ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນລະຫວ່າງວັນທີ 14 ຫາ 15 ພຶດສະພາ 2024 ບໍລິສັດຈະເລີນເຊກອງພະລັງງານຈຳກັດ ຈັດກອງປະຊຸມເຜີຍແຜ່ແຜນຮັບມືສຸກເສີນ ແລະ ຝຶກຊ້ອມອົບພະຍົບ ໃຫ້ບ້ານເຂດລຸ່ມເຂື່ອນ ຂອງ ເຂື່ອນໄຟຟ້ານ້ຳກົງ 2 ແລະ ນໍ້າກົງ 3 ທີ່ສະໂມສອນຫ້ອງວ່າການເມືອງ ພູວົງ ແຂວງ ອັດຕະປື, ໂດຍເປັນກຽດເຂົ້າຮ່ວມຂອງທ່ານ ບຸນເສີດ ເສດທິລາດ ຮອງເຈົ້າແຂວງ ອັດຕະປື.
ໃນກອງປະຊຸມ ບັນດາຜູ້ເຂົ້າຮ່ວມ ໄດ້ຮັບຟັງການນໍາສະເໜີແຜນຮັບມືສຸກເສີນ, ການຝຶກອົບຮົມ ແລະ ແຜນກະກຽມອົບພະຍົບເຫດສຸກເສີນ ຂອງເຂື່ອນໄຟຟ້ານໍ້າກົງ 2 ແລະ ນໍ້າກົງ 3, ເຊິ່ງຈຸດປະສົງ ແລະ ການຄາດຫມາຍ ກໍ່ເພື່ອປະເມີນຄວາມສ່ຽງທີ່ອາດຈະເກີດຂຶ້ນ ແລະ ວິທີການແກ້ໄຂ ເພື່ອປົກປ້ອງການສູນເສຍດ້ານຊີວິດ, ຊັບສິນ ແລະ ສິ່ງແວດລ້ອມ, ປຶກສາຫາລື ແລະ ກະກຽມແຜນການຝຶກຊ້ອມອົບພະຍົບແບບມີສ່ວນຮ່ວມ ກັບອົງການຈັດຕັ້ງທ້ອງຖິ່ນ ແລະ ບ້ານທີ່ຕັ້ງຢູ່ໃນເຂດຕອນລຸ່ມຂອງເຂື່ອນ.
ພ້ອມທັງເຮັດໃຫ້ອົງການຈັດຕັ້ງທ້ອງຖິ່ນ ມີຄວາມເຂົ້າໃຈຕໍ່ແຜນການຮັບມືສຸກເສີນດີຂຶ້ນ ເພື່ອຈະໄດ້ຜັນຂະຫຍາຍສູ່ປະຊາຊົນ ແລະ ອອກແບບການຝຶກຊ້ອມຢ່າງມີສ່ວນຮ່ວມກັບທ້ອງຖິ່ນ, ແຜນການຝຶກຊ້ອມອົບພະຍົບ ໄດ້ຮັບການເຜີຍແຜ່ຢ່າງກວ້າງຂວາງ ແລະ ໄດ້ຮັບການພັດທະນາຮ່ວມກັນລະຫວ່າງ ພາກສ່ວນທີ່ມີສ່ວນກ່ຽວຂ້ອງຂອງໜ່ວຍງານພັກລັດ, ຊຸມຊົນທ້ອງຖິ່ນ ແລະ ຜູ້ພັດທະນາເຂື່ອນ, ໃຫ້ແຜນຝຶກຊ້ອມອົບພະຍົບ ກໍລະນີເກີດເຫດສຸກເສີນ ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ, ເພື່ອໃຫ້ຊຸມຊົນທ້ອງຖິ່ນມີຄວາມເຂົ້າໃຈດີຂຶ້ນກ່ຽວກັບການຝຶກຊ້ອມ ແລະ ມາດຕະການປ້ອງກັນຕ່າງໆ.
ຂ່າວ: ສິງໂຕ