການ ແລະ ຮຽຮກຮ້ອງມາຍັງຄະນະບໍລິຫານງານສູນກາງພັກທີ່ໄດ້ຮັບການຄັດ ເລືອກໃໝ່ ກໍຄື ຄະນະພັກທຸກຂັ້ນ, ສະມາຊິກພັກທຸກສະຫາຍ ຈົ່ງເຊີດຊູຄວາມເປັນແບບຢ່າງນໍາໜ້າໃນທຸກດ້ານ ນໍາພາມະຫາຊົນ ປະຕິບັດມະຕິຂອງກອງປະຊຸມໃຫຍ່ຄັ້ງນີ້ ໃຫ້ປະກົດຜົນເປັນຈິງ. ພ້ອມກັນນີ້ ຮຽກຮ້ອງມາຍັງພະນັກງານ, ນັກຮົບ, ປະຊາຊົນລາວບັນດາເຜົ່າ, ບັນດາຊັ້ນຄົນ ແລະ ພີ່ນ້ອງເຊື້ອຊາດລາວຜູ້ຮັກຊາດທີ່ດໍາລົງຊີວິດ ແລະທໍາມາຫາກິນຢູ່ຕ່າງປະເທດ ຈົ່ງເຊີດຊູນໍ້າໃຈຮັກຊາດ, ເສີມຂະຫຍາຍມານະຈິດບາກບັ່ນບຸກບືນ ເຂົ້້າໃສ່ການປະຕິບັດໜ້າທີ່, ທໍາມາຫາກິນ ແລະ ສ້າງສາ, ບູລະນະລະບອບປະຊາທິປະໄຕປະຊາຊົນ ກ້າວເດີນສູ່ຈຸດໝາຍສັງຄົມນິຍົມຢ່າງໜັກແໜ້ນ.
ໂດຍ: ບຸນຕຽງ ຈັນທະວົງ
Loading...