ຜົນສໍາເລັດໃນການເປັນເຈົ້າພາບຈັດກອງປະຊຸມຫົວໜ້າສືບຂ່າວທະຫານອາຊຽນຄັ້ງທີ 21

ໃນວັນທີ 3 ກັນຍາ 2024, ທ່ານ ພົນຈັດຕະວາ ບົວວັນ ອາດຖະໜາໄຊ ຫົວໜ້າກົມ 213 ກອງທັບປະຊາຊົນລາວ ໄດ້ຖະແຫຼງ ຂ່າວຜົນສໍາເລັດໃນການເປັນເຈົ້າພາບຈັດກອງປະຊຸມຫົວໜ້າສືບຂ່າວທະຫານອາຊຽນຄັ້ງທີ 21 ທີ່ນະຄອນຫຼວງວຽງຈັນ, ສປປ ລາວ ໃນລະຫວ່າງວັນທີ 1-4 ກັນຍາ 2024, ເຊິ່ງມີຫົວໜ້າກົມສືບຂ່າວຂອງ 10 ປະເທດອາຊຽນ ພ້ອມຄະນະຜູ້ແທນ ແລະ ຕີມໍແລັດສະເຕ ໃນນາມເປັນປະເທດສັງເກດການ ເຂົ້າຮ່ວມ.

ທ່ານກ່າວວ່າ: ກອງປະຊຸມດັ່ງກ່າວ ໄດ້ດໍາເນີນ ພາຍໃຕ້ຄໍາຂັວນ: “ຮ່ວມມືກັນເພື່ອ ສັນຕິພາບ, ຄວາມໝັ້ນຄົງ ແລະ ຄວາມເຂັ້ມ ແຂງຂອງອາຊຽນ”, ກອງປະຊຸມຄັ້ງນີ້ ໄດ້ສັງເກດຕີລາຄາ ແລະ ແລກປ່ຽນທັດສະນະ ກ່ຽວກັບສະພາບການທີ່ພົ້ນເດັ່ນໃນພາກ ພື້ນ ແລະ ການພົວພັນຮ່ວມມືວຽກງານປ້ອງກັນຊາດຂອງອາ ຊຽນ, ໂດຍສະເພາະ ວຽກງານສືບຂ່າວທະຫານອາຊຽນ, ການ ແລກປ່ຽນຂໍ້ມູນ-ຂ່າວ ແລະ ອື່ນໆ ເພື່ອສືບຕໍ່ເພີ່ມທະວີຂີດຄວາມສາມາດ, ຄວາມເຊື່ອໝັ້ນ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ ລະຫວ່າງ ທະຫານສືບຂ່າວຂອງກອງທັບບັນດາປະເທດສະມາຊິກອາຊຽນ ໃນການຮັບມືກັບສິ່ງທ້າທາຍທີ່ພົ້ນເດັ່ນຕໍ່ຄວາມໝັ້ນຄົງ ແລະ ເພື່ອເປັນການປະກອບສ່ວນເຂົ້າໃນການປົກປັກຮັກສາ ສັນຕິພາບ, ຄວາມໝັ້ນຄົງ ແລະ ການພັດທະນາເສດຖະກິດ-ສັງຄົມຂອງພາກພື້ນ,ກອງປະຊຸມຍັງໄດ້ປຶກສາຫາລື ແລະ ເຫັນດີເປັນເອກະພາບຕໍ່ຮ່າງຖະແຫລງການ ຮ່ວມຂອງກອງປະຊຸມຜູ້ບັນຊາການທະຫານສູງສຸດອາຊຽນ ຄັ້ງທີ 21 ແລະ ບັນຫາອື່ນໆທີ່ກ່ຽວຂ້ອງ, ເຊິ່ງເປັນພື້ນຖານອັນສໍາຄັນໃຫ້ແກ່ການສືບຕໍ່ຈັດຕັ້ງປະຕິບັດບັນດາແຜນງານການ ຮ່ວມມືຂອງທະຫານອາຊຽນ, ພ້ອມດຽວກັນນີ້ ກອງປະຊຸມ ຍັງໄດ້ມອບໂອນການເປັນປະທານກອງປະຊຸມຫົວໜ້າຫົວໜ້າສືບຂ່າວທະຫານອາຊຽນ ຄັ້ງທີ 22 ໃຫ້ແກ່ກອງທັບຂອງມາເລເຊຍ ສືບຕໍ່ເປັນປະທານ ໃນປີ 2025.

ກອງປະຊຸມຫົວໜ້າຫົວໜ້າສືບຂ່າວທະຫານອາຊຽນ ຄັ້ງທີ 21 ໄດ້ດໍາເນີນໄປດ້ວຍບັນຍາກາດທີ່ສ້າງສັນ ແລະ ມີເນື້ອໃນຄົບຖ້ວນ, ເຊິ່ງເຮັດໃຫ້ກອງປະຊຸມຄັ້ງນີ້ ປະສົບຜົນສໍາເລັດຕາມລະດັບຄາດໝາຍ.

ທີ່ມາ: ໜັງສືພິມກອງທັບ