ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ພະນະທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແຫ່ງ ສປປ ລາວ ແລະ ຄະນະ ເດີນທາງເຂົ້າຮ່ວມງານວາງສະແດງສິນຄ້າ ຈີນ-ອາຊຽນ ຄັ້ງທີ 15, ທີ່ ນະຄອນໜານໜິງ, ສປ. ຈີນ

ໂດຍຕອບສະໜອງຕາມຄຳເຊີນຂອງ ລັດຖະບານ ແຫ່ງ ສາທາລະນະລັດ ປະຊາຊົນ ຈີນ, ໃນວັນທີ 11 ກັນ​ຍາ 2018, ພະນະທ່ານ ສົມ​ດີ ດວງ​ດີ, ຮອງນາຍົກລັດຖະມົນຕີ, ລັດ​ຖະ​ມົນ​ຕີ​ກະ​ຊວງ​ການ​ເງິນ ແຫ່ງ ສາທາລະນະລັດ ປະຊາທິປະໄຕ ປະຊາຊົນ ລາວ ໄດ້ນຳພາຄະນະຜູ້ແທນຂັ້ນສູງຂອງ ສ​ປ​ປ ລາວ ເດີນທາງ​ເຂົ້າ​ຮ່ວມ​ງານວາງສະແດງ ສິນຄ້າ ຈີນ-ອາຊຽນ ຄັ້ງທີ 15, ຊື່ງ​ມີ​ກຳ​ນົດ​ຈັດ​ຂື້ນ​ແຕ່​ວັນ​ທີ 12-15 ກັນ​ຍາ 2018 ທີ່ ນະ​ຄອນ​ໜານ​ໜິງ, ແຂວງ ກວາງ​ຊີ, ສ​ປ. ຈີນ. ການເຂົ້າຮ່ວມງານວາງສະແດງ ຂອງ ພະນະທ່ານ ສົມ​ດີ ດວງ​ດີ ໃນຄັ້ງນີ້ ເປັນການສືບຕໍ່ເສີມຂະຫຍາຍ ສາຍພົວພັນອັນດີ ລະຫວ່າງ ລັດຖະບານສອງປະເທດ ແລະ ປະຊາຊົນ ສອງຊາດ ລາວ-ຈີນ ໃຫ້ແໜ້ນແຟ້ນຍິ່ງຂຶ້ນ.

ງານວາງ​ສະ​ແດງ​ສີນ​ຄ້າ ຄັ້ງ​ນີ້ ຈັດ​ຂຶ້ນ​ເປັນຄັ້ງທີ 15 ພາຍ​ໃຕ້​ຄຳ​ຂວັນ: “ການ​ຮ່ວມ​ມື​ກັນ​ສ້າງ​ເສັ້ນທາງ​ສາຍໄໝ​ແຫ່ງ​ສັດຕະວັດ​ທີ 21, ເພື່ອ​ສົ່ງ​ເສີມ​ປະຊາ​ຄົມ​ແຫ່ງນະ​ວັດຕະ​ກຳ ຈີນ ​ແລະ ອາຊຽນ”. ພ້ອມກັນນີ້, ງານວາງສະແດງ ສິນຄ້າ ຈີນ-ອາຊຽນ ປະຈຳປີຄັ້ງນີ້ ເປັນປີທີ່ມີຄວາມໝາຍສຳຄັນເປັນພິເສດ ເນື່ອງຈາກເປັນປີແຫ່ງການສະເຫລີມສະຫລອງ ການເປັນ​ຄູ່​ຮ່ວມ​ຍຸດ​ທະ​ສາດ ອາຊຽນ ແລະ ​ສ​ປ.ຈີນ ຄົບຮອບ 15 ປີ ແລະ ຍັງ​ເປັນປີແຫ່ງການ​ຮ່ວມ​ມື​ດ້ານ​ນະ​ວັດ​ຕະ​ກຳ ລະ​ຫວ່າງ ອາ​ຊຽນ ແລະ ສ​ປ. ຈີນ, ເຊີ່ງ ອາ​ຊຽນ ແລະ ສ​ປ ຈີນ ກໍ່​ຈະ​ໄດ້​ແລກ​ປ່ຽນ​ບົດ​ຮຽນ ແລະ ຮ່ວມ​ມື​ກັນ ​ໂດຍ​ຜ່ານ​ການ​ຈັດຕັ້ງປະຕິບັດບັນດາ​ກິດຈະກຳຕ່າງໆ ​ເພື່ອ​ເປັນ​ການ​ເພີ່ມ​ທະວີ​ການ​ຮ່ວມ​ມື​​ໃນ​ຂົງ​ເຂດ ​ເຕັກ​ໂນ​ໂລ​ຊີ​ທັນ​ສະ​ໄໝ ​ແລະ ​ເສດຖະກິດ ດີ​ຈີ​ຕອນ.

ໃນ​ໂອ​ກາດ​ເຂົ້າຮ່ວມງານວາງສະແດງຄັ້ງນີ້, ທ່ານ​ຮອງ​ນາ​ຍົກ​ລັດ​ຖະ​ມົນ​ຕີ ​ໄດ້​ພົບ​ປະ​ສອງ​ຝ່າຍ ກັບ​ທ່ານ ຫາງເຈິ້ງ (Han Zheng), ຮອງ​ນາຍົກລັດຖະມົນຕີ ​ແຫ່ງ ສປ. ຈີນ, ເຊິ່ງ​ທັງ​ສອງ​ຝ່າຍໄດ້​ຕີ​ລາ​ຄາ​ສູງ​​ຕໍ່ການ​ພົວ​ພັນ​ແບບ​ຄູ່​ຮ່ວມ​ມື​ຍຸດ​ທະ​ສາດ​ຮອບ​ດ້ານ​ ລະ​ຫວ່າງ ສ​ປ​ປ​ ລາວ – ສ​ປ.ຈີນ. ພ້ອມ​ກັນ​ນີ້, ກໍ່​ໄດ້​ປຶກສາຫາລືການ​ຮ່ວມ​ມື​ສອງຝ່າຍດ້ານ​ເສດ​ຖະ​ກິດ, ການ​ຄ້າ, ການ​ລົງ​ທຶນ, ວັດ​ທະ​ນະ​ທຳ-ສັງ​ຄົມ​, ການ​ທ່ອງ​ທ່ຽວ ແລະ ການ​ຊ່ວຍ​ເຫຼືອ​ເພື່ອ​ການ​ພັ​ດ​ທະ​ນາ.

ທ່ານ ຮອງ​ນາ​ຍົກ​ລັດ​ຖະ​ມົນ​ຕີ ຍັງ​ໄດ້​ໄປ​ຢ້ຽມ​ຢາມ​ຮ້ານ​ວາງ​ສະ​ແດງ​ແຫ່ງ​ຊາດ​ຂອງ​ລາວ, ເຊິ່ງ​ໃນ​ປີ​ນີ້​ແມ່ນ​ແຂວງ ວຽງ​ຈັນ ​ຖືກ​ຄັດ​ເລືອ​ກເປັນ​ເມືອງ​ແຫ່ງ​ສະ​ເໜ່ ຂອງ ສ​ປ​ປ ລາວ. ນອກຈາກຄະນະຜູ້ແທນທາງການແລ້ວ ຍັງມີພາກສ່ວນ ທຸລະກິດ ຂອງ ສ​ປ​ປ ລາວ ເຂົ້າຮ່ວມ ໃນງານວາງສະແດງໃນຄັ້ງນີ້ ອີກດ້ວຍ, ຊື່ງການເຂົ້າຮ່ວມ ງານວາງສະແດງສິນຄ້າ ຂອງນັກທຸລະກິດລາວສຳລັບປີນີ້ ຈະມີຮ້ານວາງສະແດງທັງໝົດ 82 ຮ້ານ ຈາກ 52 ບໍລິສັດ ແລະ ຜະລິດຕະພັນສິນຄ້າ ສ່ວນ​ໃຫຍ່ຂອງ ສ​ປ​ປ ລາວ ທີ່ຈະນຳໄປວາງສະແດງໃນງານຄັ້ງນິ້ີ້ ມີ: ​ຜະ​ລິດ​ຕະ​ພັນ​ໄມ້​ແກະ​ສະຫຼັກ, ເຄື່ອງເຟີນີເຈີ, ຜະລິດ ຕະພັນເຄື່ອງປະດັບ, ເຄື່ອງຫັດຖະກຳ, ເຄື່ອງອຸດສາຫະກຳ ແລະ ການໂຄສະນາການທ່ອງທ່ຽວ.

ງານວາງ ສະແດງສິນຄ້າ ຈີນ-ອາຊຽນ ແມ່ນຈັດຂື້ນທຸກໆປີ ນັບຕັ້ງແຕ່ ປີ 2004 ເປັນຕົ້ນມາ, ເຊິ່ງໄດ້ປະກອບ ສ່ວນອັນສຳຄັນ ໃຫ້ແກ່ການຮັດແໜ້ນການຮ່ວມມືທາງດ້ານເສດຖະກິດ ແລະ ການຄ້າ ແລະ ການຂະຫຍາຍໂຕ ທາງດ້ານການລົງທຶນ, ພ້ອມທັງປະກອບ ສ່ວນໃຫ້ແກ່ການຮັດແໜ້ນການຮ່ວມມື ແລະ ການເປັນຄູ່ຮ່ວມຍຸດທະສາດ ລະຫວ່າງ ອາຊຽນ ແລະ ຈີນ.

ຂ່າວຈາກ:

ກົມການຂ່າວ
ກະຊວງການຕ່າງປະເທດ