ອີງຕາມຂໍ້ມູນຈາກກອງປະຊຸມສ່ອງແສງລາຍງານສະພາບນໍ້າຖ້ວມພາຍໃນ ເມືອງຄູນຄໍາ ແຂວງຄຳມ່ວນ ຈັດຂຶ້ນໃນວັນທີ 27 ກໍລະກົດ 2024 ໂດຍການເປັນປະທານຂອງທ່ານ ແກ້ວວິໄລ ໄຊຍະບຸດ ເຈົ້າ ເມືອງຄູນຄໍາ ແຂວງຄຳມ່ວນ ໃຫ້ຮູ້ວ່າ:
ເມືອງຄູນຄໍາ ໄດ້ຮັບຜົນກະທົບຈາກພາຍຸໝຸນເຂດຮ້ອນ ພຣະພິຣຸນ ແລະ ພາຍຸດີເປຣຊັນ ເຮັດໃຫ້ຝົນຕົກໜັກຕິດຕໍ່ກັນຫລາຍວັນ ເຮັດໃຫ້ຫລາຍຈຸດຖືກນໍ້າຖ້ວມຂັງ ແລະ ໄຫລເຂົ້າຖ້ວມເນື້ອທີ່ທຳການຜະລິດຂອງປະຊາຊົນໃນແຕ່ລະເຂດ ເປັນ ຕົ້ນ ເຂດບ້ານພູຊາດ-ນາພວກເກົ່າ ຫາ ບ້ານມ່ວງນໍ້າສາງ, ນໍ້າໄດ້ໄຫລເຂົ້າຖ້ວມເນື້ອທີ່ນາປີ ຈຳນວນ 162 ເຮັກຕາ, ສວນມັນຕົ້ນ 48 ເຮັກຕາ, ເຂດບ້ານມ່ວງນໍ້າສາງ ຫາ ບ້ານຄູນມະນີ (ຄຸ້ມນາຊ້າງຂ້າມເກົ່າ) ນໍ້າຖ້ວມເນື້ອທີ່ນາປີ 496 ເຮັກຕາ, ສວນມັນຕົ້ນ 20 ເຮັກຕາ, ເຂດບ້ານນາຄໍາ-ນາກາງ ຫາ ບ້ານໂພນແຍງ ນໍ້າຖ້ວມນາປີ 347 ເຮັກຕາ, ສວນມັນຕົ້ນ 20 ເຮັກຕາ ແລະ ພືດຜັກອື່ນໆ 40 ເຮັກຕາ, ເຂດບ້ານພູໝາກແໜ່ງ, ບ້ານຜາຊ້າງມີນໍ້າຖ້ວມນາປີ 117,5 ເຮັກຕາ, ສວນມັນຕົ້ນ 6,5 ເຮັກຕາ ແລະ ສວນຢາງພາລາ 7,5 ເຮັກຕາ.
ສຳລັບການສັນຈອນເສັ້ນທາງຄູນຄໍາ ຫາ ກອງລໍ ຈຸດບ້ານນາຄຳ ຫາ ນາກາງ 4 ກິໂລແມັດ ລົດ 4 ລໍ້ ບໍ່ສາມາດທຽວໄດ້, ການສັນຈອນປັດຈຸບັນແມ່ນນຳໃຊ້ເຮືອຫາງຍາວ, ເສັ້ນທາງເລກ 8 A ຈຸດເທິງພູໄຮ ດິນເຈື່ອນມາຖົມທາງຈຸດພູເຈື່ອນເກົ່າ ແລະ ຈຸດໃໝ່ ກິໂລແມັດທີ 46+350 ແລະ ກິໂລແມັດທີ 48+700 ປັດຈຸບັນລົດສາມາດທຽວໄດ້ປົກກະຕິ, ປັດຈຸບັນລະດັບນໍ້າຫີນບູນຕອນເທິງແມ່ນໄດ້ຄ່ອຍໆຫລຸດລົງ, ຖ້າຝົນຫາກຕົກຄ່ອຍ ແລະ ຢຸດຕົກເຂດທີ່ນໍ້າຖ້ວມຂັງອາດຈະຫລຸດລົງເຊັ່ນກັນ.
ຜ່ານການລົງຕິດຕາມກວດກາ ແລະ ໄດ້ປະເມີນເບື້ອງຕົ້ນ ເຫັນວ່າທົ່ວເມືອງຄູນຄໍາ ຖືກນໍ້າຖ້ວມນາປີ ທັງໝົດ ຈຳນວນ 1,097 ເຮັກຕາ, ສວນມັນຕົ້ນ 88 ເຮັກຕາ ແລະ ສວນພືດອື່ນໆ 40 ເຮັກຕາ ພ້ອມນັ້ນ, ຍັງໄດ້ຮັບຟັງການລາຍງານສະພາບນໍ້າ ຖ້ວມໃນ 4 ເຂດພັດທະນາທົ່ວເມືອງ ແລະ ການກຽມຄວາມພ້ອມຮັບມືຈາກຂະແໜງການກ່ຽວຂ້ອງດ້ວຍຄວາມຮັບຜິດ ຊອບສູງ.
ຂ່າວ: ລັດສະໝີ ຈູມໂພຄໍາ, ພາບ: ວັນລະຄານ ໄຊຍະລາດ
