ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ພະຍາດໂຄວິດ-19 ກັບຜົນກະທົບທີ່ເກີດຂຶ້ນກັບກໍາມະກອນລາວ

ວັນທີ 1 ພຶດສະພາ ເປັນວັນທີ່ມີຄວາມໝາຍສໍາຄັນສໍາລັບກໍາມະກອນໃນທົ່ວໂລກ ເພາະເປັນວັນກໍາມະກອນສາກົນ ຊຶ່ງປີນີ້ໝູນວຽນມາຄົບຮອບ 134 ປີພໍດີ. ໃນແຕ່ລະປີ ຜ່ານມາ ພໍຮອດວັນທີ 1 ພຶດສະພາ ກໍາມະກອນໃນທົ່ວໂລກ, ໃນນີ້ ລວມທັງກໍາມະກອນຂອງລາວ ໄດ້ພ້ອມກັນຈັດກິດເພື່ອສະເຫລີມສະຫລອງວັນສຳຄັນນີ້ຢ່າງຄຶກຄື້ນມ່ວນຊື່ນ, ແຕ່ສໍາລັບປີນີ້ ເວົ້າໄດ້ວ່າບັນຍາກາດແຫ່ງການສະເຫລີມສະຫລອງວັນກໍາມະກອນສາກົນທີ່ເຄີຍຈັດຂຶ້ນຢູ່ຫລາຍປະເທດທົ່ວໂລກໃນໄລຍະຜ່ານມາ ຈະບໍ່ປະກົດໃຫ້ເຫັນອີກ ເນື່ອງຈາກການລະບາດຂອງພະຍາດໂຄວິດ-19 ທີ່ເຮັດໃຫ້ມີຜູ້ຕິດເຊື້ອ ແລະ ເສຍຊີວິດຍ້ອນພະຍາດຊະນິດນີ້ແລ້ວເປັນຈໍານວນຫລາຍຢູ່ຫລາຍກ່ວາ 200 ປະເທດທົ່ວໂລກ.  ຮ້າຍແຮງກ່ວານີ້ ການລະບາດຂອງພະຍາດໂຄວິດ-19 ໄດ້ສົ່ງຜົນກະທົບຕໍ່ກໍາມະກອນພາຍໃນປະເທດທີ່ມີການລະບາດຂອງພະຍາດຊະນິດນີ້ຢ່າງໜັກໜ່ວງສົມຄວນ ຍ້ອນວິສາຫະກິດ, ບໍລິສັດ ແລະ ໂຮງຈັກ-ໂຮງງານຕ່າງຯ ຕ້ອງໄດ້ຢຸດຕິການດໍາເນີນກິດຈະການຊົ່ວຄາວ ຈົນກ່ວາພະ ຍາດໂຄວິດ-19 ຈະຢຸດຕິການລະບາດ ເຮັດໃຫ້ກໍາມະກອນບໍ່ມີວຽກເຮັດງານທໍາ ແລະ ບໍ່ມີລາຍໄດ້ມາຮັບໃຊ້ໃນຄອບຄົວ.

ອີງຕາມຂໍ້ມູນຈາກອົງການແຮງງານສາກົນ ຫລື ໄອໂລ ໃຫ້ຮູ້ວ່າ: ການລະບາດຂອງພະຍາດໂຄວິດ-19 ເຮັດໃຫ້ແຮງງານ ກໍ່ຄື ກໍາມະກອນປະມານ 81 ສ່ວນຮ້ອຍຂອງຈໍານວນຫລາຍກວ່າ 3 ຕື້ 300 ລ້ານຄົນທົ່ວໂລກ ໄດ້ຮັບຜົນກະທົບ ແລະ ຄາດວ່າຈະມີພະນັກງານປະຈໍາກາຍເປັນຄົນວ່າງງານປະມານ 195 ລ້ານຄົນ.   ເວົ້າສະເພາະຢູ່ລາວເຮົາ ເຖີງວ່າຍັງບໍ່ມີຕົວເລກທີ່ແນ່ນອນກ່ຽວກັບກໍາມະກອນທີ່ຕ້ອງວ່າງງານຈາກການລະບາດຂອງພະຍາດໂຄວິດ-19 ແຕ່ກະຊວງ ແຮງງານ ແລະ ສະຫວັດດີການສັງຄົມ ໄດ້ປະເມີນໃນເບື້ອງຕົ້ນວ່າ ຈະມີກໍາມະກອນ ແລະ ຜູ້ອອກແຮງງານທີ່ເຮັດວຽກຢູ່ໃນຫົວໜ່ວຍແຮງງານທີ່ໄດ້ເຂົ້າໃນລະບົບປະກັນສັງຄົມໄປຂໍເງິນອຸດໜູນການວ່າງງານນໍາອົງການປະກັນສັງຄົມແຫ່ງຊາດປະມານ 1 ແສນຄົນ. ນອກຈາກນີ້ ຍັງມີແຮງງານລາວຈໍານວນຫລວງຫລາຍໄດ້ເດີນທາງກັບມາຈາກປະເທດໃກ້ຄຽງ ຍ້ອນໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ເຮັດໃຫ້ກໍາມະກອນເຫລົ່ານີ້ກາຍເປັນຄົນວ່າງງານທີ່ບໍ່ມີລາຍໄດ້ ແລະ ຍັງບໍ່ຮູ້ເທື່ອວ່າຈະມີໂອກາດກັບຄືນໄປເຮັດວຽກອີກມື້ໃດ ເພາະປະເທດທີ່ຕົນເອງເຮັດວຽກຢູ່ມີມາດຕະການຢ່າງເຂັ້ມງວດເພື່ອປ້ອງກັນການລະບາດຂອງພະຍາດໂຄວິດ-19.

ທ່ານ ວັນນາ ດວງພະຈັນ, ຮອງປະທານສູນກາງສະຫະພັນກໍາມະບານລາວ ໃຫ້ຮູ່ວ່າ: ຈາກການລະບາດຂອງພະຍາດໂຄວິດ-19 ທີ່ເກີດຂຶ້ນ ໄດ້ສົ່ງຜົນກະທົບຕໍ່ກໍາມະກອນ ແລະ ຜູ້ອອກແຮງງານລາວ ທັງຢູ່ພາຍໃນ ແລະ ຕ່າງປະເທດຢ່າງໜັກໜ່ວງ. ປັດຈຸບັນ ສູນກາງສະຫະພັນກໍາມະບານລາວ ພວມຮ່ວມກັບກະຊວງ ແຮງງານ ແລະ ສະຫວັດດີການສັງຄົມ ແລະ ສະພາການຄ້າ ແລະ ອຸດສາຫະກໍາແຫ່ງຊາດ ພວມຫາວິທີຊ່ວຍເຫລືອກຳມະກອນ ແລະ ຜູ້ອອກແຮງງານລາວທີ່ໄດ້ຮັບຜົນກະທົບ ຈາກນັ້ນຈະສະເໜີຕໍ່ລັດຖະບານເພື່ອຕົກລົງເຫັນດີ ຈິ່ງຈະສາມາດຈັດຕັ້ງປະຕິບັດໄດ້, ພ້ອມນີ້ ທ່ານໄດ້ຕາງໜ້າຄະນະບໍລິຫານງານສູນກາງສະຫະພັນກໍາມະບານລາວ ຮຽກຮ້ອງມາຍັງສະມາຊິກກໍາມະບານລາວ, ກໍາມະກອນ ແລະ ຜູ້ອອກແຮງງານລາວ ຈົ່ງສືບຕໍ່ປຸ້ມລຸມສາມັກຄີເປັນຈິດໜຶ່ງໃຈດຽວຍິ່ງກ່ວາເວລາໃດໝົດອົດທົນຜ່ານຜ່າໄລຍະທີ່ພະຍາດໂຄວິດ-19 ລະບາດ, ຈົ່ງເຊື່ອໝັ້ນຕໍ່ການນໍາພາຂອງພັກ ແລະ ລັດຖະບານ, ຍົກສູງສະຕິລະມັດລະວັງຕົວຕໍ່ກົນອຸບາຍຕົວະຍົວະຫລອກລວງຂອງກຸ່ມຄົນບໍ່ຫວັງດີ ແລະ ປະກອບສ່ວນສ້າງສາ ແລະ ພັດທະນາປະເທດຊາດໃຫ້ນັບມື້ຈະເລີນກ້າວໜ້າຂຶ້ນໄປເລື້ອຍຯ.

ການສະເຫລີມສະຫລອງວັນກໍາມະກອນສາກົນ ວັນທີ 1 ພຶດສະພາ ຄົບຮອບ 134 ປີໃນປີນີ້ ແມ່ນຢູ່ໃນໄລຍະເວລາຂອງການຈັດຕັ້ງປະຕິບັດມາດຕະການປ້ອງກັນ, ແລະ ແກ້ໄຂການລະ ບາດຂອງພະຍາດໂຄວິດ-19 ເຮັດໃຫ້ສູນກາງສະຫະພັນກໍາມະບານລາວມີຄວາມຈໍາເປັນຕ້ອງໄດ້ຢຸດຕິທຸກກິດຈະກໍາການເຄື່ອນໄຫວໂຮມຊຸມນຸມ ເພື່ອສະແດງຄວາມສາມັກຄີກັບເພື່ອນກຳມະກອນທົ່ວໂລກດັ່ງທີ່ເຄີຍປະຕິບັດໃນຊຸມປີຜ່ານມາ. ຢ່າງໃດກໍ່ຕາມ ໃນໂອກາດນີ້ ຂໍຮຽກຮ້ອງມາຍັງລັດຖະບານ ກໍ່ຄື ທຸກພາກ ສ່ວນກ່ຽວຂ້ອງທີ່ຮັບຜິດຊອບເບິ່ງແຍງຊີວິດການເປັນຢູ່ຂອງກໍາມະກອນລາວ ຈົ່ງໃຫ້ການອູ້ມຊູຊ່ວຍ ເຫລືອກໍາມະກອນລາວທຸກຄົນທີ່ປະສົບວິກິດທີ່ເກີດຂຶ້ນຈາກການລະບາດຂອງພະຍາດໂຄວິດ-19 ໃນຄັ້ງນີ້ຢ່າງເໝາະສົມທີ່ສຸດ ເພື່ອໃຫ້ເຂົາເຈົ້າມີຊີວິດການເປັນຢູ່ກັບຄືນສູ່ສະພາບປົກກະຕິໂດຍໄວ. ຄຽງຄູ່ກັນນີ້ ຂໍຮຽກຮ້ອງມາຍັງກໍາມະກອນ ກໍ່ຄື ຜູ້ອອກແຮງງານລາວໝົດທຸກຄົນຈົ່ງເຊື່ອໝັ້ນຕໍ່ການຊີ້ນໍາຯ ພາ ແລະ ຢູ່ຄຽງຂ້າງພັກ-ຄຽງຂ້າງລັດ, ມີຄວາມານະອົດທົນເປັນເຈົ້າການເພີ່ງຕົນເອງ ແລະສ້າງຄວາມເຂັ້ມແຂງດ້ວຍຕົນເອງສູງ ດ້ວຍການເສີມຂະຫຍາຍມາດແທ້, ມູນເຊື້ອອັນດີງາມ ແລະ ຄຸນລັກສະນະທີ່ດີເລີດຂອງຊົນຊັ້ນກໍາມະກອນລາວທີ່ເຄີຍມີມາ ຈິ່ງຈະເຮັດໃຫ້ຕົນເອງຜ່ານຜ່າຄວາມຫຍຸ້ງຍາກຈາກວິກິດການທີ່ເກີດຂຶ້ນຍ້ອນການລະບາດຂອງພະຍາດໂຄວິດ-19 ໃນຄັ້ງນີ້ ໄດ້ຢ່າງຍືນຍົງ ແລະ ສືບຕໍ່ເປັນກະດູກສັນຫລັງທີ່ແຂງແຮງທົນທານຂອງປະເທດຊາດໄດ້ຕະຫລອດໄປ.

 

ຂຽນບົດ: ບຸນຕຽງ ຈັນທະວົງ