ສະຖິຕິການຊົມໃຊ້ໄຟຟ້າ ທົ່ວແຂວງຜົ້ງສາລີ ມີ 7 ເມືອງ, 58 ກຸ່ມບ້ານ, 503 ບ້ານ, 37.246 ຄົວເຮືອນ, ມາຮອດປັດຈຸບັນບ້ານທີ່ໄດ້ຊົມໃຊ້ໄຟຟ້າ ລວມມີ 361 ບ້ານກວມເອົາ 71,77% ຂອງບ້ານທັງໝົດໃນທົ່ວແຂວງ, ຄົວເຮືອນທີ່ໄດ້ຊົມໃຊ້ໄຟຟ້າ 25.079 ຄົວເຮືອນ ກວມເອົາ 67,33% ຂອງຄົວເຮືອນທັງໝົດໃນທົ່ວແຂວງ, ທຽບໃສ່ແຜນການ 5 ປີ ບ້ານປະຕິບັດໄດ້ 32,63%, ຄົວເຮືອນປະຕິບັດໄດ້ 36,41%.
ທ່ານ ຍີນໄຊ ດວງພະຈັນ ຫົວໜ້າພະແນກ ພະລັງງານ ແລະ ບໍ່ແຮ່ ແຂວງຜົ້ງສາລີ ໄດ້ລາຍງານວຽກງານທີ່ພົ້ນເດັ່ນ ໃນການຈັດຕັ້ງປະຕິບັດ ແຜນພັດທະນາພະລັງງານ ແລະ ບໍ່ແຮ່ແຂວງໃນໄລຍະແຕ່ປີ 2021 ເຖິງປັດຈຸບັນ ໃນໂອກາດທີ່ທ່ານ ຈັນສະ ແຫວງ ບຸນຍົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ເຄື່ອນໄຫວພົບປະໂອ້ລົມການນຳ ແລະ ພະນັກງານ-ລັດຖະກອນ ພະແນກ ພະລັງງານ ແລະ ບໍ່ແຮ່ ຢູ່ແຂວງຜົ້ງສາລີ ເມື່ອບໍ່ດົນມານີ້ວ່າ: ແຂວງຜົ້ງສາລີ ມີເຂື່ອນໄຟຟ້າຂະໜາດນ້ອຍ-ໃຫຍ່ 6 ແຫ່ງ, ມີສະຖານີໄຟຟ້າແຮງດັນສູງ 230 ກິໂລໂວນ 2 ແຫ່ງ, 115 ກິໂລໂວນ 1 ແຫ່ງ; ລະບົບສາຍສົ່ງໄຟຟ້າແຮງສູງ 230 ກິໂລໂວນ 391,96 ກິໂລແມັດ, ສາຍສົ່ງ 115 ກິໂລໂວນ 18,66 ກິໂລແມັດ, ສາຍສົ່ງ 35 ກິໂລໂວນ 4,26 ກິໂລແມັດ, ຕາຂ່າຍແຮງດັນກາງ 22 ກິໂລໂວນ 1.624,4 ກິໂລແມັດ, ຕາຂ່າຍແຮງດັນຕໍ່າ 0,4 ກິໂລໂວນ 358,5 ກິໂລແມັດ, ມີໝໍ້ແປງທັງໝົດ 940 ຊຸດ.
ສ່ວນວຽກງານທໍລະນີສາດ ແລະ ບໍ່ແຮ່ ໂຄງການໃນຂັ້ນຕອນການຊອກຄົ້ນ-ສໍາຫລວດແຮ່ທາດ ມີ 13 ບໍລິສັດ 13 ໂຄງການ (ບໍລິສັດພາຍໃນ 9 ໂຄງການ, ຕ່າງປະເທດ ສປ ຈີນ 4 ໂຄງການ); ໂຄງການໃນຂັ້ນຕອນການສ້າງບົດວິພາກເສດຖະກິດ-ເຕັກນິກ ກ້າວເຂົ້າສູ່ກະກຽມເຊັນສັນຍາ, ການກໍ່ສ້າງໂຮງງານປຸງແຕ່ງແຮ່ທາດ, ການຂຸດຄົ້ນ-ປຸງແຕ່ງ ແລະ ສົ່ງອອກແຮ່ທາດມີ 16 ບໍລິສັດ, 18 ໂຄງການ ໃນນີ້, ຂັ້ນແຂວງອະນຸຍາດ 1ບໍລິສັດ 1 ໂຄງການ (ບໍລິສັດພາຍໃນ 7 ໂຄງການ, ຕ່າງປະເທດ ສປ ຈີນ 11 ໂຄງການ). ຂຸດຄົ້ນ-ຈໍາໜ່າຍຖ່ານຫີນໄດ້ 226.547,14 ໂຕນ, ມູນຄ່າ 193,03 ຕື້ກີບ ໃນນີ້, ຈໍາໜ່າຍພາຍໃນປະເທດ 58.577,84 ໂຕນ ມູນຄ່າ 39,89 ຕື້ກີບ, ຈໍາໜ່າຍຕ່າງປະເທດ (ສປ ຈີນ) 167.969,30ໂຕນ, ມູນຄ່າ 153,14 ຕື້ກີບ, ທຽບໃສ່ແຜນ 5 ປີ ປະຕິບັດໄດ້ 18,87%; ຂຸດຄົ້ນ-ຈໍາໜ່າຍແຮ່ທອງບົດມຸ່ນຈໍາໜ່າຍພາຍໃນ ໄດ້ 2.792,32 ໂຕນ, ມູນຄ່າ 74,78 ຕື້ກີບ, ທຽບໃສ່ແຜນ 5 ປີ ປະຕິບັດໄດ້ 1,21%; ຂຸດຄົ້ນ-ຈໍາໜ່າຍແຮ່ບາຣິດ ຈໍາໜ່າຍຕ່າງປະເທດ (ສປ ຈີນ) ໄດ້ 30.107,64 ໂຕນ, ມູນຄ່າ 17,02 ຕື້ກີບ, ຂຸດຄົ້ນ-ຈໍາໜ່າຍຫີນກໍ່ສ້າງ ແລະ ດິນໜຽວ 73.045 ແມັດກ້ອນ, ມູນຄ່າ 7,12 ຕື້ກີບ, ທຽບໃສ່ແຜນ 5 ປີ ປະຕິບັດໄດ້ 16,48%.
ພ້ອມກັນນີ້, ທາງພະແນກໄດ້ເອົາໃຈໃສ່ວຽກງານຮ່ວມມືກັບຕ່າງປະເທດ ເປັນຕົ້ນ ກິດຈະການຊອກຄົ້ນ-ສໍາຫລວດແຮ່ທາດຊະນິດຕ່າງໆຈາກ ສປ ຈີນ ມາຮອດປັດຈຸບັນ ມີ 4 ບໍລິສັດ 4 ກິດຈະການ, ໂຄງການຂຸດຄົ້ນ-ປຸງແຕ່ງແຮ່ທາດຈາກ ສປ ຈີນ ມີ 9 ບໍລິສັດ 11 ກິດຈະການ ແລະ ໄດ້ຮັບທຶນຊ່ວຍເຫລືອລ້າຈາກ ສປ ຈີນ (ບ້ວງ4ຕື້ຢວນ) ໃນການຂະຫຍາຍລະບົບຕາຂ່າຍໄຟຟ້າ 22/0,4 ກິໂລໂວນ ແລະ ຕິດຕັ້ງໝໍ້ແປງໄປສູ່ຊົນນະບົດ ເຂດຫ່າງໄກສອກຫລີກ 10 ບ້ານ ນອນໃນ 4 ເມືອງຄື: ເມືອງຜົ້ງສາລີ, ເມືອງສໍາພັນ, ເມືອງບຸນເໜືອ ແລະ ເມືອງຍອດອູ, ຊຶ່ງໂຄງການດັ່ງກ່າວ ກຳລັງຈັດຕັ້ງປະຕິບັດ ໃນການກໍ່ສ້າງເຂົ້າບັນດາບ້ານເປົ້າໝາຍ.
ຂ່າວ-ພາບ: ແສງຄຳສາລີວັນ
