ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ພະຍຸລະດູຮ້ອນພັດໂຮງຮຽນປະຖົມ ບ້ານ ນາກວາງ ເມືອງ ໄຊຍະບູລີ ເສຍຫາຍ 20 ລ້ານກວ່າກີບ

ຕາມການລາຍງານຂອງຄະນະບ້ານ-ບ້ານ ນາກວາງ ເມືອງ ໄຊຍະບູລີ, ແຂວງ ໄຊຍະບູລີ ໄດ້ໃຫ້ຮູ້ວ່າ: ເວລາ 14 ໂມງ 00 ນາທີ ຂອງວັນທີ 13 ພຶດສະພາ 2020 ນີ້, ໄດ້ມີລົມພະຍຸລະດູຮ້ອນພັດໃສ່ໂຮງຮຽນປະຖົມສົມບູນ ບ້ານ ນາກວາງ ເຮັດໃຫ້ໂຮງຮຽນດັ່ງກ່າວໄດ້ຮັບຜົນເສຍຫາຍຢ່າງໜັກເຊັ່ນ: ຫຼັງຄາຮື້ໝົດທັງຫຼັງ, ຝາທີ່ກໍ່ດ້ວຍດິນຈີ່ຫັກພັງລົງ 2 ດ້ານ, ອຸປະກອນການຮຽນ-ການສອນໄດ້ຖືກເປ່ເພຈໍານວນໜຶ່ງ, ລວມມູນຄ່າການເສຍຫາຍທີ່ໄດ້ປະເມີນເບື້ອງຕົ້ນ 23 ລ້ານກວ່າກີບ, ເຫດການທີ່ເກີດຂຶ້ນນັ້ນແມ່ນບໍ່ມີປະຊາຊົນ ແລະ ນັກຮຽນໄດ້ຮັບບາດເຈັບແຕ່ຢ່າງໃດ ເພາະເປັນຊ່ວງໄລຍະພັກຮຽນ, ຕໍ່ກັບເຫດການດັ່ງກ່າວ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມດ້ວຍພາກສ່ວນທີ່ກ່ຽວຂ້ອງໄດ້ລົງກວດກາເບິ່ງຄວາມເສຍຫາຍຕົວຈິງທີ່ໂຮງຮຽນດັ່ງກ່າວ ໃນຕອນເຊົ້າຂອງວັນທີ່ 14 ພຶດສະພາ 2020, ນໍາພາລົງເບິ່ງຕົວຈິງໂດຍ ທ່ານ ນາງ ພິລາວັນ ອົງແກ້ວ ຮອງເຈົ້າເມືອງ ໄຊຍະບູລີ ພ້ອມດ້ວຍອໍານາດການປົກຄອງບ້ານ-ບ້ານ ນາກວາງ ແລະ ຄະນະໂຮງຮຽນປະຖົມ ບ້ານ ນາກວາງ, ໂອກາດດັ່ງກ່າວ ທ່ານເຈົ້າແຂວງກໍ່ໄດ້ມອບສັງກະສີຈໍານວນ 350 ແຜ່ນ ແລະ ເຫຼັກຕະປູໝວກ 70 ກັບ ລວມມູນຄ່າທັງໝົດເກືອບ 14 ລ້ານກີບ ແລະ ໄດ້ຮຽກຮ້ອງໃຫ້ອໍານາດການປົກຄອງບ້ານ ແລະ ຄະນະໂຮງຮຽນຈົ່ງຮີບຮ້ອນສ້ອມແປງໂຮງຮຽນໃຫ້ກັບມາໃຊ້ໄດ້ປົກກະຕິເພາະຈະໄດ້ມີການເປີດການຮຽນ-ການສອນຊັ້ນປໍ5 ໃນມໍ່ໆນີ້, ພ້ອມທັງເປັນເຈົ້າການໃນການເຝົ້າລະວັງລົມພະຍຸລະດູຮ້ອນ ແລະ ປະກົດການທາງທໍາມະຊາດເຊັ່ນ ປະກົດການຟ້າຜ່າ ແລະ ອື່ນໆທີ່ອາດຈະເກີດຂຶ້ນ, ພ້ອມດຽວກັນກໍ່ຕ້ອງສຶກສາອົບຮົມລູກຫຼານພາຍໃນບ້ານໃຫ້ຫຼີກລ່ຽງຈາກບັນຫາປະກົດການຫຍໍ້ທໍ້ ເປັນຕົ້ນແມ່ນ ບັນຫາຢາເສຍຕິດ ແລະ ອື່ນໆ, ຊຸກຍູ້ ແລະ ສົ່ງເສີມປະຊາຊົນຫັນຈາກການປູກພືດແບບທໍາມະຊາດ, ມາສູ່ການຜະລິດແບບໃໝ່, ໂດຍນໍາໃຊ້ເຕັກນິກ, ກົນຈັກເຂົ້າຊ່ວຍ ແລະ ປູກພືດອຸດສາຫະກໍາເປັນສິນຄ້າໃຫ້ຫຼາຍ.

ຂ່າວ-ພາບ: ອຸ່ນເຮືອນ ໂພທິລັກ

ນັກຂ່າວຫ້ອງວ່າການແຂວງ ໄຊຍະບູລີ