ໃນໂອກາດທ່ານ ປະກອບຄໍາເຫັນຕໍ່ກອງປະຊຸມໃຫຍ່ຜູ້ ແທນກຳມະບານລາວ ທົ່ວປະເທດ ຄັ້ງທີ່ VIII ຈັດຂຶ້ນໃນວັນທີ 3-4 ທັນວາ 2020 ນີ້ ທ່ານ ໄຊພອນ ຖົມປະດິດ, ປະ ທານສະຫະພັນກໍາມະບານແຂວງ ອຸດົມໄຊ ໄດ້ປະກອບຄໍາເຫັນໃນຫົວຂໍ້ “ ການສຶກສາອົບຮົມການເມືອງ-ແນວຄິດ ໃຫ້ສະມາຊິກກຳມະບານ, ກຳມະກອນ ແລະ ຜູ້ອອກແຮງ ງານບັນດາເຜົ່າ ” ພາຍໃນແຂວງ ອຸດົມໄຊ. ທ່ານໄດ້ຍົກໃຫ້ເຫັນວ່າ: ຕະຫລອດໄລຍະ 5 ປີ ຜ່ານມາສະຫະພັນກຳມະ ບານແຂວງ ອຸດົມໄຊ ໄດ້ເປັນເຈົ້າການຊຸກຍູ້ການຈັດຕັ້ງກຳມະບານແຕ່ລະຂັ້ນໃນທົ່ວແຂວງ ຖືສຳຄັນວຽກງານໂຄ ສະນາສຶກສາອົບ ຮົມການເມືອງ-ແນວຄິດ, ໄດ້ນຳເອົາບັນ ດາຄາດໝາຍມະຕິກອງປະຊຸມໃຫຍ່ຜູ້ແທນກຳມະບານແຂວງ ຄັ້ງທີ VIII, ມະຕິກອງປະຊຸມໃຫຍ່ຜູແທນກຳມະ ບານລາວທົ່ວປະເທດ ຄັ້ງທີ VII ແລະ ມະຕິກອງປະຊຸມໃຫຍ່ຄັ້ງທີ VIII ອົງຄະນະພັກແຂວງໄປຈັດຕັ້ງເຜີຍແຜ່, ເຊື່ອມຊຶມໃຫ້ກຸ່ມເປົ້າໝາຍໃນຂອບເຂດຄວາມຮັບຜິດ ຊອບໄດ້ຮັບຮູ້ ແລະ ເຂົ້າໃຈ ທັງໝົດ 58 ຄັ້ງ, ມີຜູ້ເຂົ້າຮ່ວມ 78.712 ເທື່ອຄົນ, ນຳເອົາມູນເຊື້ອວັນສຳຄັນຂອງພັກ, ຂອງຊາດ, ບັນດານິຕິກຳຕ່າງໆ ທີ່ກ່ຽວຂ້ອງໄປເຜີຍແຜ່ຢູ່ບັນດາຫົວໜ່ວຍທຸລະກິດ ແລະ ກຸ່ມປູກກ້ວຍ ທັງໝົດ 48 ຄັ້ງ ມີຜູ້ເຂົ້າຮ່ວມທັງໝົດ 16,432 ເທື່ອຄົນ. ສຳເລັດການສ້າງເປັນປຶ້ມປະຫວັດມູນເຊື້ອການເຕີບໃຫຍ່ຂະຫຍາຍຕົວຂອງສະຫະພັນກຳມະບານແຂວງອຸດົມໄຊ ຄົບຮອບ 40 ປີ ແຈກຢາຍໃຫ້ບັນດາເມືອງ ແລະ ຮາກຖານອ້ອມຂ້າງແຂວງ ຈໍານວນ 658 ຫົວ ແລະ ຈັດພິທີສະ ເຫຼີມສະຫຼອງໃຫຍ່ວັນສ້າງຕັ້ງສະຫະພັນກຳມະບານແຂວງ ຄົບຮອບ 40 ປີ ຕິດພັນກັບຂະບວນການບໍລິຈາກເລືອດຊ່ວຍເຫຼືອສັງຄົມ, ພ້ອມນີ້ ໄດ້ເອົາໃຈໃສ່ພັດທະນາວຽກງານສື່ມວນຊົນຂອງຕົນໃຫ້ມີບາດກ້າວໃໝ່ກາຍເປັນກະບອກສຽງສຳຄັນໃນການໂຄສະນາ, ເຜີຍແຜ່ແນວທາງຂອງພັກ, ນະໂຍບາຍຂອງລັດ ແລະ ການເຄື່ອນໄຫວຂອງກຳມະບານໃຫ້ສັງຄົມໄດ້ຮັບຮູ້ຢ່າງທົ່ວເຖິງ. ກໍ່ສ້າງພະນັກງານຂ່າວສານດ້ວຍຫຼາຍຮູບ ແລະ ຍົກລະດັບການເກັບກຳຂ່າວ, ຂຽນຂ່າວ ແລະ ສົ່ງຂ່າວແບບທັນສະໄໝ,ຈັດລາຍ ການວິທະຍຸ “ເພື່ອນຊາວຜູ້ອອກແຮງງານ” ຢູ່ສະຖານີວິທະຍຸກະຈາຍສຽງຂອງແຂວງດ້ວຍຕົນເອງທຸກໆເຊົ້າຂອງວັນພຸດ ເວລາ 7:30-8:00 ນາທີ ແລະ ອື່ນຯ.
ທ່ານ ໄຊພອນ ຖົມປະດິດ ຍົກໃຫ້ເຫັນຕື່ມວ່າ: ຜ່ານຂະບວນການດັ່ງກ່າວ ເຫັນໄດ້ວ່າຖັນແຖວພະນັກງານ, ສະ ມາຊິກກຳມະບານ, ກຳມະກອນ ແລະ ຜູ້ອອກແຮງງານບັນດາເຜົ່າໃນທົ່ວແຂວງມີແນວຄິດໜັກແໜ້ນໂດຍພື້ນ ຖານເຊື່ອໝັ້ນຕໍ່ການນຳພາຂອງພັກ, ເສີມຂະຫຍາຍໄດ້ມູນເຊືອຄວາມສາມັກຄີປອງດອງຂອງປະຊາຊົນບັນດາເຜົ່າ, ເຊີດຊູຈິດໃຈຮັກຊາດ, ຍົກສູງຄວາມເປັນເຈົ້າຕົນເອງ, ເພິ່ງຕົນເອງ,ສ້າງຄວາມເຂັ້ມແຂງດ້ວຍຕົນເອງປະກອບສ່ວນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງລັດ ກໍ່ຄືຂອງແຂວງວາງອອກຢ່າງເປັນເຈົ້າການ ແລະ ມີຜົນສຳເລັດຕາມລະດັບຄາດໝາຍ. ສະແດງອອກໃນໄລຍະ 5 ປີຜ່ານມາໂດຍລວມແຂວງອຸດົມໄຊ ມີສະຖຽນລະພາບທາງດ້ານການ ເມືອງ,ສັງຄົມມີຄວາມສະຫງົບ, ເປັນລະບຽບຮຽບຮ້ອຍໂດຍພື້ນຖານ,ເສດຖະກິດຂອງແຂວງໄດ້ສືບຕໍ່ຂະຫຍາຍຕົວສະເລ່ຍ ໃນລະດັບ 8.5% ຕໍ່ປີ, ລາຍຮັບສະເລ່ຍໃສ່ຫົວຄົນໜຶ່ງບັນລຸ 1.750 ໂດລາສະຫະລັດ, ບັນດາພື້ນຖານໂຄ່ງລ່າງຂອງແຂວງໄດ້ຮັບການພັດທະນາຢ່າງຕໍ່ເນື່ອງ, ຊີວິດການເປັນຢູ່ຂອງພະນັກງານ, ສະມາຊິກກຳມະບານ, ກຳມະກອນ ແລະ ຜູ້ອອກແຮງງານບັນດາເຜົ່າໄດ້ຮັບການປັບປຸງປົວແປງດີຂຶ້ນເປັນກ້າວໆ ມາ.
ຢ່າງໃດກໍ່ຕາມ ຄຽງຄູ່ກັບຜົນງານ ທີ່ຍາດມາ ແມ່ນປາ ສະຈາກບໍ່ໄດ້ດ້ານອ່ອນຂໍ້ຄົງຄ້າງບາງດ້ານທີ່ຕ້ອງໄດ້ສືບຕໍ່ປັບປຸງແກ້ໄຂໃຫ້ດີຂຶ້ນ ເປັນຕົ້ນແມ່ນ: ການສຶກສາອົບຮົມ-ການເມືອງແນວຄິດພວກເຮົາຍັງເຮັດບໍ່ເປັນລະບົບຕໍ່ເນື່ອງທົ່ວເຖິງ, ວິທີການ, ຮູບການຍັງບໍ່ທັນຫຼາກຫຼາຍເຮັດໃຫ້ຄວາມຮັບຮູ້ເຂົ້າໃຈຂອງພະນັກງານ, ສະມາຊິກກຳມະ ບານ, ກຳມະກອນ ແລະ ຜູ້ອອກແຮງງານຈຳນວນໜຶ່ງຕໍ່ແນວທາງນະໂຍບາຍຂອງພັກຍັງບໍ່ເລິກເຊິ່ງ, ການປ່ຽນ ແປງທາງດ້ານຈິນຕະນາການຍັງຊັກຊ້າ, ຄວາມບຸກບືນອົດ ທົນມີໜ້ອຍ, ຫົວຄິດປະດິດສ້າງຍັງບໍ່ທັນສູງ, ຄວາມຮູ້, ຄວາມສາມາດຂອງພະນັກງານກຳມະບານອາຊີບພວກເຮົາຍັງມີຂໍ້ຈຳກັດຫຼາຍດ້ານ, ການສະໜອງວັດຖຸອຸປະກອນ ແລະ ງົບປະມານຍັງຂາດເຂີນບໍ່ພຽງພໍ ແລະ ອື່ນຯ.
ສໍາລັບແຂວງອຸດົມໄຊ ປະກອບມີ 8 ສະຫະພັນກຳມະ ບານ, ໃນນັ້ນ ມີ 7 ສະຫະພັນກຳມະບານເມືອງ ແລະ 1 ສະຫະພັນກຳມະບານພະແນກ ຄື: ພະແນກກະສິກຳ ແລະ ປ່າໄມ້ແຂວງ; ມີຄະນະບໍລິຫານງານສະຫະພັນກຳມະ ບານແຂວງ 27 ຄົນ, ຍິງ 6 ຄົນ, ມີພະນັກງານກຳມະ ບານອາຊີບ 71 ຄົນ, ຍິງ 26 ຄົນ, ໃນນັ້ນຂັ້ນແຂວງ ມີ 21 ຄໄນ, ຍິງ 7 ຄົນ, ຂັ້ນເມືອງມີ 50 ຄົນ, ຍິງ 19 ຄົນ; ມີສະມາຊິກກຳມະບານທັງໝົດ 9,580 ຄົນ, ຍິງ 3,800 ຄົນ, ມີ 488 ຮາກຖານ.
Loading...