ແຂວງຜົ້ງສາລີ ສະຫລຸບວຽກງານ ແລະ ປິດໂຄງການ ກອງທຶນຫລຸດຜ່ອນຄວາມທຸກຍາກ (ທລຍ) ວັນທີ 14 ມິຖຸນາ 2024 ໂດຍການເປັນປະທານຂອງທ່ານ ຄຳເປື່ອງ ເມືອງໄຊ ຮອງຫົວໜ້າຫ້ອງວ່າການແຂວງ.
ທ່ານ ຖາວອນ ໄຊຍະບຸດ ຜູ້ປະສານງານການໂຄງການ ທລຍ ຂັ້ນແຂວງ ໄດ້ສະຫລຸບການຈັດຕັ້ງປະຕິບັດໂຄງການ ກອງທຶນຫລຸດຜ່ອນຄວາມທຸກຍາກແຂວງຜົ້ງສາລີ ວ່າ: ໂຄງການດັ່ງກ່າວແມ່ນໂຄງການໜຶ່ງທີ່ນອນໃນແຜນງານໜຶ່ງດຽວ ທີ່ມີສ່ວນຮ່ວມຫລາຍຂະແໜງການ ເພື່ອປັບປຸງວຽກງານໂພຊະນາການ ຢູ່ 4 ແຂວງພາກເໜືອຂອງ ສປປ ລາວ ທີ່ໄດ້ຮັບການສະໜັບສະໜູນເງິນກູ້ຢືມຈາກທະນາຄານໂລກ. ໂຄງການ ທລຍ 3 ໄລຍະເພີ່ມທຶນ ໄດ້ຮັບງົບປະມານທັງໝົດ 22,5 ລ້ານໂດລາສະຫະລັດ ເປັນທຶນກູ້ຢືມ ຂອງລັດຖະບານແຫ່ງ ສປປ ລາວ ຈາກທະນາຄານໂລກ. ຈຸດປະສົງຂອງໂຄງການ ເພື່ອປັບປຸງການເຂົ້າເຖິງການບໍລິການ, ການຊຸກຍູ້ການຜະລິດ ແລະ ການບໍລິໂພກອາຫານ ທີ່ມີໂພຊະນາການ ຂອງຊຸມຊົນທີ່ທຸກຍາກ ໃນພື້ນທີ່ເປົ້າໝາຍຂອງໂຄງການຢູ່ 468 ບ້ານ 12 ເມືອງ ຂອງ 4 ແຂວງ ຄື: ແຂວງຜົ້ງສາລີ, ອຸດົມໄຊ, ຫົວພັນ ແລະ ແຂວງຊຽງຂວາງ ນັບແຕ່ປີ 2020-2024 ເພື່ອແກ້ໄຂບັນຫາ ຂອງການຂາດສານອາຫານ ໃຫ້ປະຊາຊົນຢູ່ເຂດຊົນນະບົດ ຫ່າງໄກສອກຫລີກ ແບບທັນສະໄໝ. ສະເພາະແຂວງຜົ້ງສາລີ, ທລຍ 3 ໄລຍະເພີ່ມທຶນ ໄດ້ເລີ່ມຈັດຕັ້ງປະຕິບັດແຕ່ປີ 2020-2024 ໄດ້ສະໜັບສະໜູນ ຫລື ເຮັດວຽກຢູ່ໃນ 4 ເມືອງ ຄື: ເມືອງຂວາ, ເມືອງໃໝ່, ເມືອງສຳພັນ ແລະ ເມືອງບຸນໃຕ້ ກວມເອົາ 160 ບ້ານ, ມີ 11.473 ຄອບຄົວ, 62.523 ຄົນ, ເປັນບ້ານທຸກຍາກ 132 ບ້ານ ກວມເອົາ 82.50% ປະກອບມີ: ເມືອງຂວາ 57 ບ້ານເປັນບ້ານທຸກຍາກ ກວມເອົາ 68.42%, ເມືອງໃໝ່ 46 ບ້ານເປັນບ້ານທຸກຍາກ ກວມເອົາ 93.48%, ເມືອງສຳພັນ 27 ບ້ານ ເປັນບ້ານທຸກຍາກ ກວມເອົາ 88,89% ແລະ ເມືອງບຸນໃຕ້ 30 ບ້ານ ເປັນບ້ານທຸກ ຍາກກວມເອົາ 86,67% (ອີງໃສ່ຂໍ້ມູນ 348/ນຍ. ປີ 2019-2020).
ຜ່ານໄລຍະການຈັດຕັ້ງປະຕິບັດໂຄງການ ໂດຍພາຍໃຕ້ແຜນງານໝຶ່ງດຽວ ທີ່ມີສ່ວນຮ່ວມຫລາຍໂຄງການ, ການພັດທະນາມາຮອດປັດຈຸບັນ ໂດຍອີງໃສ່ຜົນການປະເມີນຂໍ້ມູນ 348/ນຍ, ປີ 2024 ເຫັນວ່າ ຈາກ 28 ບ້ານບໍ່ທຸກຍາກ ເພີ່ມຂຶ້ນມາເປັນ 44 ບ້ານ ຈາກ 17.50% ເພີ່ມຂຶ້ນເປັນ 27.50% ຖ້າທຽບກັບຈຳນວນບ້ານທັງໝົດທີ່ ທລຍ ສະໜັບສະໜູນ ແລະ 132 ບ້ານທຸກຍາກ ໄດ້ຫລຸດລົງ ຍັງເຫລືອ 116 ບ້ານ ໝາຍຄວາມວ່າ ເປັນບ້ານພົ້ນທຸກເພີ່ມຂຶ້ນ 16 ບ້ານ, ບ້ານທຸກຍາກເມື່ອກ່ອນ 82.50% ຫລຸດລົງມາເຫລືອ 72.50% ຖ້າທຽບໃສ່ບ້ານທັງໝົດທີ່ ທລຍ ສະໜັບສະໜູນ. ພ້ອມນີ້, ໂຄງການ ໄດ້ສຸມໃສ່ ແຜນພັດທະນາ ເສດຖະກິດ-ສັງຄົມ ຂອງລັດຖະບານ ມາຜັນຂະຫຍາຍຈັດຕັ້ງປະຕິບັດ ປະກອບ 4 ອົງປະກອບຫລັກ ຄື: ວຽກງານພັດທະນາພື້ນຖານໂຄງລ່າງດ້ານກະສິກຳ; ວຽກງານສ້າງຄວາມເຂັ້ມແຂງໃຫ້ຊຸມຊົນ ແລະ ອົງການປົກຄອງທ້ອງຖິ່ນ; ວຽກງານປັບປຸງຊີວິດການເປັນຢູ່ ແລະ ວຽກງານໂພຊະນາການ. 4 ເມືອງເປົ້າໝາຍຂອງແຂວງຜົ້ງສາລີ ທີ່ ທລຍ ໃຫ້ການສະໜັບສະໜູນ ສາມາດປຽບທຽບຂໍ້ມູນ ກ່ອນເລີ່ມຕົ້ນໄລຍະເພີ່ມທຶນ 2020 ໃນຈຳນວນ 160 ບ້ານ ມີ 132 ບ້ານທຸກຍາກ, ມີ 8.684 ຄອບຄົວ , ພົນລະເມືອງທຸກຍາກ ມີ 49.468 ຄົນ ຍິງ 24.933 ຄົນ ຜ່ານການຈັດຕັ້ງປະຕິບັດ ຮອດໄລຍະທ້າຍໂຄງການ 2024 ທລຍ ກໍເປັນສ່ວນໜຶ່ງໃນການພັດທະນາ ຊ່ວຍພັກ ແລະ ລັດຖະບານ ສາມາດເຮັດໃຫ້ຫລາຍບ້ານ ຄົບເງື່ອນໄຂໃນການພັດທະນາ ຄື: ຈາກ 132 ບ້ານທຸກຍາກ ຍັງ 116 ບ້ານ ຈາກ 8.684 ຄອບຄົວ ຍັງ 7.062 ຄອບຄົວ ພົນລະເມືອງທຸກຍາກ ຈາກ 49.468 ຄົນ ຍັງ 41.478 ຄົນ ຍິງ 24.933 ຄົນ ຍັງ 20.817 ຄົນ.
ໃນກອງປະຊຸມ ຜູ້ເຂົ້າຮ່ວມໄດ້ພ້ອມກັນປະກອບຄຳຄິດຄຳເຫັນຕໍ່ການຈັດຕັ້ງປະຕິບັດໂຄງການດັ່ງກ່າວ ທີ່ຍັງພົບຄວາມຫຍຸ້ງຍາກ ແລະ ຂໍ້ຄົງຄ້າງ ຊຶ່ງເປັນສິ່ງທ້າທ້າຍໃນການຈັດຕັ້ງປະຕິບັດໄລຍະທີ່ຜ່ານມາ ແລະ ພ້ອມກັນວາງແນວທາງໃນການສືບຕໍ່ບູລະນະຮັກສາກິດຈະກຳຕ່າງໆ ທີ່ໂຄງການໄດ້ຈັດຕັ້ງປະຕິບັດຜ່ານມາ ເພື່ອໃຫ້ໄດ້ນຳໃຊ້ຍາວນານ ແລະ ມີຄວາມຍືນຍົງ.
ຂ່າວ-ພາບ: ແສງຄຳ ສາລີວັນ
