ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມອື່ນໆທີ່ກ່ຽວຂ້ອງ ອັດລົງດ້ວຍຜົນສໍາເລັດອັນຈົບງາມໃນຕອນແລງວັນທີ 27 ກໍລະກົດ 2024 ພາຍຫລັງດຳເນີນມາເປັນເວລາ 4 ວັນ ໂດຍໄດ້ປຶກສາຫາລື ແລະຮັບຮອງຫລາຍບັນຫາສໍາຄັນ ເພື່ອເປັນພື້ນຖານອັນສໍາຄັນໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດອື່ນທີ່ກ່ຽວຂ້ອງ ທີ່ຈະຈັດຂຶ້ນໃນເດືອນຕຸລາ ທີ່ ນະຄອນຫຼວງວຽງຈັນ.
ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດລາວ ໄດ້ຖະແຫຼງຂ່າວຕໍ່ສື່ມວນຊົນທັງພາຍໃນ ແລະຕ່າງປະເທດກ່ຽວກັບຜົນສໍາເລັດຂອງກອງປະຊຸມໃນຄັ້ງນີ້ວ່າ: ກອງປະຊຸມລະດັບລັດຖະມົນຕີຕ່າງປະເທດ ແລະກອງປະຊຸມກ່ຽວຂ້ອງທັງໝົດ 25 ກອງປະຊຸມໄດ້ປຶກສາຫາລືແບບກົງໄປກົງມາໃນຫຼາຍຫົວຂໍ້ຢ່າງຮອບດ້ານ ແລະ ໄດ້ຮັບໝາກຜົນສູງ ໂດຍສະເພາະໄດ້ສະແດງຄວາມຍິນດີຕໍ່ຄວາມຄືບໜ້າໃນການຈັດຕັ້ງປະຕິບັດ 9 ບູລິມະສິດຂອງປະທານອາຊຽນປີ 2024, ຄວາມຄືບໜ້າໃນການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ການຮ່າງບັນດາແຜນຍຸດທະສາດ ເພື່ອຈັດຕັ້ງປະຕິບັດວິໄສທັດປະຊາຄົມອາຊຽນ 2045 ຊຶ່ງຈະຖືກຮັບຮອງເອົາໃນປີໜ້າ, ກ່ຽວກັບການປົກປັກຮັກສາພາກພື້ນອາຊີຕາເວັນອອກສຽງໃຕ້ໃຫ້ເປັນເຂດປອດອາວຸດນີວເຄຼຍ, ກອງປະຊຸມໄດ້ຢ້ຳຄືນຄວາມໝາຍໝັ້ນທີ່ຈະສືບຕໍ່ພົວພັນກັບບັນດາປະເທດທີ່ມີອາວຸດນິວເຄລຍຄອບຄອງ ເພື່ອຊຸກຍູ້ໃຫ້ບັນດາປະເທດດັ່ງກ່າວ ເຂົ້າຮ່ວມອານຸສັນຍາຂອງສົນທິສັນຍາເຂດປອດອາວຸດນິວເຄລຍອາຊີຕາເວັນອອກສຽງໃຕ້ໂດຍໄວ. ພ້ອມດຽວກັນນັ້ນຍັງໄດ້ຮັບຮອງເອົາການສະໝັກເຂົ້າເປັນພາຄີສົນທິສັນຍາເຂດປອດອາວຸດນິວເຄລຍອາຊີຕາເວັນອອກສຽງໃຕ້ຂອງ ຕີມໍແລັດສະເຕ. ປັດຈຸບັນແມ່ນຢູ່ໃນຂັ້ນຕອນການກະກຽມ ເພື່ອໃຫ້ຕີມໍແລັດສະເຕ ເຂົ້າເປັນພາຄີຂອງສົນທິສັນຍາດັ່ງກ່າວໂດຍໄວ.
ກອງປະຊຸມຍິນດີຕໍ່ກັບຄວາມຄືບໜ້າໃນການຈັດຕັ້ງປະຕິບັດແຜນງານສໍາລັບການເປັນສະມາຊິກສົມ ບູນອາຊຽນ ຂອງ ຕີມໍແລັດສະເຕ. ໃນໄລຍະກອງປະຊຸມຄັ້ງນີ້, ລັດຖະມົນຕີຕ່າງປະເທດຂອງ ຕີມໍແລັດສະເຕ ໄດ້ເຂົ້າຮ່ວມທຸກໆກອງປະຊຸມໃນຖານະປະເທດສັງເກດການ, ອາຊຽນມີຄວາມຍິນດີທີ່ຫຼາຍປະເທດນອກພາກພື້ນສະແດງຄວາມສົນໃຈເຂົ້າເປັນພາຄີຂອງສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສຽງໃຕ້ (TAC). ສົນທິສັນຍາດັ່ງກ່າວແມ່ນກົດແຫ່ງການປະພຶດອັນສຳຄັນສຳລັບການຮ່ວມມືລະຫວ່າງບັນດາປະເທດໃນພາກພື້ນ. ປັດຈຸບັນ, ສົນທິສັນຍາ TAC ມີພາຄີທັງໝົດ 54 ພາຄີ.ແລະ ຫວັງວ່າປະເທດ ອານເຊຣີ, ແຟງລັງ, ລຸກຊຳບວກ, ແອັດສະປາຍ, ແລະ ເມັກຊິກຈະເຂົ້າຮ່ວມລົງນາມສົນທິສັນຍາດັ່ງກ່າວໃນໄວໆນີ້.
ກອງປະຊຸມໄດ້ຢ້ຳຄືນຄວາມສຳຄັນຂອງການຮັດແໜ້ນຄວາມເປັນເອກະພາບ ແລະ ຄວາມເປັນແກນກາງຂອງອາຊຽນໃນການຮ່ວມມືກັບຄູ່ຮ່ວມພາຍນອກ, ໂດຍຜ່ານກົນໄກທີ່ອາຊຽນເປັນຜູ້ນຳພາເຊັ່ນ: ອາຊຽນບວກໜຶ່ງ, ອາຊຽນບວກສາມ, ກອງປະຊຸມສຸດຍອດອາຊີຕາເວັນອອກ, ກອງປະຊຸມເວທີພາກພື້ນອາຊຽນ ແລະ ກອງປະຊຸມລັດຖະມົນຕີປ້ອງກັນປະເທດອາຊຽນບວກ ເພື່ອສ້າງຄວາມໄວ້ເນື້ອເຊື່ອໃຈ ແລະ ເຊື່ອໝັ້ນເຊິ່ງກັນ ແລະ ກັນ ກໍຄືການເສີມສ້າງໂຄງສ້າງພາກພື້ນທີ່ເປີດກວ້າງ, ໂປ່ງໃສ, ເຂັ້ມແຂງ ແລະ ການມີສ່ວນຮ່ວມຂອງທຸກຝ່າຍໂດຍມີອາຊຽນເປັນແກນກາງ. ນອກຈາກນີ້ຍັງມີກອງປະຊຸມລັດຖະມົນຕີຕ່າງປະເທດອາຊຽນ ກັບລັດຖະມົນຕີຕ່າງປະເທດຂອງປະເທດຄູ່ເຈລະຈາອາຊຽນ ຈຳນວນ 11 ກອງປະຊຸມຄື: ອົດສະຕຣາລີ, ການາດາ, ຈີນ, ສະຫະພາບເອີຣົບ, ອິນເດຍ, ຍີ່ປຸ່ນ, ນູແວນເຊລັງ, ສ.ເກົາ ຫຼີ, ສະຫະພັນລັດເຊຍ, ສະຫະລັດອາເມຣິກາ ແລະອັງກິດ ໂດຍໄດ້ທວນຄືນຄວາມຄືບໜ້າໃນການຮ່ວມມືລະຫວ່າງອາຊຽນ ແລະ ແຕ່ລະປະເທດຄູ່ເຈລະຈາ ໃນຊຸມປີທີ່ຜ່ານມາ ແລະ ໄດ້ກຳນົດທິດທາງໃນຕໍ່ໜ້າສຳລັບການຮ່ວມມື ໂດຍມີເປົ້າໝາຍເພື່ອເພີ່ມທະວີການຮ່ວມມືຢ່າງໃກ້ຊິດໃນຂົງເຂດທີ່ມີທ່າແຮງເປັນຕົ້ນດ້ານການຄ້າ, ການລົງທຶນ, ການເຊື່ອມຈອດ, ຄວາມໝັ້ນຄົງທາງດ້ານສະບຽງອາຫານ ແລະ ພະ ລັງງານ, ຊາວໜຸ່ມ, ການທ່ອງທ່ຽວ ແລະ ການໄປມາຫາສູ່ລະຫວ່າງປະຊາຊົນ ແລະ ອື່ນໆ, ກອງປະຊຸມໄດ້ສະແດງຄວາມຊົມເຊີຍຕໍ່ຜົນສໍາເລັດຂອງກອງປະຊຸມສຸດຍອດພິເສດເພື່ອສະເຫຼີມສະຫຼອງການພົວພັນຮ່ວມມືອາຊຽນ-ອົດສະຕຣາລີ ຄົບຮອບ 50 ປີ, ຊຶ່ງໄດ້ຈັດຂຶ້ນທີ່ເມວເບີນ, ອົດສະຕຣາລີ ໃນເດືອນມີນາທີ່ຜ່ານມາ, ສະແດງຄວາມຊົມເຊີຍການຍົກລະດັບເປັນຄູ່ຮ່ວມມືຍຸດທະສາດຮອບດ້ານອາຊຽນ-ຍີ່ ປຸ່ນ ແລະ ຄູ່ຮ່ວມຍຸດທະສາດອາຊຽນ-ການາດາໃນປີທີ່ຜ່ານມາ, ເຫັນດີສະເຫຼີມສະຫຼອງຄົບຮອບ 35 ປີການພົວພັນຮ່ວມມືອາຊຽນ-ສ.ເກົາຫຼີໃນປີນີ້, ພ້ອມກັບການຍົກລະດັບເປັນຄູ່ມືຮ່ວມຍຸດທະສາດຮອບດ້ານໃນກອງປະຊຸມສຸດຍອດອາຊຽນຄັ້ງທີ 44 ແລະ 45 ແລະກອງປະຊຸມສຸດອື່ນໆທີ່ກ່ຽວຂ້ອງ ແລະເຫັນດີຈັດການສະເຫຼີມ ສະຫຼອງ ຄົບຮອບ 50 ປີ ແຫ່ງການພົວພັນຮ່ວມມືອາຊຽນ-ນິວຊີແລນໃນປີໜ້າ, ລວມທັງຈັດກອງປະຊຸມສຸດຍອດ ເພື່ອສະເຫຼີມສະຫຼອງການພົວ ພັນຮ່ວມມືດັ່ງກ່າວໃນປີ 2025.
ກອງປະຊຸມ ໄດ້ຮັບຮອງເອົາເອກະສານຜົນກອງປະຊຸມຫຼາຍສະບັບ ເປັນຕົ້ນແຜນປະຕິບັດງານເພື່ອຈັດຕັ້ງຜັນຂະຫຍາຍການເປັນຄູ່ຮ່ວມຍຸດທະສາດຮອບດ້ານອາຊຽນ-ອົດສະຕຣາລີ (2025-2029), ຖະແຫຼງການຮ່ວມລັດຖະມົນຕີຕ່າງປະເທດອາຊຽນ-ຈີນ ວ່າດ້ວຍການຮັດແໜ້ນການຮ່ວມມືດ້ານມະນຸດສະທໍາ ໃນການເກັບກູ້ລະເບີດ, ຖະແຫຼງການຮ່ວມລັດຖະມົນຕີຕ່າງປະເທດອາຊຽນ-ລັດເຊຍ ເພື່ອສະເຫຼີມສະຫຼອງການເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສຽງໃຕ້ຂອງລັດເຊຍ ຄົບຮອບ 20 ປີ, ຖະແຫຼງການຮ່ວມອາຊຽນ-ອັງກິດວ່າດ້ວຍ ການເພີ່ມທະວີການເຊື່ອມຈອດ ເພື່ອອະນາຄົດທີ່ໝັ້ນຄົງ ແລະຍືນຍົງ, ຖະແຫຼງການຜູ້ນໍາຮ່ວມອາຊຽນ-ສ.ເກົາຫຼີ ວ່າດ້ວຍການເປັນຄູ່ຮ່ວມຍຸດທະສາດຮອບດ້ານ, ສ່ວນກອງປະຊຸມສາມຝ່າຍ ລະຫວ່າງລາວ ໃນນາມປະທານອາຊຽນ, ກອງເລຂາອາຊຽນ ຮ່ວມກັບ ນອກແວ, ຕວັກກີ ແລະ ສະວິດ ເພື່ອທົບທວນຄືນການພົວພັນຮ່ວມມື ບັນດາລັດຖະມົນຕີຕ່າງປະເທດອາຊຽນ ໄດ້ພົບປະກັບບັນດາລັດຖະມົນຕີຕ່າງປະເທດບວກສາມຄື: ຈີນ, ຍີ່ປຸ່ນ ແລະ ສ.ເກົາຫຼີ ໃນໂອກາດກອງປະຊຸມລັດຖະມົນຕີຕ່າງປະເທດອາ ຊຽນບວກສາມ ຄັ້ງທີ 25. ກອງປະຊຸມດັ່ງກ່າວ ໄດ້ທົບທວນຄວາມຄືບໜ້າຂອງການຮ່ວມມື ແລະ ຢໍ້າຄືນຄວາມໝາຍໝັ້ນຮ່ວມກັນ ໃນການຮັດແໜ້ນກົນໄກການຮ່ວມມືອາຊຽນບວກສາມ ໃຫ້ເປັນກໍາລັງຂັບເຄື່ອນອັນສໍາຄັນ ໃນການສ້າງພາກພື້ນອາຊີຕາເວັນອອກ ໃຫ້ມີຄວາມເຂັ້ມແຂງໃນໄລຍະຍາວ. ບົນຈິດໃຈດັ່ງກ່າວ, ກອງປະຊຸມ ໄດ້ສະໜັບສະໜູນຂໍ້ສະເໜີຂອງລາວ ໃນການອອກຖະແຫຼງການຜູ້ນໍາອາຊຽນບວກສາມ ວ່າດ້ວຍການຮັດແໜ້ນການເຊື່ອມຈອດຕໍ່ການຮ່ວມມືລະບົບຕ່ອງໂສ້ການສະໜອງຂອງພາກພື້ນ ໃນກອງປະຊຸມສຸດຍອດອາຊຽນບວກສາມ ຄັ້ງທີ 27 ທີ່ຈະຈັດຂຶ້ນ ໃນເດືອນຕຸລາ 2024 ທີ່ ນະຄອນຫຼວງວຽງຈັນ. ສໍາລັບກອງປະຊຸມລັດຖະມົນຕີຕ່າງປະເທດຂອງກອງປະຊຸມສຸດຍອດອາຊີຕາເວັນອອກ ຄັ້ງທີ 14, ໄດ້ຢືນຢັນຄືນຄວາມໝາຍໝັ້ນຮ່ວມກັນ ເພື່ອສືບຕໍ່ຮັດແໜ້ນການຮ່ວມມືພາຍໃຕ້ຂອບກອງປະຊຸມສຸດຍອດອາຊີຕາເວັນອອກ ຫຼື ອີເອເອສ ໃນຖານະເປັນເວທີຂອງຜູ້ນໍາ ເພື່ອສົ່ງເສີມການປຶກສາຫາລື ແລະ ການຮ່ວມມືທີ່ສ້າງສັນກ່ຽວກັບບັນຫາທາງດ້ານຍຸດທະສາດ, ການເມືອງ ແລະ ເສດຖະກິດ ທີ່ມີຜົນປະໂຫຍດຮ່ວມກັນ ແນໃສ່ສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກທາງດ້ານເສດຖະກິດໃນຂົງເຂດອາຊີຕາເວັນອອກ. ກອງປະຊຸມໄດ້ສະໜັບສະໜູນຂໍ້ສະເໜີໃນການອອກຖະແຫຼງການຂອງຜູ້ນໍາກອງປະຊຸມສຸດຍອດອາຊີຕາເວັນອອກວ່າດ້ວຍການເພີ່ມທະວີການເຊື່ອມຈອດ ແລະ ຄວາມເຂັ້ມແຂງ ໃນໂອກາດກອງປະຊຸມສຸດຍອດອາຊີຕາເວັນອອກ ຄັ້ງທີ 19 ທີ່ຈະຈັດຂຶ້ນໃນເດືອນ ຕຸລາ 2024 ທີ່ ນະຄອນຫຼວງວຽງຈັນນີ້. ນອກຈາກນັ້ນອາຊຽນ ຍັງມີແຜນຈະຈັດກອງປະຊຸມປຶກສາຫາລືແນວຄວາມຄິດອາຊຽນ ວ່າດ້ວຍອິນໂດ-ປາຊີຟິກ: ກ້າວໄປສູ່ເປົ້າໝາຍການພັດທະນາແບບຍືນຍົງຂອງອົງການ ສປຊ 2030, ໃນວັນທີ 30 ສິງຫາ 2024, ທີ່ນະຄອນຫຼວງວຽງຈັນ. ນອກຈາກນີ້ບັນດາລັດຖະມົນຕີຕ່າງປະເທດ ຂອງເວທີພາກພື້ນອາຊຽນ ຫລືARF ຈາກ 27 ປະເທດ ໄດ້ພົບກັນໃນກອງປະຊຸມເວທີພາກພື້ນອາຊຽນຄັ້ງທີ 31. ໂດຍໄດ້ທົບທວນຄືນການຈັດຕັ້ງປະຕິບັດບັນດາກິດຈະກໍາກາງສະໄໝ ສໍາລັບສົກປີ 2023-2024 ແລະ ໄດ້ຮັບຮອງເອົາບັນຊີກິດຈະກໍາຂອງເວທີພາກພື້ນອາຊຽນທີ່ຈະຈັດຕັ້ງປະຕິບັດໃນສົກປີ 2024-2025. ໃນນີ້ສະມາຊິກເວທີພາກພື້ນອາຊຽນໄດ້ຢໍ້າຄືນຄວາມສໍາຄັນຂອງເວທີພາກພື້ນອາຊຽນໃນຖານະທີ່ເປັນເວທີທີ່ມີຄວາມກວມລວມ ສໍາລັບການປຶກສາຫາລືແບບສ້າງສັນ. ກອງປະຊຸມໄດ້ຮັບຮອງເອົາຖະແຫຼງການເວທີພາກພື້ນອາຊຽນ ວ່າດ້ວຍການຮັດແໜ້ນການຮ່ວມມືພາກພື້ນດ້ານຄວາມປອດໄພຂອງເຮືອກໍາປັ່ນ. ນອກຈາກນີ້ຍັງໄດ້ຈັດ 3 ກອງປະຊຸມລະດັບລັດຖະມົນຕີ ພາຍໃຕ້ຂອບການຮ່ວມມືແມ່ນໍ້າຂອງ ເປັນຕົ້ນກອງປະຊຸມລັດຖະມົນຕີຕ່າງປະເທດແມ່ນໍ້າຂອງ-ຍີ່ປຸ່ນ ຄັ້ງທີ 15, ກອງປະຊຸມລັດຖະມົນຕີີຕ່າງປະເທດແມ່ນໍ້າຂອງ-ສ.ເກົາຫຼີ ຄັ້ງທີ 12 ແລະກອງປະຊຸມລັດຖະມົນຕີຕ່າງ ປະເທດຂອບການຮ່ວມມືຄູ່ຮ່ວມແມ່ນໍ້າຂອງ-ສ.ອາເມລິກາຄັ້ງທີ 3.
ໃນກອງປະຊຸມລັດຖະມົນຕີຕ່າງປະເທດອາຊຽນ ຄັ້ງນີ້ຍັງໄດ້ການແລກປ່ຽນຄວາມຄິດເຫັນຢ່າງສ້າງສັນ ແລະ ກົງໄປກົງມາ ກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈ ແລະ ເປັນຫ່ວງຮ່ວມກັນ ເຊັ່ນ: ສະພາບການຢູ່ມຽນມາ, ແຫຼມເກົາຫຼີ, ທະເລຈີນໃຕ້, ອູແກຣນ ແລະຕາເວັນອອກກາງເປັນຕົ້ນ. ຊື່ງຜົນຂອງກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະກອງປະຊຸມອື່ນທີ່ກ່ຽວຂ້ອງ ຈະເປັນພື້ນຖານອັນສໍາຄັນ ໃຫ້ແກ່ຜົນສໍາເລັດຂອງກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດອື່ນທີ່ກ່ຽວຂ້ອງ ທີ່ຈະຈັດຂຶ້ນໃນເດືອນຕຸລາ ທີ່ນະຄອນຫຼວງວຽງຈັນ.
ໂອກາດນີ້ທ່ານ ສະເຫລີມໄຊ ກົມມະສິດ ຍັງໄດ້ສະແດງຄວາມຂອບໃຈຢ່າງຈິງໃຈມາຍັງບັນດາລັດຖະມົນຕີຕ່າງປະເທດ ແລະ ຫົວໜ້າຄະນະຜູ້ແທນ ຕໍ່ການຮ່ວມມືອັນດີ, ການປະກອບສ່ວນທີ່ຫ້າວຫັນ ແລະ ການປຶກສາຫາລືທີ່ສ້າງສັນ, ເຮັດໃຫ້ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມອື່ນທີ່ກ່ຽວຂ້ອງ ໄດ້ຮັບຜົນສໍາເລັດຢ່າງຈົບງາມ.
