ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຜົນສໍາເລັດຂອງການປຶກສາຫາລືດ້ານການເມືອງລະຫວ່າງ ກະຊວງການຕ່າງປະເທດແຫ່ງ ລາວ ແລະ ຣັດເຊຍ

ໃນລະຫວ່າງວັນທີ 3-4 ມີນາ 2020 ທີ່ ນະຄອນຫລວງ ມົດສະກູ, ສະຫະພັນຣັດເຊຍ, ໂດຍປະຕິບັດຕາມບົດບັນທຶກຄວາມເຂົ້າໃຈລະຫວ່າງ ກະຊວງການຕ່າງປະເທດ ສປປ ລາວ ແລະ ກະຊວງການຕ່າງປະເທດ ສ. ຣັດເຊຍ, ໄດ້ຈັດກອງປະຊຸມປຶກສາຫາລືດ້ານການເມືອງ ລະຫວ່າງ ສອງກະຊວງການຕ່າງປະເທດ ລາວ-ຣັດເຊຍ. ເຂົ້າຮ່ວມກອງປະຊຸມ, ຄະນະຜູ້ແທນຝ່າຍລາວ ນໍາໂດຍ ທ່ານ ທອງສະຫວັນ ພົມວິຫານ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ຄະນະຜູ້ແທນຝ່າຍ ຣັດເຊຍ ນໍາໂດຍ ທ່ານ ອີກໍຣ ມາກູລົບ (Igor Mogulov), ຮອງລັດຖະມົນຕີກະຊວງການຕ່າງປະເທດ ແຫ່ງ ສ. ຣັດເຊຍ. ໃນກອງປະຊຸມຄັ້ງນີ້, ສອງຝ່າຍ ໄດ້ປຶກສາຫາລື ແລະ ລົງເລິກແລກປ່ຽນບັນຫາການພົວພັນຮ່ວມມືສອງຝ່າຍຢ່າງຮອບດ້ານ ແລະ ຕີລາຄາການພົວພັນ ລາວ-ລັດເຊຍ ໃລຍະຜ່ານມາ ເຫັນວ່າມີທ່າອ່ຽງຂະຫຍາຍຕົວດີໃນທຸກດ້ານ, ຊຶ່ງໃນນັ້ນອັນພົ້ນເດັ່ນ ແມ່ນການແລກປ່ຽນການຢ້ຽມຢາມຂອງຄະນະຜູ້ແທນຂອງບັນດາຂະແໜງການຕ່າງໆ, ການຮ່ວມມືໃນຂົງເຂດເຕັກນິກການທະຫານ, ການເກັບກູ້ລະເບີດບໍ່ທັນແຕກຢູ່ ສປປ ລາວ, ການສ້າງຊັບພະຍາກອນມະນຸດ, ວຽກງານດ້ານມະນຸດສະທຳ, ດ້ານນິຕິກໍາ, ພະລັງງານ ແລະ ການຮ່ວມມືດ້ານວຽກງານສື່ມວນຊົນ. ນອກນັ້ນ, ສອງຝ່າຍ ຍັງໄດ້ເປັນເອກະພາບກັນ ກ່ຽວກັບທິດທາງ ເພື່ອສືບຕໍ່ຊຸກຍູ້ການຮ່ວມມືຂອງບັນດາຂະແໜງການໃຫ້ຫຼາຍຂຶ້ນ ກ່ວາເກົ່າ, ໃນນັ້ນ ອັນສຳຄັນແມ່ນ ຂົງເຂດເສດຖະກິດ-ການຄ້າ, ການລົງທຶນ, ຊຶ່ງຍັງເປັນຂົງເຂດທີ່ຍັງບໍ່ພົ້ນເດັ່ນ, ຊຸກຍູ້ການແລກປ່ຽນທາງດ້ານ ວັດທະນາທຳ-ສັງຄົມ, ການທ່ອງທ່ຽວ ແລະ ການໄປມາຫາສູ່ຂອງປະຊາຊົນສອງຊາດ.

ພ້ອມກັນນັ້ນ ຍັງໄດ້ແລກປ່ຽນທັດສະນະຮ່ວມກັນ ກ່ຽວກັບ ບັນຫາສາກົນທີ່ພົ້ນເດັ່ນ, ທີ່ຕ່າງຝ່າຍມີຄວາມສົນໃຈ ໃນຂອບການຮ່ວມມື ອາຊຽນ, ສະຫະປະຊາຊາດ ແລະ ການແຜ່ລະບາດຂອງພະຍາດໂຄວິດ-19. ສອງຝ່າຍ ເຫັນວ່າ ໃນປີ 2020 ເປັນປີທີ່ມີຄວາມໝາຍສໍາຄັນ ຕໍ່ການພົວພັນຮ່ວມມື ລາວ-ຣັດເຊຍ ໂດຍສະເພາະແມ່ນການກະກຽມສະເຫລີມສະຫລອງ 60 ປີ ສ້າງຕັ້ງສາຍພົວພັນການທູດ ແລະ ວັນສ້າງຕັ້ງສະມາຄົມມິດຕະພາບ ຣັດເຊຍ-ລາວ-ຣັດເຊຍ ຄົບຮອບ 55 ປີ, ລວມທັງການກະກຽມເຂົ້າຮ່ວມການສະເຫລີມສະຫລອງ 75 ປີ ແຫ່ງ ໄຊຊະນະປົກປ້ອງປິຕຸພູມ, ຊຶ່ງຈະຈັດຂຶ້ນ ໃນວັນທີ 9 ພຶດສະພາ 2020, ທີ່ນະຄອນຫລວງ ມົດສະກູ. ກອງປະຊຸມປຶກສາຫາລືທາງດ້ານການເມືອງຄັ້ງນີ້ ແມ່ນດໍາເນີນໄປດ້ວຍບັນຍາກາດອັນອົບອຸ່ນ, ສ້າງສັນ ແລະ ມີຄວາມເຂົ້າອົກເຂົ້າໃຈເຊິ່ງກັນ ແລະ ກັນ ຕໍ່ການພົວພັນຮ່ວມມືສອງຝ່າຍ ແລະ ຫລາຍຝ່າຍ. ສໍາລັບການຈັດກອງປະຊຸມປຶກສາຫາລືທາງດ້ານການເມືອງ ລະຫວ່າງສອງກະຊວງການຕ່າງປະເທດ ຄັ້ງຕໍ່ໄປ ແມ່ນຈະຈັດຂຶ້ນຢູ່ນະຄອນ ຫລວງວຽງຈັນ, ຊຶ່ງລາຍລະອຽດວັນເວລາແມ່ນຈະແຈ້ງໃຫ້ກັນຊາບໂດຍຜ່ານຊ່ອງທາງການທູດ.