ກອງບັນຊາການ ປກສ ນະຄອນຫຼວງວຽງຈັນ (ນວ) ຈັດກອງປະຊຸມເຜີຍແຜ່ແຜນປ້ອງກັນບຸນປີໃໝ່ລາວ ປະຈໍາປີ ພສ 2567 ໃນລະຫວ່າງວັນທີ 13-16 ເມສາ 2024 ທີ່ ນວ ໃນວັນ ທີ 8 ເມສາ 2024, ໂດຍມີ ພົຈວ ປອ ວັນທອນ ສຸລິສັກ ຮອງຫົວໜ້າກົມໃຫຍ່ຕໍາຫຼວດ ກະຊວງ ປກສ ແລະ ພາກສ່ວນກ່ຽວຂ້ອງເຂົ້າຮ່ວມ.
ພັທ ສົມເພັດ ທໍາມະທອງ ຮັກສາການ ຫົວໜ້າຫ້ອງການ ປກສ ນວ ໄດ້ຂຶ້ນຜ່ານແຜນປ້ອງກັນບຸນປີໃໝ່ລາວ ປະຈໍາປີ ພສ 2567 ໃນລະຫວ່າງວັນທີ 13-16 ເມສາ 2024 ທີ່ ນວ ໃຫ້ຮູ້ ວ່າ: ບັນດາໜ້າວຽກຂອງເຫຼົ່າວິຊາສະເພາະ ຕ້ອງສຸມໃສ່ຈັດຕັ້ງປະຕິບັດມີ 11 ໜ້າວຽກທີ່ສໍາຄັນ ດັ່ງນີ້:
1. ເຄື່ອນໄຫວວຽກງານໂຄສະນາຕາມແຈ້ງການ ສະບັບເລກທີ 140/ປກສ.ນວ, ລົງວັນທີ 1 ເມສາ 2024 ຢູ່ຕາມໝູ່ບ້ານ, ຫົວໜ່ວຍທຸລະກິດ, ສໍານັກງານອົງການ, ໂຄສະນາຜ່ານສື່ດ້ວຍຮູບການຕ່າງໆ ເພື່ອໃຫ້ຄົນທົ່ວສັງຄົມຕື່ນຕົວເຂົ້າຮ່ວມວຽກງານປ້ອງກັນ ແລະ ມີສະຕິລະວັງຕົວຕໍ່ກົນອຸບາຍຂອງກຸ່ມຄົນທີ່ບໍ່ຫວັງດີ.
2. ກໍາແໜ້ນສະພາບການ ແລະ ກໍານົດບັນດາມາດຕະການປ້ອງກັນສະກັດກັ້ນ ແລະ ແກ້ໄຂສະພາບຢ່າງທັນການ ຕໍ່ກັບການເຄື່ອນໄຫວຂອງກຸ່ມຄົນບໍ່ດີຢູ່ພາຍໃນ ແລະ ຕ່າງປະເທດ.
3. ຕັ້ງໜ້າປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ວຽກງານແກ້ໄຂປະກົດການຫຍໍ້ທໍ້ໃນສັງຄົມທີ່ພົ້ນເດັ່ນ ເຊັ່ນ: ກຸ່ມແກ້ງກວນເມືອງ, ປຸ້ນຊັບ, ຊີງຊັບ, ລັກຊັບ, ອາຊະຍາກຳທາງດ້ານເຕັກໂນໂລຊີ ແລະ ອື່ນໆ.
4. ເຄື່ອນໄຫວເຮັດວຽກງານຄຸ້ມຄອງຄົນເຂົ້າ-ອອກເມືອງ ຢູ່ຕາມດ່ານສາກົນ ແລະ ດ່ານປະເພນີ ທີ່ຢູ່ໃນຄວາມຮັບຜິດຊອບຂອງນະຄອນຫຼວງວຽງຈັນ, ປະສານສົມທົບກັບທະຫານຊາຍແດນ ສະກັດກັ້ນການລັກລອບ ເຂົ້າ-ອອກ ຕາມຊາຍແດນ ລາວ-ໄທ.
5. ຈັດວາງກໍາລັງຈະລາຈອນຢູ່ຕາມຈຸດ, ເສັ້ນທາງ ເພື່ອອໍານວຍຄວາມສະດວກການສັນຈອນ, ກວດກາພາຫະນະ, ກວດທາດເຫຼົ້າ, ສິ່ງທີ່ຜິດກົດໝາຍທຸກປະເພດ, ຖ້າພົບເຫັນຜູ້ຂັບຂີ່ພາຫະນະທຸກປະເພດ ເມົາເກີນກຳນົດ ໃຫ້ຢຸດພັກເຊົາຈົນກວ່າຊ່ວງເມົາ ມີສະຕິ ຈຶ່ງອະນຸຍາດໃຫ້ເດີນທາງຕໍ່ ແລະ ຈັດຕັ້ງຈຸປະຈຳການຕະຫຼອດ 24 ຊົ່ວໂມງ ເພື່ອແກ້ໄຂອຸປະຕິເຫດ.
6. ພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ໃຫ້ຊີ້ນໍາບັນດາເມືອງຕາມສາຍວິຊາສະເພາະ ຈັດຕັ້ງກຳລັງ, ພາຫະນະກຽມພ້ອມເຮັດວຽກງານສະກັດກັ້ນ ແລະ ຕ້ານອັກຄີໄພ.
7. ຈັດຕັ້ງກໍາລັງປ້ອງກັນເຄື່ອນທີ່, ສນ 1191 ສົມທົບກັບກໍາລັງທະຫານ ນວ, ກຳລັງກະຊວງປ້ອງກັນຄວາມສະຫງົບ ເຄື່ອນໄຫວລາດຕະເວນຕາມເສັ້ນທາງສ່ຽງ, ຈຸດຫຼໍ່ແຫຼມ.
8. ເອົາໃຈໃສ່ຫັນກໍາລັງລົງຮາກຖານປະຈໍາຢູ່ແຕ່ລະບ້ານ ເພື່ອສົມທົບກັບອົງການປົກຄອງ, ກຳລັງ ປກສ ກອງຫຼອນບ້ານ ເຮັດວຽກງານປ້ອງກັນເວນຍາມ, ຄຸ້ມຄອງການເຄື່ອນໄຫວໄປ-ມາ, ເຂົ້າ-ອອກບ້ານຂອງພົນລະເມືອງ, ສ້າງບົດບັນທຶກຮັກສາຄວາມສະຫງົບກັບຄອບຄົວ, ຫົວໜ່ວຍທຸລະກິດຕ່າງໆ ທີ່ມີຄວາມສ່ຽງ.
9. ຈັດຕັ້ງຈຸດປ້ອງກັນຢູ່ບັນດາເສັ້ນທາງເຂົ້າ-ອອກ ນວ, ຈຸດຈັດກິດຈະກຳສະຫຼອງບຸນປີໃໝ່ລາວ ພື້ນທີ່ຕັ້ງຢູ່ເມືອງໃດ ແມ່ນມອບໃຫ້ເມືອງນັ້ນຮັບຜິດຊອບ ໂດຍສົມທົບກັບເຫຼົ່າຮົບວິຊາສະເພາະບັນດາຫ້ອງ ແລະ ເຫຼົ່າຮົບວິຊາສະເພາະຂອງ ກະຊວງ ປກຊ-ປກສ.
10. ເຮັດວຽກງານຄຸ້ມຄອງ-ປ້ອງກັນບັນດາຄ້າຍຄຸມຂັງ-ດັດສ້າງ, ຄ້າຍກັກຂັງຊົ່ວຄາວ, ສູນປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດ.
11. ບັນດາຫ້ອງ, ກອງພັນ, ຄ້າຍຄຸມຂັງ-ດັດສ້າງ, ກອງບັນຊາການ ປກສ 9 ເມືອງ ຈັດຕັ້ງກໍາລັງປະຈຳການ ຕະຫຼອດ 24 ຊົ່ວ ໂມງ, ກຽມກໍາລັງ, ພາຫະນະ, ເຮືອ, ງົບປະມານຮັບໃຊ້, ຈັດຕັ້ງການອອກກວດກາ, ຕິດຕາມ, ຊຸກຍູ້ການປະຕິບັດໜ້າທີ່ຂອງກໍາລັງ, ສັງລວມວິເຄາະວິໄຈຂ່າວ, ສ່ອງແສງລາຍງານສະພາບ ແລະ ເບິ່ງແຍງຊີວິດການເປັນຢູ່ຂອງກໍາລັງປະຕິບັດໜ້າທີ່ວຽກງານ.
=:>>> ທັງນີ້, ກໍເພື່ອເຮັດໃຫ້ການສະເຫຼີມສະຫຼອງບຸນປີໃໝ່ລາວ ພສ 2567 ທີ່ໄດ້ໝູນວຽນມາບັນຈົບຄົບຮອບອີກກາລະໜຶ່ງ, ຊາວລາວທັງຊາດ ກໍຄື ຊາວ ນວ ໄດ້ຕ້ອນຮັບປີໃໝ່ຢ່າງເບີກບານມ່ວນຊື່ນສົດໃສ, ຮັກສາໄດ້ມູນເຊື້ອວັດທະນະທຳ ແລະ ຮີດຄອງປະເພນີອັນດີງາມ ທີ່ເປັນເອກະລັກຂອງຊາດລາວເຮົາ, ທັງຮັບປະກັນຄວາມສະຫງົບສຸກ, ຄວາມເປັນລະບຽບຮຽບຮ້ອຍ ແລະ ມີຄວາມສະອາດຈົບງາມ ທົ່ວ ນວ.
(ຂ່າວ: ແກ້ວ)
