ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ພະຍາດອະຫິວາໝູອາຟຣິກາ ລະບາດຢູ່ 3 ເມືອງເໜືອ ຂອງ ແຂວງ ໄຊຍະບູລີ

ຕາມການລາຍງານຈາກ ພະແນກ ກະສິກໍາ ແລະ ປ່າໄມ້ ແຂວງ ໄຊຍະບູລີ ໄດ້ໃຫ້ຮູ້ວ່າ: ໃນລະຫວ່າງກາງ ຫາ ທ້າຍ ເດືອນ ກັນຍາ 2020 ຜ່ານມານີ້, ຢູ່ 3 ເມືອງເໜືອ ແຂວງ ໄຊຍະບູລີ ໄດ້ມີການລະບາດຂອງພະຍາດ ອະຫິວາໝູອາຟຣິກາ ຄື: ເມືອງ ເງິນ, ເມືອງ ຊຽງຮ່ອນ ແລະ ເມືອງຄອບ ໃນນັ້ນ: ມີໝູຕາຍຫຼາຍກວ່າໝູ່ແມ່ນຢູ່ ເມືອງ ຊຽງຮ່ອນ ແລະ ຢືນຢັນວ່າພົບເຊື້ອພະຍາດດັ່ງກ່າວຢູ່ 2 ບ້ານ ພ້ອມໄດ້ກໍານົດເອົາ 2 ບ້ານນັ້ນເປັນເຂດແດງ, ຮອດປະຈຸບັນເມືອງ ຊຽງຮ່ອນ ມີໝູຕາຍຈໍານວນ 474 ໂຕ ໃນຈໍານວນ 13 ບ້ານ, ໝູຍັງມີຊີວິດ 1059 ໂຕ ແມ່ນພວມທໍາລາຍຖິ້ມ, ເມືອງ ຄອບ ມີໝູຕາຍບໍ່ຮູ້ສາເຫດ 3 ບ້ານ, ເມືອງ ເງິນ 1 ບ້ານ, ປະຈຸບັນແມ່ນໄດ້ນໍາເອົາຊິ້ນສ່ວນຂອງໝູຕາຍສົ່ງໄປວິໄຈຫາເຊື້ອພະຍາດຢູ່ ນະຄອນຫຼວງ ວຽງຈັນ ແລະ ໄດ້ເຝົ້າລະວັງຂອບເຂດບ້ານດັ່ງກ່າວ, ຕໍ່ກັບເຫດການດັ່ງກ່າວມານນັ້ນ ວິຊາການທີມງານລ້ຽງສັດຈາກແຂວງ ແລະ ອໍານາດການປົກຄອງເມືອງແມ່ນໄດ້ລົງເຜີຍແຜ່ຜົນຮ້າຍຂອງພະຍາດດັ່ງກ່າວ, ພ້ອມທັງສືກສາອົບຮົມການເມືອງແນວຄິດໃຫ້ປະຊາຊົນໃຫ້ເຂົ້າໃຈ, ເມື່ອປະຊາຊົນເຂົ້າໃຈແຈ້ງແລ້ວກໍ່ໄດ້ໃຫ້ການຮ່ວມມື ແລະ ພ້ອມກັນທໍາລາຍໝູໃນຂອບເຂດບ້ານທີ່ເກີດພະຍາດ ແລະ ບ້ານໃກ້ຄຽງ, ດ້ວຍການຂ້າໝູ ແລະ ຂຸດຂຸມຝັງໝູທັງໝົດ.

ດ້ວຍຄວາມເປັນຫ່ວງເປັນໄຍຂອງການນໍາແຂວງ ໄຊຍະບູລີ, ໃນລະຫວ່າງວັນທີ່ 23-25 ກັນຍາ ປີນີ້ ທ່ານ ພົງສະຫວັນ ສິດທະວົງ ພ້ອມດ້ວຍທີມງານ ໄດ້ລົງກວດກາເບິ່ງສະຖານທີ່ເກີດພະຍາດອະຫິວາໝູອາຟຣິກາ, ພ້ອມທັງໃຫ້ກໍາລັງໃຈປະຊາຊົນທີ່ໄດ້ຮັບຜົນກະທົບ ແລະ ພະນັກງານວິຊາການທີ່ລົງປະຕິບັດໜ້າທີ່ຕົວຈິງຢູ່ພື້ນທີ່ເກີດພະຍາດ, ໂອກາດດັ່ງກ່າວ ທ່ານ ເຈົ້າແຂວງ ຍັງໄດ້ຮຽກຮ້ອງໃຫ້ພໍ່ແມ່ປະຊາຊົນຈົ່ງໃຫ້ຄວາມຮ່ວມໄມ້ຮ່ວມມືໃນການທໍາລາຍໝູຖິ້ມ, ບໍ່ໃຫ້ເອົາໝູໄປຊຸກເຊື່ອງ, ບໍ່ໃຫ້ມີແນດຄິດປໍລະປັກ ຫຼື ຄຽດໃຫ້ກັບພະນັກງານທີ່ປະຕິບັດໜ້າທີ່ດັ່ງກ່າວ, ທັງນີ້ກໍ່ເພື່ອກໍາຈັດພະຍາດນີ້ໃຫ້ໝົດໄປ, ບໍ່ໃຫ້ມີການແຜ່ລາມໄປສູ່ເຂດອື່ນ ແລະ ຫ້າມປະຊາຊົນລ້ຽງໝູໃນໄລຍະທີ່ມີພະຍາດລະບາດເທື່ອ, ຮຽກຮ້ອງມາຍັງພະນັກງານທີ່ກ່ຽວຂ້ອງຂອງແຂວງ ແລະ ເມືອງ ຈົ່ງສືບຕໍ່ປູກຈິດສໍານຶກໃຫ້ປະຊາຊົນມີຄວາມໂລ່ງໃຈຕໍ່ເຫດການທີ່ເກີດຂຶ້ນ, ສືບຕໍ່ນໍາພາປະຊາຊົນແຕ່ລະບ້ານເຮັດອານາໄມ ແລະ ຂ້າເຊື້ອ ຕາມຄອກສັດ, ດ້ວຍການພົ່ນຢາຂ້າເຊື້ອ, ໂຮຍປູນຂາວ ໃຫ້ຖົ່ວເຖິງບໍລິເວນບ້ານ, ບ່ອນທີ່ໝູອາໄສຢູ່, ສືບຕໍ່ເຝົ້າລະວັງ ແລະ ອອກແຈ້ງການບັນດາບ້ານທີ່ພະຍາດລະບາດເປັນເຂດສີແດງ, ເຝົ້າລະວັງເຂດເຫຼືອງມົນທົນ 3 ກິໂລແມັດ ແລະ ບ້ານທົ່ວໄປຢ່າງໃກ້ສິດ.

 

ຂ່າວ-ພາບ:ອຸ່ນເຮືອນ ໂພທິລັກ