ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຜົນສໍາເລັດກອງປະຊຸມໃຫຍ່ຄັ້ງທີ XIII ຂອງໜ່ວຍພັກໜັງສືພິມ ປະຊາຊົນ

ກອງປະຊຸມໃຫຍ່ຄັ້ງທີ XIII ຂອງໜ່ວຍພັກໜັງສືພິມປະຊາຊົນ ຈັດຂຶ້ນໃນວັນທີ 28 ກັນຍາ 2020 ໂດຍການ ໃຫ້ກຽດເຂົ້າຮ່ວມ ຂອງ ສະຫາຍ ສະຫວັນຄອນ ຣາຊມຸນຕີຄະນະປະຈໍາພັກ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ).

ກອງປະຊຸມ ໄດ້ຮັບຮອງເອົາບົດລາຍງານການເມືອງທັງສອງພາກ ແລະ ບົດສໍາຫລວດການນໍາພາລວມຂອງຄະນະຫນ່ວຍພັກ ຫນັງສຶພິມ ປະຊາຊົນ ຕະຫລອດໄລຍະ 4 ປີ ຜ່າຍມາ. ໃນໂອກາດຂຶ້ນຜ່ານບົດລາຍງານການເມືອງຂອງກອງປະຊຸມຄັ້ງນີ້ ສະຫາຍ ວັນໄຊ ຕະວິນຍານ, ກໍາມະການໃນຄະນະພັກກະຊວງ ຖວທ, ຮັກສາການເລຂາໜ່ວຍພັກໜັງສືພິມປະຊາຊົນ, ຫົວໜ້າບັນນາທິການໜັງສືພິມປະຊາຊົນ ໄດ້ຍົກໃຫ້ເຫັນຜົນງານໃນໄລຍະ 4 ປີຜ່ານມາຄະນະໜ່ວຍພັກຫນັງສືພິມ ປະຊາຊົນ ໂດຍໄດຮັບການຊີ້ນໍາໆ ພາຈາກຄະນະພັກກະຊວງ ຖວທ ໄດ້ນໍາພາພະນັກງານສະມາຊິກພັກພາຍໃນໜ່ວຍເຮັດສໍາເລັດໜ້າທີ່ການເມືອງຂອງຕົນດ້ວຍຜົນສໍາເລັດສົມກັບເປັນກະບອກສຽງຂອງສູນກາງພັກປະຊາຊົນປະຕິວັດລາວ ໂດຍໄດ້ຕັ້ງໜ້າສູ້ຊົນຊີ້ນຳ-ນຳພາສຶກສາອົບຮົມການເມືອງແນວຄິດໃຫ້ພະນັກງານສະມາຊິກພັກເຊື່ອມ​ຊຶມ ແລະ ຜັນຂະຫຍາຍແນວທາງນະໂຍບາຍຂອງພັກ, ມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກກະຊວງ ຖວທ, ລະບຽບກົດໝາຍຂອງລັດ, ແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ 8 ມະຕິກອງປະຊຸມຄົບຄະນະຂອງສູນກາງພັກ ແລະ ບັນດາເອກະສານໃນໂອກາດລະນຶກວັນສຳຄັນຂອງພັກຂອງຊາດ.

ພ້ອມນີ້ ໄດ້ສຸມໃສ່ຊີ້ນຳ-ນຳພາສະມາຊິກພັກເຂົ້າຮ່ວມດຳເນີນຊີວິດການເມືອງພາຍໃນໜ່ວຍເພື່ອສະຫລຸບຖອດ ຖອນບົດຮຽນປະຈຳເດືອນທັງເປັນການສຶກສາອົບຮົມແນວຄິດໃຫ້ແກ່ສະມາຊິກພັກ, ພະນັກງານເຮັດໃຫ້ທຸກຄົນຕັ້ງໜ້າປະຕິບັດໜ້າທີ່ຕາມພາລະບົດບາດ, ຂອບເຂດ, ສິດ ແລະ ໜ້າທີ່ຂອງຕົນດ້ວຍຄວາມຮັບຜິດຊອບສູງ ເຮັດໃຫ້ສະມາຊິກພັກ, ພະນັກງານທຸກຄົນມີຄວາມອຸ່ນອ່ຽນທຸ່ນທ່ຽງ ແລະ ເຊື່ອໝັ້ນຕໍ່ການນຳພາຂອງພັກ, ມີຄວາມເປັນແບບຢ່າງນຳໜ້າ, ມີຄວາມສາມັກຄີເປັນເອກະພາບ ແລະປະຕິບັດໜ້າທີ່ຂອງຕົນຢ່າງມີຜົນສຳເລັດ.

ສະຫາຍ ວັນໄຊ ຕະວິນຍານ ຍົກໃຫ້ເຫັນຜົນສໍາເລັດໃນຫລາຍດ້ານ, ໃນນີ້ ສະເພາະ​ດ້ານ​ວຽກງານວິຊາ​ສະ​ເພາະຫນັງສືພິມປະຊາຊົນ ໄດ້ຮັບການປັບປຸງທັງທາງດ້ານເນື້ອໃນ ແລະ ຮູບແບບ, ທັງສອດຄ່ອງກັບສະພາບ ແລະ ເງື່ອນ ໄຂໃນປັດຈຸບັນ ໂດຍໄດ້ກຳນົດໜ້າບົດ, ຂ່າວ ແລະ ຄໍລຳຕ່າງໆ ພ້ອມທັງເພີ່ມບົດນຳບົດຄວາມໃຫ້ຫຼາຍຂື້ນແບ່ງຄວາມຮັບຜິດຊອບໃຫ້ແຕ່ລະພະແນກເຮັດໃຫ້ຄຸນນະພາບຂອງໜັງສືພິມທັງໜັງສືພິມ ປະຊາຊົນລາຍວັນ, ໜັງສືພິມປະຊາຊົນວັນອາທິດສູງເດັ່ນຂື້ນກ່ວາເກົ່າ, ເ​ວັບໄຊຂອງໜັງສືພິມປະຊາຊົນ ໄດ້ຮັບການປັບປຸງຂື້ນສາມາດເຂົ້າເບີ່ງໄດ້ງ່າຍ ແລະ ການປ່ອຍເວບໄຊຈາກແຕ່ກ່ອນແມ່ນປ່ອຍວັນລະຄັ້ງ ປະຈຸບັນບາງມື້ກໍສາມາດປ່ອຍ 2-3 ຄັ້ງຂຶ້ນກັບຂ່າວ ແລະ ເຫດການເດັ່ນໃນແຕ່ລະວັນ ເຮັດໃຫ້ມີຜູ້ເຂົ້າເບິ່ງເພີ່ມຂື້ນ. ປັດຈຸບັນໜັງສືພິມ ປະຊາຊົນ ມີຍອດພິມຈຳໜ່າຍ 2.300 – 2.500 ສະບັບຕໍ່ວັນ. ໜັງສຶພິມ ວັນອາທິດ ມີຍອດພິມ 800-1000 ສະບັບ/ຄັ້ງ, ດ້ານເວັບໄຊມາຮອດປະຈຸບັນມີຜູ້ເຂົ້າເບີ່ງທັງໝົດ 4.680.000 ເທື່ອຄົນຕໍ່ປີ ຫຼື 13.000ເທື່ອຄົນຕໍ່ມື້. ໄລຍະ 3ປີ ຜ່ານມາ ໜັງສືພິມ ປະຊາຊົນ ໄດ້ອອກຂ່າວທັງພາຍໃນ ແລະ ຕ່າງປະເທດໄດ້ທັງໝົດ 16560 ຂ່າວ, ບົດປະເພດຕ່າງໆໄດ້3.770 ບົດ, ຮູບ 11.953 ແຜ່ນ. ບົດຄວາມ, ບົດນຳໄດ້ປະມານ 3-4 ບົດ ຕໍ່ອາທິດ.

ພ້ອມນີ້ ໄດ້ປັບປຸງການຈັດໜ້າໄປສູ່ລະບົບທັນສະ ໄໝ, ທຸກເນື້ອໃນຂ່າວ ແລະ ບົດ ທີ່ຖືກສົ່ງມາເປັນ Fileແລ້ວຈະເປັນຟອນໃດກໍຕາມແມ່ນບໍ່ໄດ້ຕີຄືນໃໝ່ສາມາດຄອນເວິດຈັດເຂົ້າໃນມາເກັດໄດ້ເລີຍ ແລະ ໄດ້ສ້າງ Facebook ​ເປັນຂອງໜັງສືພິມ ປະຊາຊົນ. ມາຮອດປະຈຸບັນມີ ຜູ້ຕິດຕາມ 1.380 ກ່ວາຄົນ.

ນອກຈາກນີ້ ສະຫາຍ ວັນໄຊ ຕະວິນຍານ ຍັງຍົກໃຫ້ເຫັນຈຸດອ່ອນຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງຄາດຫມາຍສູ້ຊົນຂອງຄະນະຫນ່ວຍພັກ ຫນັງສືພິມ ປະຊາຊົນໃນ 5 ປີຕໍ່ຫນ້າຕື່ມອີກ.

ກອງປະຊຸມຄັ້ງນີ້ ຜູ້ແທນສົມບູນ ຍັງໄດ້ໃຊ້ສິດປະຊາ ທິປະໄຕຂອງຕົນປ່ອນບັດເລືອກຕັ້ງເອົາຄະນະພັກຮາກ ຖານຊຸດໃໝ່ ຊຶ່ງມີຜູ້ສະໝັກເລືອກຕັ້ງທັງໝົດ 7 ສະຫາຍ, ເລືອກເອົາ 5 ສະຫາຍ. ກອງປະຊຸມຄັ້ງປະຖົມມະລຶກຂອງໜ່ວຍໜັງສືພິມປະຊາຊົນ ຊຸດໃໝ່ ເຫັນດີເປັນເອກະພາບເລືອກເອົາ ສະຫາຍ ວັນໄຊ ຕະວິນ ຍານ ເປັນເລຂາ, ສະຫາຍ ສີວັນ ຫອມໄຊຍະເດດ ເປັນຮອງເລຂາ, ສະຫາຍ ພູວຽງຄໍາ ພົນອາສາ ເປັນປະທານກວດກາ, ສະຫາຍ ຕຸໄລເພັດ ພິມເມືອງ ແລະ ສະຫາຍ ນາງ ຈັນທະລາ ໄຊຍະເລັກ ເປັນຄະນະ

ກອງປະຊຸມຄັ້ງນີ້ ຍັງໄດ້ຮັບຟັງການໂອ້ລົມ ເພື່ອເປັນເຂັມຊີ້ທິດເຍືອງທາງຈາກ ສະຫາຍ ສະຫວັນຄອນ ຣາຊມຸນຕີ, ສະຫາຍໄດ້ເນັ້ນໜັກໃຫ້ໜ່ວຍພັກໜັງສືພິມຊຸດໃໝ່ ສືບຕໍ່ເອົາໃຈໃສ່ຊີ້ນໍາ-ນໍາພາ ປະຕິບັດ ໃຫ້ຖຶກຕ້ອງຕາມ 5 ຫຼັກການ, 3 ທິດນໍາຂອງພັກຢ່າງເຂັ້ມງວດ ເປັນຕົ້ນ ແມ່ນການເຮັດວຽກງານການເມືອງແນວຄິດຕໍ່ສະມາຊິກພັກ, ພະນັກງານໃຫ້ເຂົ້າໃຈເລິກເຊິ່ງເຖິງຖອງຕໍ່ແນວທາງຂອງພັກໃນໄລຍະໃໝ່. ເພີ່ມທະວີຄວາມສາມັກຄີພາຍໃນພັກພາຍໃນສໍານັກງານ ຕ້ອງກໍາແໜ້ນ 4 ລັກສະນະຂອງສື່ມວນຊົນຄື: ລັກສະນະຕົວຈິງ, ລັກສະນະສຶກສາອົບຮົມ, ລັກສະນະແນະນໍາ ແລະ ລັກສະນະຕໍ່ສູ້ ຕ້ອງກໍາຈຸດພິເສດຂອງໜັງສືພິມປະຊາຊົນໃຫ້ໄດ້ ສືບຕໍ່ສ້າງສະມາຊິກພັກໃຫ້ມີຄວາມເຂັ້ມແຂງ ມີຫຼັກໝັ້ນ ຢຶດໝັ້ນສັງຄົມນິຍົມຢ່າງສຸດກົກສຸດປາຍ