ສະຖາບັນສື່ມວນຊົນ ແລະ ໂຄສະນາ, ສະຖາບັນການເມືອງແຫ່ງຊາດ ໂຮ່ຈີ່ມິງ ສສ ຫວຽດນາມ ຈັດຝຶກອົບຮົມບໍາລຸງວຽກງານຄຸ້ມຄອງສື່ ໃຫ້ພະນັກງານຫລັກແຫລ່ງຄຸ້ມຄອງສື່ມວນລາວ ທີ່ມາຈາກກົມສື່ມວນຊົນ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ສໍານັກຂ່າວສານປະເທດລາວ, ວິທະຍຸກະຈາຍສຽງແຫ່ງຊາດລາວ, ໂທລະພາບແຫ່ງຊາດລາວ, ໜັງສືພິມພາສາຕ່າງປະເທດ, ໜັງສືພິມປະຊາຊົນ, ສູນກາງສະຫະພັນກໍາມະບານລາວ, ກົມໂຄສະນາອົບຮົມ ກະຊວງປ້ອງກັນປະເທດ, ພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຂວງບໍ່ແກ້ວ, ອຸດົມໄຊ, ຫລວງພະບາງ, ບໍລິຄໍາໄຊ, ສາລະວັນ, ເຊກອງ ແລະ ແຂວງອັດຕະປື.
ພິທີເປີດຊຸດຝຶກອົບຮົມດັ່ງກ່າວ, ຈັດຂຶ້ນໃນວັນທີ 17 ກັນຍາ 2024 ທີ່ສະຖາບັນສື່ມວນຊົນ ແລະ ໂຄສະນາ ນະຄອນຫລວງຮ່າໂນ້ຍ ສສ ຫວຽດນາມ ໂດຍການເຂົ້າຮ່ວມຂອງ ທ່ານ ຮ່ວງ ວັນ ເຫງ້ຍ ຫົວໜ້າກົມຮ່ວມມືສາກົນ, ສະຖາບັນການເມືອງແຫ່ງຊາດໂຮ່ຈີມິງ, ທ່ານ ຟ້າມມິງເຊີນ ຫົວໜ້າສະຖາບັນສື່ມວນຊົນ ແລະ ໂຄສະນາ ສສ ຫວຽດນາມ, ທ່ານ ວັນເພງ ໄພຍະມາດ ເລຂາເອກ ຕາງໜ້າສະຖານເອກອັກຄະລັດຖະທູດແຫ່ງ ສປປ ລາວ ປະຈໍາ ສສ ຫວຽດນາມ ພ້ອມດ້ວຍຄູອາຈານ ແລະ ສຳມະນາກອນ ເຂົ້າຮ່ວມ. ທັງນີ້, ກໍເພື່ອສ້າງຄວາມເຂັ້ມແຂງໃຫ້ພະນັກງານຫລັກແຫລ່ງ ໃນຂົງເຂດສື່ມວນຊົນຂອງລາວ ໃນວຽກງານຄຸ້ມຄອງສື່ ໂດຍຈະເນັ້ນໜັກບັນຫາໃໝ່ໆທີ່ສຳຄັນໃນສະພາບປັດຈຸບັນ ຊຶ່ງນອກຈາກຮຽນທິດສະດີແລ້ວ ຍັງຈະໄດ້ລົງພາກປະຕິບັດຕົວຈິງ ແລະ ໄປເຄື່ອນໄຫວທັດສະນາສຶກສາ, ແລກປ່ຽນບົດຮຽນຢູ່ບັນດາສຳນັກງານຂອງສື່ມວນຊົນ ຢູ່ນະຄອນຫລວງຮ່າໂນ້ຍ ແລະ ບາງທ້ອງຖິ່ນຂອງ ສສ ຫວຽດນາມ ຕື່ມອີກ.
ທ່ານ ຟ້າມ ມິງ ເຊີນ ໄດ້ມີຄຳເຫັນວ່າ: ການຝຶກອົບຮົມວຽກງານຄຸ້ມຄອງສື່ມວນຊົນ ໃຫ້ພະ ນັກງານຫລັກແຫລ່ງສື່ມວນຂອງລາວ ແມ່ນວຽກງານໜຶ່ງທີ່ສຳຄັນທີ່ສຸດທາງດ້ານການເມືອງ ຂອງສະຖາບັນສື່ມວນຊົນ ແລະ ໂຄສະນາຫວຽດນາມ, ທັງນີ້ກໍເພື່ອສ້າງຄວາມເຂັ້ມແຂງໃນການເປັນຜູ້ນຳ ແລະ ພະນັກງານນຳພາຄຸ້ມຄອງສື່ມວນຊົນ ຂອງລາວໃນຕໍ່ໜ້າ, ນັບແຕ່ປີ 2012 ມາຮອດປັດຈຸບັນ, ສະຖາບັນໄດ້ສຳເລັດການຈັດຝຶກອົບຮົມໃຫ້ຜູ້ບໍລິຫານ ແລະ ພະນັກງານຄຸ້ມຄອງສື່ມວນຊົນລາວ 7 ຊຸດ ໂດຍມີນັກສຶກສາທີ່ຮຽນຈົບທັງໝົດ 147 ຄົນ.
