ວັນທີ 18 ມິຖຸນາ 2024 ນີ້ ການນໍາ ເມືອງແອດພ້ອມດ້ວຍ ນາຍ ແລະ ພົນທະຫານ, ນາຍ ແລະ ພົນຕໍາຫຼວດ ຕະຫຼອດຮອດພະນັກງານລັດຖະກອນ, ຄະນະພັກອໍານາດການປົກຄອງບ້ານອ້ອມຂ້າງເມືອງແອດໄດ້ເຂົ້າຮັບຟັງການໂອ້ລົມ ຂອງ ທ່ານ ຄໍາແພງ ໄຊສົມແພງ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຫົວພັນຢູ່ທີ່ສະໂມສອນກອງບັນຊາການ ປກສ ເມືອງ, ມີພາກສ່ວນກ່ຽວຂ້ອງຂັ້ນແຂວງເຂົ້າຮ່ວມຮັບຟັງ.
ກ່ອນອື່ນ ທ່ານ ພ້ອມຄະນະໄດ້ຮັບຟັງ ບົດລາຍງານໂດຍຫຍໍ້ກ່ຽວກັບການພັດທະນາເສດຖະກິດ-ສັງຄົມ ຂອງເມືອງແອດໃນໄລຍະຜ່ານມາຈາກ ທ່ານ ວັນເພັດ ສີບຸນແສງ ເລຂາພັກເມືອງ ເຈົ້າເມືອງໆແອດ, ທົ່ວເມືອງມີ 16 ຮາກຖານພັກ, ມີ 117 ໜ່ວຍພັກ, ມີສະມາຊິກພັກທັງໝົດ 2,080 ສະຫາຍ ຍິງ 423 ສະຫາຍ, ປະເມີນໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນມີ 94 ໜ່ວຍ, ໜ່ວຍພັກກາງ 23 ໜ່ວຍ, ເມືອງແອດສ້າງຕັ້ງຂຶ້ນໃນວັນທີ 10 / 10 / 1997, ຕັ້ງຢູ່ທາງທິດຕາເວັນອອກສ່ຽງເໜືອ ຂອງແຂວງຫົວພັນ ຫ່າງຈາກເທດສະບານ ແຂວງ 135 ກມ ,ມີຊາຍແດນຕິດກັບ 02 ເມືອງຂອງ ສສ ຫວຽດນາມ ຄື: ເມືອງຊົ່ງມ່າ ແລະ ເມືອງ ສົບກົບ ແລະ ຕິດກັບ 03 ເມືອງ ຂອງແຂວງຫົວພັນ ຄື: ເມືອງຊຽງຄໍ້, ເມືອງຊໍາເໜືອ ແລະ ເມືອງຊ່ອນ, ເມືອງແອດ ມີ 77 ບ້ານ, ມີພົນລະເມືອງ 28.482 ຄົນ, ຍິງ 13,799 ຄົນ; ປະກອບມີ 6 ເຜົ່າຄື: ເຜົ່າລາວ, ເຜົ່າໄຕ, ເຜົ່າມົ້ງ, ເຜົ່າກຶມມຸ, ເຜົ່າອິວມຽນ ແລະ ເຜົ່າຊິງມູນ, ມີບ້ານພົ້ນທຸກ 14 ບ້ານ, ຍັງມີບ້ານທຸກຍາກ 63 ບ້ານ, ຄອບຄົວທຸກຍາກ 2,487 ຄອບຄົວ, ພື້ນຖານໂຄງລ່າງພາຍໃນເມືອງໄດ້ຮັບການພັດທະນາດີຂຶ້ນໂດຍສະເພາະແມ່ນ ມີເສັ້ນທາງເຂົ້າໄປເຖິງທຸກບ້ານ, ມີບ້ານໄດ້ຊົມໃຊ້ໄຟຟ້າແລ້ວ 64 ບ້ານ, ມີລະບົບສັນຍານໂທລະຄົມກວມເອົາ 85% ໃນທົ່ວເມືອງ, ມີຊົນລະປະທານສາມາດຫົດເນື້ອທີ່ນາໄດ້ 85% ເມືອງແອດ ມີເນື້ອທີ່ນາ 1ພັນ 3 ຮ້ອຍກ່ວາ ຮຕ, ປູກຕົ້ນໄມ້ໃຫ້ໝາກ 550 ຮຕ. ເປັນເຂດທີ່ມີອາກາດຮ້ອນຊຸ່ມເໝາະແກ່ການປູກຝັງ-ລ້ຽງສັດ, ສະນັ້ນ ເມືອງຈິ່ງໄດ້ກໍານົດເອົາ 04 ທ່າແຮງ ໃນການພັດທະນາເສດຖະກິດ-ສັງຄົມເປັນຕົ້ນແມ່ນ: ການປູກຝັງ, ລ້ຽງສັດ, ການບໍລິການ-ການທ່ອງທ່ຽວ ແລະ ການຄ້າຂອງຊາຍແດນ ນອກຈາກນີ້ຍັງໄດ້ ຈັດແບ່ງເຂດຈຸດສຸມໃນການສົ່ງເສີມການຜະລິດອອກເປັນ 10 ເຂດ. ພ້ອມນີ້ໄດ້ສ້າງເງື່ອນໄຂຄວາມສະດວກໃນການສົ່ງເສີມການລົງທຶນ ດຶງດູດນັກທຸລະກິດພາຍໃນ ແລະ ຕ່າງປະເທດເຂົ້າມາລົງໃນພື້ນຖານໂຄງລ່າງຂອງເມືອງແອດໃຫ້ຫຼາຍຂື້ນ.
ຜ່ານການຈັດຕັ້ງປະຕິບັດ ໃນໄລຍະຜ່ານມາເຫັນວ່າ ເສດຖະກິດມີການຂະຫຍາຍຕົວບັນລຸໄດ້ 4,25%; ລວມຍອດຜະລິດຕະພັນສັງຄົມບັນລຸໄດ້ ປະມານ 183ຕື້ກວ່າກີບ ໃນນີ້ ກະສິກໍາ ກວມ 56,86%, ອຸດສາຫະກໍາ ກວມ 32,05% ແລະ ບໍລິການ 11,09%, ສະເລ່ຍພົນລະເມືອງຜູ້ໜຶ່ງມີລາຍຮັບ 6 ລ້ານກວ່າ ກີບ ຄົນ /ປີ .
ໂອກາດນີ້, ທ່ານ ຄໍາແພງ ໄຊສົມແພງ ເຈົ້າແຂວງຫົວພັນ ຍັງເນັ້ນໜັກຫຼາຍບັນຫາໃຫ້ພະນັກງານຫຼັກແຫຼ່ງ, ນາຍແລະພົນທະຫານ, ນາຍ ແລະ ພົນຕໍາຫຼວດ ແລະ ປະຊາຊົນ ເມືອງແອດ ໂດຍທ່ານ ໄດ້ຕີລາຄາສູງຕໍ່ການນຳພາຊີ້ນຳຂອງຄະນະນຳເມືອງ ແລະ ພາກສ່ວນກ່ຽວຂ້ອງ ໃນການພັດທະນາວຽກງານຮອບດ້ານຂອງເມືອງແອດ ແລະ ສະແດງຄວາມຍ້ອງຍໍຊົມເຊີຍ ຕໍ່ບັນດາຜົນງານທີ່ເມືອງສາມາດຍາດໄດ້ຜົນງານຫຼາຍດ້ານ ໃນໄລຍະຜ່ານມາ. ພ້ອມນັ້ນ ທ່ານຍັງໄດ້ໃຫ້ທິດຊີ້ນຳຕໍ່ອຳນາດການປົກຄອງ ແລະ ປະຊາຊົນພາຍໃນເມືອງແອດ ຕ້ອງພ້ອມກັນເອົາໃຈໃສ່ຈັດຕັ້ງປະຕິບັດ ໂດຍທ່ານໄດ້ຮຽກຮ້ອງໃຫ້ສືບຕໍ່ກຳແໜ້ນທັດສະນະຕົ້ນຕໍ ຂອງມະຕິຄັ້ງທີ 10 ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ ຄັ້ງທີ 11 ຂອງແຂວງ, ເປັນເຈົ້າການກວດກາ-ຕິດຕາມ-ຊຸກຍູ້ ແລະ ຈັດຕັ້ງປະຕິບັດແຜນວຽກໃນຂົງເຂດວຽກງານທີ່ຕົນຮັບຜິດຊອບ ໃຫ້ມີຜົນສຳເລັດຕາມແຜນການທີ່ວາງໄວ້, ປັບປຸງ ແບບແຜນວິທີ່ເຮັດວຽກ ໃຫ້ມີຄວາມສອດຄ່ອງກັບສະພາບຄວາມເປັນຈິງ, ສ້າງຄວາມສາມັກຄີພາຍໃນ-ພາຍນອກໃຫ້ແໜ້ນແຟ້ນ, ເປັນເອກະພາບພາຍໃນຄະນະ, ຮັບປະກັນວຽກງານການເມືອງແນວຄິດ ພາຍໃນຖັນແຖວພະນັກງານ-ລັດຖະກອນ ແລະ ປະຊາຊົນບັນດາເຜົ່າໃຫ້ເຂັ້ມແຂງໜັກແໜ້ນ, ປະຕິບັດແຜນພັດທະນາເສດຖະກິດ-ສັງຄົມຂອງເມືອງໃຫ້ມີຜົນສໍາເລັດ, ເອົາໃຈໃສ່ປະຕິບັດ ສອງວາລະແຫ່ງຊາດ ເພື່ອແກ້ໄຂບັນຫາເສດຖະກິດ-ການເງິນ ແລະ ຕ້ານ-ສະກັດກັ້ນບັນຫາຢາເສບຕິດ, , ຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍພາຍໃນເມືອງຂອງຕົນ, ຕິດຕາມຊຸກຍູ້ການປູກການລ້ຽງຂອງ ປະຊາຊົນ ໃຫ້ກາຍເປັນສິນຄ້າໃຫ້ຫຼາຍຂຶ້ນ, ເພື່ອເຮັດໃຫ້ການພັດທະນາເສດຖະກິດຂອງເມືອງ ມີທ່າກ້າວຂະຫຍາຍຕົວຂຶ້ນເລື້ອຍໆ.
ຂ່າວ: ວັນແສງ
