ພະແນກຊັບພະຍາກທຳມະຊາດ ແລະ ສິ່ງແວດລ້ອມ ແຂວງຜົ້ງສາລີ ຮ່ວມກັບ ໂຄງການສ້າງຄວາມທົນທານ ໃນການປັບຕົວເຂົ້າກັບການປ່ຽນແປງດິນຟ້າອາກາດ ໂດຍອີງໃສ່ລະບົບນິເວດ ໃນຂົງເຂດຕົວເມືອງ (EbA) ຈັດກິດຈະກຳປູກເບ້ຍໄມ້ເຂດຍອດນໍ້າ ບ້ານແສນສາລີ ແລະ ອ້ອມໜອງຂຽວ (ເທສະບານ) ເມືອງຜົ້ງສາລີ ໃນວັນທີ 6 ສິງຫາ 2024 ເພື່ອສົ່ງເສີມ-ຟື້ນຟູລະບົບນິເວດໜອງຂຽວ, ຟື້ນຟູພື້ນທີ່ເຊາະເຈື່ອນ ແລະ ສ້າງອ່າງເກັບນໍ້າປະປາ ບ້ານແສນສາລີ ທັງນີ້ກໍເພື່ອແນໃສ່ປັບປຸງຊີວິດການເປັນຢູ່ຂອງປະຊາຊົນ ໃນເມືອງຜົ້ງສາລີ ໂດຍມີທ່ານ ເດດ ຍັນຊະນະ ຮອງຫົວໜ້າພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມແຂວງຜົ້ງສາລີ, ທ່ານ ຕາວັນ ກິດຕິພອນ ຫົວໜ້າພະແນກປັບຕົວ, ກົມຄຸ້ມຄອງການປ່ຽນແປງດິນຟ້າອາກາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ທ່ານ ສົມຕຸ້ຍ ພົມມະວົງໄຊ ຮອງຫົວໜ້າພະແນກ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງຜົ້ງສາລີ ພ້ອມດ້ວຍອົງການຈັດຕັ້ງບ້ານແສນສາລີ ແລະ ພະນັກງານເຂົ້າຮ່ວມ.
ເບ້ຍໄມ້ທີ່ນຳມາປູກໃນຄັ້ງນີ້ ມີ 200 ກວ່າເບ້ຍ ໃນນີ້, ມີເບ້ຍດອກຄຳ, ເບ້ຍສົ້ມຝາດ ແລະ ເບ້ຍໝາກລີ້ນໄມ້, ຊຶ່ງໄດ້ການສະໜັບສະໜູນຈາກໂຄງການສ້າງຄວາມທົນທານ ໃນການປັບຕົວເຂົ້າກັບການປ່ຽນແປງດິນຟ້າອາກາດ ໂດຍອີງໃສ່ລະບົບນິເວດ ໃນຂົງເຂດຕົວເມືອງ. ນອກນີ້, ຍັງໄດ້ປູກດອກໄມ້ປະດັບເສັ້ນທາງຍ່າງ, ປະດັບປະດາໂຄມໄຟແຫລ່ງທ່ອງທ່ຽວເຂດຕົວເມືອງເກົ່າ ໂດຍເປັນໂຄງການຍ່ອຍພາຍໃຕ້ ການສະໜັບສະໜູນຈາກໂຄງການ EbA ຊຶ່ງຮັບທຶນຊ່ວຍເຫລືອລ້າ ຈາກອົງການສະຫະປະຊາຊາດ ເພື່ອສິ່ງແວດລ້ອມ.
ຂ່າວ-ພາບ: ສົມຄິດ
