ໃນວັນທີ 25-29 ກໍລະກົດ 2022 ນີ້ ທີ່ຫ້ອງປະຊຸມຄະນະຊາວໜຸ່ມປະຊາຊົນປະຕິວັດລາວແຂວງໄຊຍະບູລີ ອົງການກາແດງແຫ່ງຊາດລາວໄດ້ຈັດຝຶກອົບຮົມ ກ່ຽວກັບວຽກງານຫຼຸດຜ່ອນຄວາມສ່ຽງໄພພິບັດ, ການສົ່ງເສີມສຸຂະພາບຊຸມຊົນໃນພາວະສຸກເສີນ ແລະ ການປະເມີນຫຼັງເກີດໄພພິບັດ ໃຫ້ແກ່ພະນັກງານກາແດງແຂວງ ແລະ ພາກສ່ວນທີ່ກ່ຽວຂ້ອງອ້ອມຂ້າງແຂວງໄຊຍະບູລີໂດຍເປັນກຽດເຂົ້າຮ່ວມເປັນປະທານຂອງ ທ່ານເຂັມເພັດ ສີວໍຣະສ໌ວົງ ຮອງຫົວໜ້າຫ້ອງການອົງການກາແດງແຫ່ງຊາດລາວ ແລະ ທ່ານ ວັນນະສິງ ມຸງຄຸນສະຫວັດ ຫົວໜ້າອົງການກາແດງແຂວງໄຊຍະບູລີ, ມີວິທະຍາກອນ ແລະ ສໍາມະນາກອນທີ່ກ່ຽວຂ້ອງອ້ອມຂ້າງແຂວງເຂົ້າຮ່ວມທັງໝົດ 30ຄົນ, ຍິງ 08 ຄົນ. ໂດຍໄດ້ຮັບການສະໜັບສະໜູນງົບປະມານຈາກສະຫະພັນກາແດງ ແລະ ຊີກວົງເດືອນແດງສາກົນ.
ການຈັດຊຸດຝຶກອົບຮົມຄັ້ງນີ້ ແມ່ນເພື່ອແນໃສ່ການກຽມພ້ອມ ທຸກພາກສ່ວນໃນການຮັບມືກັບໄພພິບັດ ທີ່ອາດຈເກີດຂຶ້ນ
ບັນດານັກ ສຳມະນາກອນໄດ້ຮຽນຮູ້ກ່ຽວ ກັບຫຼັກການພື້ນຖານຂອງຂະບວນການກາແດງ ແລະ ພາລະບົດບາດຂອງກາແດງລາວ, ກົດໝາຍການຄຸ້ມຄອງໄພພິບັດແຫ່ງຊາດ ແລະ ກົນໄກການຄຸ້ມຄອງໄພ ພິບັດແຫ່ງຊາດ, ກົນໄກການຕອບໄພພິ ບັດຂອງກາແດງລາວ, ຄວາມຮູ້ພື້ນຖານຂອງການຄຸ້ມຄອງໄພພິບັດ, ວົງຈອນຂອງໄພພິບັດ, ຄວາມຮູ້ພື້ນຖານກ່ຽວກັບການປັບຕົວເຂົ້າກັບການປ່ຽນແປງສະພາບດິນຟ້າອາກາດ, ຄວາມຮູ້ພື້ນຖານກ່ຽວກັບການປ້ອງກັນພະຍາດລະບາດໃນພາວະສຸກເສີນ, ການປະຖົມພະຍາບານ, ພ້ອມ ກັນນັ້ນຍັງໄດ້ເຮັດວຽກເປັນກຸ່ມ ເພື່ອສົນທະນາ, ລະດົມຄວາມຄິດ, ຝຶກຊ້ອມໂດຍການຈຳລອງເຫດການ, ການເກັບກຳຂໍ້ມູນ ເພື່ອປະເມີນຄວາມຕ້ອງການໃນເຫດການຈໍາລອງ ແລະ ຝຶກຊ້ອມການມອດໄຟ.
ພ້ອມກັນນັ້ນອົງການກາແດງແຫ່ງຊາດລາວຍັງໄດ້ມອບອຸປະກອນໃນການຕອບໂຕ້ໄພພິບັດຂັ້ນພື້ນຖານ ເຊິ່ງປະກອບມີ ບັ້ງມອດໄພ, ເສື້ອຊູຊີບ, ກົງເບັງ, ເຊືອກກູ້ໄພ, ເກີບໂບກ, ເສື້ອກັນຝົນ, ໄຟສາຍ, ຕູ້ລຳໂພງ, ປາກເລີ, ຖົງປະຖົມພະຍາບານ ພ້ອມດ້ວຍຢາ ແລະ ອຸປະກອນພື້ນຖານ, ລວມມູນຄ່າທັງໝົດ 22,500,000 ກີບ ໃຫ້ກຽດມອບໂດຍທ່ານ ເຂັມເພັດ ສີວໍຣະສ໌ວົງ ຮອງຫົວໜ້າອົງການກາແດງແຫ່ງຊາດລາວ ໂດຍການກ່າວຮັບຂອງທ່ານ ວັນນະສິງ ມຸງຄຸນສະຫວັດ ຫົວໜ້າອົງການກາແດງແຂວງໄຊຍະບູລີ ໂດຍການເປັນສັກຂີພະຍານຂອງທ່ານ ເພັດມີໄຊ ສູນວິໄລ ຮອງເຈົ້າແຂວງໄຊຍະບູລີ ແລະ ພະນັກງານອົງການແຫ່ງຊາດລາວ, ອົງການກາແດງແຂວງ ແລະ ພະນັກງານອ້ອມຂ້າງແຂວງ.
Loading...