ຜົນສໍາເລັດງານແລກປ່ຽນວັດທະນະທໍາ ລະຫວ່າງ ປະຊາຊົນຢູ່ຊາຍແດນ ລາວ-ຈີນ 2024

ກິດຈະກຳໃນງານແລກປ່ຽນວັດທະນະທໍາ ລະຫວ່າງ ປະຊາຊົນຢູ່ຊາຍແດນ ລາວ-ຈີນ ປະຈຳປີ 2024 ຈັດຂຶ້ນໃນລະຫວ່າງວັນທີ 20-22 ມິຖຸນານີ້ ທີ່ເມືອງຫລ້າ ກິ່ງແຂວງສິບສອງພັນນາ ແຂວງຢຸນນານ ສປ ຈີນ ເຊິ່ງມີຫລາຍກິດ ຈະກຳທີ່ໜ້າສົນໃຈ ແລະ ມີຄວາມໝາຍຄວາມສຳຄັນ.

ສະເພາະວັນທີ 21 ມິຖຸນານີ້ ໄດ້ມີພິທີເປີດງານວັດທະນະທໍາ ແລະ ທ່ອງທ່ຽວປ່າຝົນເຂດຮ້ອນຄັ້ງທໍາອິດ ທີ່ສະໜາມຫລວງວັດທະນະທໍາ. ຕາງໜ້າຝ່າຍລາວເຂົ້າ ຮ່ວມມີ ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້, ທ່ານ ປອງດອງ ປະຊາພັກດີ ກົງສຸນໃຫຍ່ ແຫ່ງ ສປປ ລາວ ປະຈຳນະຄອນຄຸນໝິງ ພ້ອມດ້ວຍການນຳຈາກແຂວງບໍ່ແກ້ວ, ຫລວງນໍ້າທາ, ຫລວງພະບາງ, ອຸດົມໄຊ ແລະ ຜົ້ງສາລີ. ຝ່າຍຈີນມີ ທ່ານ ຢຽນໝິງເຕົ້າ ຮອງຫົວໜ້າສະມາຄົມມິດຕະພາບກັບຕ່າງປະເທດ ແຂວງຢຸນນານ, ທ່ານ ຊຸນລູ້ ຮອງເຈົ້າກິ່ງແຂວງສິບສອງພັນນາ ພ້ອມດ້ວຍພາກສ່ວນກ່ຽວຂ້ອງ.

ທ່ານ ຈ່າງຊີຍຶ່ງ ເລຂາພັກເມືອງຫລ້າ ກ່າວວ່າ: ປະເທດຈີນ ກັບປະເທດລາວ ມີພູຮ່ວມສາຍ ແມ່ນໍ້າຮ່ວມຍອດ ສິ່ງແວດລ້ອມນິເວດເພິ່ງພາອາໄສກັນ “ປ່າຝົນເຂດ ຮ້ອນ” ແມ່ນເຮືອນຊານບ້ານສີຂຽວຂອງພວກເຮົາ ໃນເດືອນຕຸລາ 2023 ທ່ານ ສີຈິ້ນຜິງ ເລຂາທິການໃຫຍ່ ປະທານປະເທດຈີນ ແລະ ທ່ານ ທອງລຸນ ສີສຸດລິດ ເລຂາ ທິການໃຫຍ່ ປະທານປະເທດລາວ ໄດ້ຮ່ວມກັນລົງນາມ “ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳ ລາວ-ຈີນ” ອັນໃໝ່ ສອງຝ່າຍໄດ້ບັນລຸຄວາມເຫັນເປັນເອກະ ພາບກ່ຽວກັບການກໍ່ສ້າງສີວິໄລນິເວດ ແລະ ເອົາການຮ່ວມມືດ້ານສິ່ງແວດລ້ອມນິເວດ ເພື່ອສົ່ງເສີມຊີວິດການເປັນຢູ່ຂອງປະຊາຊົນທັງ ສອງປະເທດ.

ຈຸດປະສົງການຈັດງານວັດທະນະທຳ ແລະ ທ່ອງທ່ຽວປ່າໄມ້ຝົນເຂດຮ້ອນຄັ້ງທຳ ອິດນີ້ ເພື່ອປະຕິບັດຕາມຄວາມເປັນເອກະພາບກັນ ລະຫວ່າງຜູ້ນຳສູງສຸດຂອງສອງປະເທດ ໃຫ້ເຂົ້າສູ່ລວງເລິກ ຫັນຊັບພະຍາກອນປ່າຝົນເຂດຮ້ອນ ແລະ ທ່າແຮງດ້ານວັດທະນະທຳ ເຮັດໃຫ້ການແລກປ່ຽນ ແລະ ໄປ-ມາຫາສູ່ກັນລະຫວ່າງປະຊາຊົນບັນດາເຜົ່າ ຕາມຊາຍແດນ ລາວ-ຈີນ ເພີ່ມທະວີໄປອີກກ້າວໜຶ່ງ ຊຸກຍູ້-ສົ່ງເສີມການຮ່ວມ ມືດ້ານການຄ້າ ການທ່ອງທ່ຽວຂ້າມຊາຍແດນ ແລະ ອື່ນໆ ເພື່ອປະຕີບັດການພັດທະ ນາຮ່ວມກັນ ຕ່າງຝ່າຍຕ່າງມີຜົນປະໂຫຍດໃຫ້ປະກົດຜົນເປັນຈິງ.

ສຳລັບ “ປ່າຝົນເຂດຮ້ອນ” ກາຍທ່າແຮງທີ່ສຳຄັນໃນການທ່ອງທ່ຽວ, ຍ້ອນການອານຸລັກຮັກສາປ່າໄມ້, ສັດສາວາສິ່ງ ແລະ ສິ່ງແວດລ້ອມ ຄຽງຄູ່ໄປກັບ ການຮັກສາວັດທະນະທຳ, ຮີດຄອງປະເພນີ, ວິຖີຊີວິດທີ່ຕິດພັນກັບທຳມະຊາດ ຈຶ່ງກາຍເປັນສິ່ງດຶງດູດ ສ້າງມົນສະເໜ່ ແລະ ຄວາມປະທັບໃຈໃຫ້ແຂກນັກທ່ອງທ່ຽວ ຢາກມາຢ້ຽມ ຢາມທ່ຽວຊົມ ແລະ ຮຽນຮູ້, ສະເພາະປີ 2023 ຜ່ານມາ ມີນັກທ່ອງທ່ຽວຈາກຕ່າງປະ ເທດເຂົ້າມາທ່ຽວ ກິ່ງແຂວງສິບສອງພັນນາ ແຂວງຢຸນນານ ເຖິງ 6 ລ້ານ 6 ແສນ 5 ໝື່ນກວ່າຄົນ.

ຈຸດເດັ່ນຂອງເຂດນີ້ ແມ່ນມີຫລາກຫລາຍຊົນເຜົ່າຢູ່ຮ່ວມກັນ ລວມ 26 ຊົນເຜົ່າ ຈາກທັງໝົດ 56 ຊົນເຜົ່າໃນທົ່ວປະເທດຈີນ ໂດຍສະເພາະເຜົ່າໄຕລື້ ທີ່ມີສຽງປາກ ເວົ້າ, ວັດທະນະທຳການນຸ່ງຖື, ປະເພນີ ແລະ ວິຖິຊີວິດທີ່ເໝືອນກັບເຜົ່າໄຕລື້ຂອງລາວ, ອີກດ້ານໜຶ່ງທີ່ໜ້າສົນໃຈ ແມ່ນປ່າຝົນເຂດຮ້ອນ ເປັນໜຶ່ງໃນປ່າຝົນທີ່ອຸດົມສົມບູນທີ່ສຸດໃນໂລກ ມີເນື້ອທີ່ 121,000 ເຮັກຕ້າ, ມີຊີວະນາໆພັນທີ່ຫລາກຫລາຍ ພືດ 2 ໝື່ນກວ່າຊະນິດ ກວມ 1/6 ຂອງປະເທດ ແລະ ສັດ 2 ພັນກວ່າຊະນິດ ກວມ 1/4 ຂອງປະເທດ ໂດຍສະເພາະ ນົກ 400 ກວ່າຊະນິດ ແລະ ເປັນແຫ່ງດຽວຂອງປະ ເທດຈີນທີ່ມີຊ້າງປ່າອາໄສຢູ່ ຈົນໄດ້ສົມຍານາມວ່າ: ອານາຈັກຂອງສັດ ແລະ ພືດ ກາຍເປັນເມືອງແບບຢ່າງການກໍ່ສ້າງນິເວດສີວິໄລຂັ້ນແຂວງ. ນອກຈາກນີ້ ກໍມີພູຊາພັນປີພູເອີ 6 ແຫ່ງ, ໃນເມືອງຫລ້າ 5 ແຫ່ງ ກາຍເປັນພືດເສດຖະກິດ ສ້າງລາຍຮັບໃຫ້ປະຊາຊົນ.