ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຜົນສໍາເລັດກອງປະຊຸໃຫຍ່ຄັ້ງທີ X ອົງຄະນະພັກແຂວງເຊກອງ

ກອງປະຊຸມໃຫຍ່ຄັ້ງທີ X ອົງຄະນະພັກແຂວງເຊກອງ ໄດ້ອັດລົງດ້ວຍຜົນສຳເລັດໃນວັນທີ 29 ກໍລະກົດ 2020 ພາຍຫລັງດໍາເນີນມາເປັນເວລາ 2 ວັນ.
ກອງປະຊຸມໄດ້ເປັນເອກະພາບກັນຮັບຮອງເອົາມະຕິກອງປະຊຸມໃຫຍ່ແຕ່ນີ້ຫາປີ 2025 ຕາມວິໄສທັດ 2030 ໂດຍການຍົກສູງກຳລັງແຮງພັດທະນາແຂວງເຊກອງໃຫ້ຫລຸດພົ້ນຈາກຄວາມທຸກຍາກ, ຮັບປະກັນການຜະລິດກະສິກຳສະອາດປອດສານພິດຕາມທິດສີຂຽວ ແລະ ຍືນຍົງ, ສົ່ງເສີມການລົງທຶນ, ພັດທະນາອຸດສາຫະກຳ, ການຄ້າ, ການທ່ອງທ່ຽວ ໃຫ້ໄດ້ຄຸນນະພາບ ຕິດພັນກັບການພັດທະນາສັງຄົມຕາມແລວທາງເສດຖະກິດຕາເວັນອອກ-ຕາເວັນຕົກ ຕອນໃຕ້ທີ່ສັ້ນທີ່ສຸດ. ຂະນະທີ່ຈຸດໝາຍລວມຮອດປີ 2025 ຈະສ້າງແຂວງໃຫ້ກາຍເປັນແຫລ່ງຜະລິດພະລັງງານໄຟຟ້າຂອງພາກໃຕ້, ຜະລິດກະສິກຳປອດສານພິດຕິດພັນກັບອຸດສາຫະກຳປຸງແຕ່ງ, ສ້າງໃຫ້ມີການຮ່ວມມືທາງເສດຖະກິດ, ການຄ້າ, ການລົງທຶນ, ການທ່ອງທ່ຽວ ແລະ ການບໍລິການຮ່ວມກັບບັນດາແຂວງພາກໃຕ້ລາວ ເຮັດໃຫ້ສັງຄົມສະຫງົບ ຍຸຕິທຳ, ປະຊາຊົນມີຄຸນນະພາບຊີວິດການເປັນຢູ່ທີ່ດີ.
ມະຕິກອງປະຊຸມໃຫຍ່ຄັ້ງທີ X ອົງຄະນະພັກແຂວງເຊກອງ ລະບຸແຈ້ງວ່າ:ພາຍຫລັງໄດ້ຄົ້ນຄວ້າຢ່າງເລິກເຊິ່ງ, ຜູ້ແທນກອງປະຊຸມໃຫຍ່ໄດ້ເປັນເອກະພາບກັນຮັບຮອງເອົາບົດລາຍງານການເມືອງອົງຄະນະພັກແຂວງຄັ້ງທີ IX ທີ່ບັນລຸຜົນງານພົ້ນເດັ່ນທັງໃນການປ້ອງກັນຊາດ-ປ້ອງກັນຄວາມສະຫງົບ, ການພັດທະນາເສດຖະກິດ-ສັງຄົມ, ການບູລະນະລະບົບອຳນາດແຫ່ງລັດ, ວັດທະນະທຳ-ສັງຄົມ, ແນວລາວສ້າງຊາດ, ອົງການຈັດຕັ້ງມະຫາຊົນຂອງພັກ, ວຽກງານຕ່າງປະເທດ ແລະ ການເຊື່ອມໂຍງສາກົນ, ການກໍ່ສ້າງພັກ-ພະນັກງານ ຊຶ່ງຜົນສຳເລັດ 5 ປີຜ່ານມາໄດ້ສ້າງພື້ນຖານ ແລະ ທ່ວງທ່າໃໝ່ໃຫ້ແກ່ການສືບຕໍ່ຂະຫຍາຍຕົວຂອງແຂວງໃຫ້ໄປຕາມທິດທາງ ແລະ ຈຸດໝາຍສັງຄົມນິ ຍົມ.ຂະນະດຽວກັນ ກໍ່ເຫັນວ່າຂໍ້ຂາດຕົກບົກພ່ອງໃນການຊີ້ນຳນຳພາຂອງອົງຄະນະພັກແຂວງເຮັດໃຫ້ການຈັດຕັ້ງປະຕິບັດວຽກງານຈຸດສຸມບາງດ້ານບໍ່ບັນລຸຕາມຄາດໝາຍທີ່ວາງໄວ້ ແລະ ເລັ່ງທວງໃຫ້ມີມາດຕະການທີ່ແທດເໝາະເພື່ອແກ້ໄຂຂໍ້ຂາດຕົກບົກພ່ອງທີ່ຜ່ານມາຢ່າງຈິງຈັງແນໃສ່ສ້າງການຫັນປ່ຽນໃໝ່ທີ່ຕັ້ງໜ້າຫລາຍຂຶ້ນໃນການຈັດຕັ້ງປະຕິບັດແນວທາງຂອງພັກຕໍ່ໜ້າ.
ກອງປະຊຸມໃຫຍ່ ໄດ້ເປັນເອກະພາບກັນເລືອກເອົາຄະນະບໍລິຫານງານພັກຊຸດໃໝ່ 33 ສະຫາຍ, ຍິງ 5 ສະ ຫາຍ ແລະ ກອງປະຊຸມຄັ້ງປະຖົມມະລຶກ ໄດ້ເປັນເອກະ ພາບກັນເລືອກເອົາ ສະຫາຍ ເຫລັກໄຫລ ສີວິໄລ ເປັນເລຂາພັກແຂວງ, ສະຫາຍນາງ ຈັນຫອມ ມະຫາໄຊ ແລະ ສະຫາຍ ດົງເພັດ ພະຍົນ ເປັນຮອງເລາຂາພັກແຂວງ, ສະຫາຍ ສົມນິດ ສີລິບຸນລຽງ ເປັນປະທານກວດກາພັກ. ຂະນະດຽວກັນ, ຜູ້ແທນກອງປະຊຸມໃຫຍ່ໄດ້ເປັນເອກະ ພາບກັນເລືອກເອົາຜູ້ແທນສົມບູນ 17 ສະຫາຍ ແລະ ຜູ້ ແທນສຳຮອງ 2 ສະຫາຍເພື່ອເຂົ້າຮ່ວມກອງປະຊຸມໃຫຍ່ຄັ້ງທີ XI ຂອງພັກ.

Cr: ລໍາເງິນ