ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຊຸດຝຶກອົບຮົມວຽກງານບໍລິຫານ ແລະ ພິທີການ ໃຫ້ແກ່ພະນັກງານທີ່ຈະຮັບໃຊ້ ການເປັນເຈົ້າພາບຈັດກອງປະຊຸມສະມັດຊາໃຫຍ່ລັດຖະສະພາ ລະຫວ່າງຊາດອາຊຽນ ຫລື ໄອປາ (AIPA) ຄັ້ງທີ 45 ຈັດຂຶ້ນໃນວັນທີ 6-9 ມິຖຸນາ 2024 ທີ່ແຂວງວຽງຈັນ ພາຍໃຕ້ການເປັນປະທານຂອງ ທ່ານ ນາງ ອໍາໄພວອນ ລ້ອມບຸນແພງ ເລຂາທິການສະພາແຫ່ງຊາດ ໂດຍມີ ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ຜູ້ຊີ້ນໍາວຽກງານການຕ່າງປະເທດ ແລະ ພາກສ່ວນທີ່ກ່ຽວຂ້ອງເຂົ້້າຮ່ວມ.
ທ່ານ ນາງ ອໍາໄພວອນ ລ້ອມບຸນແພງ ໄດ້ມີຄໍາເຫັນວ່າ: ຊຸດຝຶກອົບຄັ້ງນີ້ ເພື່ອຍົກລະດັບຄວາມຮູ້, ຄວາມສາມາດ ແລະ ທັກສະຕ່າງໆກ່ຽວກັບການກະກຽມຄວາມພ້ອມ ໃຫ້ແກ່ພະນັກງານຮັບໃຊ້ກອງປະຊຸມ ແລະ ພະນັກງານປະສານງານ ແລະ ອາສາສະໝັກ (LOs/VOs) ໃຫ້ມີຄວາມຮູ້, ຄວາມເຂົ້າໃຈເປັນຢ່າງດີໃນດ້ານວຽກງານ ການປະສານງານ, ພິທີການ ແລະ ບົດຮຽນຕ່າງໆໃນການຮັບແຂກຕ່າງປະເທດ ທີ່ມາເຂົ້າຮ່ວມກອງປະຊຸມສາກົນ ທີ່ ສປປ ລາວ ເປັນເຈົ້າພາບ ແນໃສ່ການກະກຽມຄວາມພ້ອມຮອບດ້ານໃຫ້ແກ່ການຕ້ອນຮັບຄະນະຜູ້ແທນລັດຖະສະພາ ຈາກປະເທດຕ່າງໆທີ່ຈະເດີນທາງມາເຂົ້າຮ່ວມ ກອງປະຊຸມໄອປາ. ໃນນັ້ນ, ມີ 10 ລັດຖະສະພາປະເທດສະມາຊິກ ແລະ 23 ລັດຖະສະພາປະເທດສັງເກດການ, ຜູ້ແທນທີ່ຖືກເຊີນຈໍານວນໜຶ່ງ ເຊິ່ງຄາດວ່າມີຜູ້ແທນຫລາຍກວ່າ 300 ທ່ານ.
ພ້ອມນີ້, ທ່ານຍັງໄດ້ຮຽກຮ້ອງມາຍັງຜູ້ເຂົ້າຮ່ວມ ຈົ່ງເຊີດຊູຄວາມຮັບຜິດຊອບການເມືອງຂອງຕົນ ເອົາໃຈໃສ່ເຂົ້າຮ່ວມ ແລະ ສຸມໃສ່ຄົ້ນຄວ້າປະກອບຄວາມຄິດເຫັນຢ່າງສ້າງສັນ, ກົງໄປກົງມາ, ຍົກໃຫ້ເຫັນບົດຮຽນ ແລະ ສະພາບຄວາມເປັນຈິງ ແນໃສ່ກະກຽມຄວາມພ້ອມຮອບດ້ານ ໃນວຽກງານຂອງອະນຸກໍາມະການບໍລິຫານ, ພິທີການ, ສະຖານທີ່, ພາຫະນະ ແລະ ປະດັບປະດາ ເພື່ອກະກຽມ ແລະ ຮັບໃຊ້ການເປັນເຈົ້າພາບກອງປະຊຸມໄອປາ ຄັ້ງທີ 45 ແລະ ກອງປະຊຸມປິ່ນອ້ອມ ໃຫ້ມີຜົນສໍາເລັດຢ່າງຈົບງາມ.
ທ່ານ ນາງ ສູນທອນ ໄຊຍະຈັກ ໄດ້ໃຫ້ທິດຊີ້ນຳຕໍ່ກອງປະຊຸມ ວ່າ: ໃນລະຫວ່າງວັນທີ 18-24 ຕຸລາ 2024 ສປປ ລາວ ຈະເປັນເຈົ້າພາບຈັດກອງປະຊຸມສະມັດຊາໃຫຍ່ລັດຖະສະພາລະ ຫວ່າງຊາດອາຊຽນ ຫລື ໄອປາ ຄັ້ງທີ 45 ເຊິ່ງເປັນກອງປະຊຸມທີ່ມີຄວາມສໍາຄັນຂອງລັດຖະສະພາບັນດາປະເທດອາຊຽນ ໂດຍໝູນວຽນກັນເປັນເຈົ້າພາບ ຈັດຂຶ້ນປີລະຄັ້ງ ເພື່ອທົບທວນຄືນການປະຕິບັດວຽກງານຕ່າງໆຂອງໄອປາ ໃນປີຜ່ານມາ ແລະ ປຶກ ສາຫາລືເອກະພາບກັນວຽກງານໃນຕໍ່ໜ້າ ເຊິ່ງຈະມີກອງປະຊຸມປິ່ນອ້ອມຫລາຍກອງປະຊຸມ ທີ່ປະເທດເຈົ້າພາບຈະຕ້ອງໄດ້ກະກຽມ ເປັນຕົ້ນ ກອງປະຊຸມກໍາມາທິການການເມືອງຄວາມໝັ້ນຄົງ, ກໍາມາທິການວຽກງານເສດຖະກິດ, ກໍາມາທິການວຽກງານວັດທະນະທໍາ, ວຽກງານຈັດຕັ້ງພາຍໃນໄອປາ, ວຽກງານສະມາຊິກລັດຖະສະພາເພດຍິງ (WAIPA), ວຽກງານສະມາຊິກລັດຖະສະພາໜຸ່ມ ແລະ ກອງປະຊຸມກັບບັນດາປະເທດສັງເກດການ ຈໍານວນ 23 ປະເທດ. ພາຍຫລັງທີ່ປະເທດລາວ ໄດ້ຮັບການມອບໝາຍໃຫ້ເປັນເຈົ້າພາບຈັດກອງປະຊຸມໃຫຍ່ໄອປາ ຄັ້ງທີ 45 ຈາກປະເທດອິນໂດເນເຊຍ ໃນປີ 2023, ກໍໄດ້ມີການແຕ່ງຕັ້ງຄະນະຊີ້ນໍາລະດັບຊາດ ໂດຍມີທ່ານປະທານສະພາແຫ່ງຊາດ ເປັນປະທານ, ແຕ່ງຕັ້ງອະນຸກໍາມະການກອງເລຂາແຫ່ງຊາດ, ບັນດາອະນຸກໍາມະການ, ຄະນະຮັບຜິດຊອບການສ້າງຄວາມເຂັ້ມແຂງໃນການກະກຽມເປັນເຈົ້າພາບຈັດກອງປະຊຸມ ແລະ ອື່ນໆ; ການແຕ່ງຕັ້ງບຸກຄະລາກອນເຂົ້າໃນຄະນະຮັບຜິດຊອບ ແລະ ຮັບໃຊ້ກອງປະຊຸມ ແມ່ນໄດ້ຄັດເລືອກເອົາຜູ້ທີ່ມີຄວາມຮູ້, ຄວາມສາມາດ, ມີປະສົບການ, ເຂົ້າໃຈຫລັກການ ແລະ ກົດລະບຽບກອງປະຊຸມໄອປາ, ມີລະດັບພາສາອັງກິດທີ່ແນ່ນອນ.
ຂ່າວ-ພາບ: ສພຊ