ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຜົ້ງສາລີ ຈະສົ່ງ 8 ປະເພດກິລາເຂົ້້າຊິງໄຊ ໃນງານມະຫາກຳກິລາ ແຫ່ງຊາດ ຄັ້ງທີ XI ທີ່ຊຽງຂວາງເກມ:

ອີງຕາມການລາຍງານຂອງທ່ານ ສີສຸພັນ ທຸມມາລາ, ຫົວໜ້າຂະແໜງກີລາລະດັບສູງ, ພະແນກສຶກສາທິການ ແລະ ກິລາແຂວງຜົ້ງສາລີ ທີ່ເປັນພະແນກຮັບຜິດຊອບໂດຍກົງ ການກະກຽມເຂົ້າຮ່ວມງານມະຫາກຳກິລາແຫ່ງຊາດ ຄັ້ງທີ XI ເຊິ່ງຈະຈັດຂຶ້ນທີ່ແຂວງຊຽງຂວາງ ໃນລະຫວ່າງວັນທີ 22 ມີນາ ຫາ 1 ເມສາ 2020 ໃຫ້ຮັບຮູ້ວ່າ: “ແຂວງຜົ້ງສາລີ ໄດ້ກະກຽມ 8 ປະເພດກິລາເພື່ອສົ່ງເຂົ້າຮ່ວມແຂ່ງຂັນໃນງານມະຫາກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ. ການຄັດເລືອກນັກກິລາ ແລະ ການຝຶກຊ້ອມ ແມ່ນໄດ້ເລີ່ມມາຕັ້ງແຕ່ເດືອນ ກັນຍາ 2019, ໂດຍທຸກປະເພດກິລາທີ່ຈະສົ່ງເຂົ້າຊິງໄຊ ແມ່ນມີຄວາມຫວັງວ່າຈະສາມາດຍາດຜົນງານດີທີ່ສຸດມາຝາກພີ່ນ້ອງຊາວຜົ້ງສາລີ”. ປະເພດກີລາທັງ 8 ປະກອບມີ: ເຕະບານ, ຊ່ວງເຮືອ, ແລ່ນ ແລະ ລານ, ຫມາກຂ່າງ, ຫມາກແລ້, ຫນ້າເກັກ, ເປຕັງ ແລະ ຍິງປືນ. ຄືດັ່ງທີ່ຮູ້ນຳກັນ, ງານມະຫາກໍາກິລາແຫ່ງຊາດ ຄັ້ງທີ XI ທີ່ແຂວງ ຊຽງຂວາງໃນຄັ້ງນີ້ ແມ່ນຈະຈັດຂຶ້ນຢ່າງເປັນທາງການ ພ້ອມໆກັບການສະເຫລີມສະຫລອງວັນສ້າງຕັ້ງພັກປະຊາຊົນປະຕິວັດລາວ ວັນທີ 22 ມີນາ ຄົບຮອບ 65 ປີ ແລະ ການສະເຫລີມສະຫລອງທົ່ງໄຫຫີນແຂວງ ຊຽງຂວາງ ເຂົ້າເປັນມໍລະດົກໂລກ. ພາກສ່ວນຕ່າງໆທີ່ໄດ້ແຈ້ງເຂົ້າຮ່ວມງານມະຫາກຳຊຽງຂວາງເກມໃນຄັ້ງນີ້ແລ້ວ ປະກອບດ້ວຍ: ທັງ 18 ແຂວງ ແລະ ໜຶ່ງນະຄອນຫຼວງວຽງຈັນທົ່ວປະເທດ, ພ້ອມດ້ວຍ ອີກ 4 ກະຊວງ ແລະ 1 ອົງການມະຫາຊົນ, ໂດຍຈະມີແຂ່ງຂັນທັງໝົດ 28 ປະເພດກິລາ ຄື: ແລ່ນ ແລະ ລານ, ເຕະບານ, ບານບ້ວງ, ບານສົ່ງ-ບານສົ່ງຫາດຊາຍ, ກະຕໍ້-ຊິນລອນ, ເຕັນນິສ, ປິງປ໋ອງ, ເປຕັງ, ດອກປີກໄກ່, ລອຍນ້ຳ, ຍິງປືນ, ເທັກຄວັນໂດ, ວູຊູ, ປັນຈັກສີລັດ, ຢູໂດ, ກາຣາເຕໂດ, ມວຍສາກົນ, ມວຍປ້ຳ, ມວຍລາວ, ຊ່ວງເຮືອ, ກ໊ອຟ, ໝາກເສິກ, ໜ້າເກັກ-ຍິງທະນູ, ໝາກແລ້, ລົດຖີບ, ໂບລິ້ງ ແລະ ສະນຸກເກີ້, ພ້ອມດ້ວຍ ອີກ 1 ກິລາສາທິດຄື: ຣັກບີ້.

ຂ່າວ: ສົມຄິດ ແກ້ວນວນລາ