ພິທີມອບ-ຮັບ ວັກຊິນ ປ້ອງກັນພະຍາດໂຄວິດ-19 Johnson&Johnson ຈຳນວນ 400.000 ໂດສ ພ້ອມດ້ວຍເຂັມສັກຢາ ຈໍານວນ 400.000ອັນ ຈາກລັດຖະບານຝຣັ່ງ ໃຫ້ການຊ່ວຍເຫຼືອ ສປປ ລາວ ຈັດຂຶ້ນຕອນບ່າຍວັນທີ 10 ມິຖຸນາ 2022 ທີ່ກະຊວງສາທາລະນະສຸກ ໂດຍມີ ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ແລະ ທ່ານ ນາງ ຊີວ-ແລັງ ຊູອອກ ເອກອັກຄະລັດຖະທູດຝຣັ່ງ ປະຈຳ ສປປ ລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ຕາງໜ້າໃຫ້ລັດຖະບານແຫ່ງ ສປປ ລາວ ກ່າວສະແດງຄວາມຂອບໃຈ ແລະຕີລາຄາສູງ ຕໍ່ການຊ່ວຍເຫລືອວັກຊິນໃຫ້ແກ່ ສປປ ລາວ ໃນຄັ້ງນີ້ ເຊິ່ງເປັນການຢັ້ງຢືນໃຫ້ເຫັນຄວາມເປັນຫ່ວງເປັນໃຍຂອງລັດຖະບານ ແລະປະຊາຊົນຝຣ່ັງ ທີ່ມີຕໍ່ລັດຖະບານ ແລະປະຊາຊົນລາວ ໃນການປ້ອງກັນ ແລະຄວບຄຸມການແຜ່ລະບາດຂອງພະຍາດໂຄວິດ19 ຢູ່ ສປປ ລາວ, ການຮ່ວມມື ແລະຊ່ວຍເຫລືອຄັ້ງນີ້ ໄດ້ສະແດງໃຫ້ເຫັນເຖິງສາຍພົວພັນທີ່ດີ ລະຫວ່າງສອງປະເທດ ລາວ ແລະຝຼັ່ງ ບົນພື້ນຖານການເປັນຄູ່ຮ່ວມພັດທະນາ ໃນວຽກງານສາທາລະນະສຸກຂອງລາວ ວັກຊິນແມ່ນສິ່ງຈໍາເປັນ ແລະເປັນວິທີທີ່ດີທີ່ສຸດ ໃນການສ້າງພູມຄຸ້ມກັນ ແລະປ້ອງກັນການຕິດເຊື້ອ ເຖິງວ່າຈໍານວນຜູ້ຕິດເຊື້ອຢູ່ລາວຈະມີຈໍານວນຫລຸດໜ້ອຍລົງແລ້ວກໍຕາມ ແຕ່ພວກເຮົາຍັງຕ້ອງໄດ້ເອົາໃຈໃສ່ເຝົ້າລະວັງ ບໍ່ໃຫ້ມີການລະບາດໃນຮອບໃໝ່.
ມາຮອດປະຈຸບັນ ປະຊາກອນຂອງລາວ ໄດ້ຮັບວັກຊິນຄົບໂດສ ແລະສອງໂດສແລ້ວ ກວມ70% ແລະພວມສືບຕໍ່ປະຕິບັດໃຫ້ໄດ້ຕາມຄາດໝາຍທີ່ລັດຖະບານວາງໄວ້.
ທ່ານ ນາງ ຊີວ-ແລັງ ຊູອອກ ເອກອັກຄະລັດຖະທູດຝຣັ່ງ ປະຈຳ ສປປ ລາວກ່າວວ່າ: ສາທາລະນະສຸກແມ່ນບັນຫາໜື່ງລະດັບໂລກ ທີ່ຮຽກຮ້ອງເຖິງຄວາມສາມັກຄີຈາກທຸກຄົນ. ຍ້ອນມີການຮ່ວມມືຂອງນາໆຊາດ ຈື່ງສາມາດເອົາຊະນະການລະບາດຂອງພະຍາດນີ້ໄດ້. ປະເທດຝຣັ່ງຮູ້ສຶກດີໃຈທີ່ໄດ້ປະກອບສ່ວນຕື່ມອີກໃນຄວາມພະຍາຍາມຂອງລັດຖະບານລາວ ໃນການຈໍາກັດການລະບາດຂອງພະຍາດ ແລະ ຜົນກະທົບດ້ານເສດຖະກິດ-ສັງຄົມ, ລັດຖະບານຝຣັ່ງໄດ້ໃຫ້ຄຳໝັ້ນສັນຍາວ່າຈະບໍລິຈາກວັກຊີນໄປທົ່ວໂລກ ຈຳນວນ 120 ລ້ານ ໂດສ, ເຊິ່ງປະຈຸບັນປະເທດຝຣັ່ງໄດ້ຊ່ວຍເຫຼືອໄປແລ້ວ 87 ລ້ານ ໂດສ.
