ວັນທີ 31 ພຶດສະພາ 2024 ນີ້ ອົງການປົກຄອງແຂວງຫຼວງພະບາງ ໄດ້ຈັດຂະບວນການປູກຕົ້ນໄມ້ ໂອກາດວັນປູກຕົ້ນໄມ້ແຫ່ງຊາດ ວັນທີ 1 ເດືອນມິຖຸນາ 2024, ຢູ່ເຂດພູພືງ ບ້ານດອນກາງ ນະຄອນຫຼວງພະບາງ, ມີ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ, ພ້ອມດ້ວຍຕ່າງໆ ເຂົ້າຮ່ວມ.
ທ່ານ ສີວອນ ວົງຄຳຈັນ ຫົວໜ້າພະແນກກະສິກໍາ ແລະ ປ່າໄມ້ ແຂວງຫຼວງພະບາງ ໄດ້ລາຍງານແຜນການກະກຽມການປູກຕົ້ນໄມ້ໃນປີນີ້ວ່າ: ໃນປີນີ້ ທົ່ວແຂວງຫຼວງພະບາງ ຈະປູກຕົ້ນໃນເນື້ອທີ່ 500 ກວ່າເຮັກຕາ, ມີເບ້ຍໄມ້ທັງໝົດ 2 ລ້ານເບ້ຍ, ສະເພາະການເປີດຂະບວນການປູກຕົ້ນໄມ້ໃນວັນທີ 1 ມິຖຸນາ ອົງການປົກຄອງແຂວງ ຈະຈັດພິທີປູກຢູ່ບ້ານດອນກາງ ຂອບເຂດພູພືງ ພູຜາທູນ ແລະບໍລິເວນນ້ຳຕົກຕາດກວາງຊີ ເຊິ່ງເປັນປ່າສະຫງວນຂອງແຂວງ, ໂດຍຈະປູກໃຫ້ໄດ້ 3,3 ເຮັກຕ່າ ລວມມີເບ້ຍໄມ້ 4.700 ເບ້ຍ, ໃນນັ້ນ ໄດ້ເລັ່ງໃສ່ຕົ້ນໄມ້ຮັກສາແຫຼ່ງນ້ຳ ເຊັ່ນ: ຕົ້ນສົ້ມຝາດ, ກົກທອງ, ໄມ້ເຕ່ນ ແລະອື່ນໆ, ສ່ວນບັນດາເມືອງຈະຈັດຂະບວນການປູກຕາມເງື່ອນໄຂ ລວມເນື້ອທີ່ການປູກປະມານ 155 ເຮັກຕາ, ມີເບ້ຍໄມ້ທັງໝົດ 28.100 ເບ້ຍ,
ນອກຈາກປູກເປັນຂະບວນການໃນວັນທີ 1 ມິຖຸນາ ຈະມີການສືບຕໍ່ປູກຕົ້ນໄມ້ຈົນກວ່າຈະສີ້ນສຸດລະດູຝົນ ໃຫ້ບັນລຸຕາມແຜນການຄື 500 ເຮັກຕາ.
ໂອກາດນີ້, ທ່ານ ຄຳຂັນ ຈັນທະວີສຸກ ມີຄຳເຫັນວ່າ: ປີນີ້ ຫຼາຍທ້ອງຖິ່ນມີອຸນຫະພູມເພີ່ມຂຶ້ນສູງກວ່າປົກກະຕິ, ເຮັດໃຫ້ມີສະພາບອາກາດຮ້ອນອົບເອົ້າ, ເກີດສະພາບໄຟໄໝ້ລາມປ່າ, ສະພາບໄພພິບັດທາງທໍາມະຊາດເກີດຂຶ້ນຢ່າງຕໍ່ເນື່ອງ, ສົ່ງຜົນກະທົບຢ່າງໜັກໜ່ວງຕໍ່ຊີວິດການເປັນຢູ່ຂອງຄົນ ແລະສັດ ແລະສູນເສຍຊັບສິນຂອງປະຊາຊົນຢ່າງຫລວງຫລາຍ, ລັດຖະບານເຮົາ ໄດ້ມີມາດຕະການ ແລະວາງແຜນຍຸດທະສາດຮອດປີ 2030 ສູ້ຊົນປູກໄມ້ໃຫ້ບັນລຸ 2 ແສນເຮັກຕາ, ຟື້ນຟູປ່າໄມ້ໃຫ້ໄດ້ 1,8 ລ້ານເຮັກຕາ, ຍົກລະດັບຄວາມປົກຫຸ້ມຂອງປ່າໄມ້ ໃຫ້ກວມບໍ່ຫລຸດ 70% ໃນຂອບເຂດທົ່ວປະເທດ, ໂດຍສະເພາະອົງການປົກຄອງແຂວງຫຼວງພະບາງ ໄດ້ມີມາດຕະການຄຸ້ມຄອງ, ປົກປັກຮັກສາ ແລະຟື້ນຟູປ່າໄມ້ 3 ປະເພດປ່າ ຕາມທິດຍືນຍົງສີຂຽວ, ແນໃສ່ອານຸລັກຊະນິດພັນພືດ, ພັນສັດ ແລະຖິ່ນທີ່ຢູ່ອາໄສ ທີ່ເປັນເອກະລັກສະເພາະຂອງພືດ ແລະສັດ ທີ່ຖືກໄພຂົ່ມຂູ່ ແລະໃກ້ຈະສູນພັນ. ນອກຈາກນີ້ ໄດ້ເອົາໃຈໃສ່ປົກປັກຮັກສາສິ່ງແວດລ້ອມ, ປ້ອງກັນດິນເຊາະເຈື່ອນ, ຮັກສາແຫລ່ງນໍ້າໃຫ້ມີຄວາມຍືນຍົງ, ທັງໄດ້ເອົາໃຈໃສ່ສຶກສາອົບຮົມ ແລະປູກຈິດສຳນຶກໃຫ້ພະນັກງານ, ທະຫານ, ຕຳຫລວດ, ບັນດາຊັ້ນຄົນ ແລະປະຊາຊົນບັນດາເຜົ່າ ໄດ້ຮັບຮູ້, ເຂົ້າໃຈ ແລະເຂົ້າຮ່ວມຢ່າງກວ້າງຂວາງ, ເຮັດໃຫ້ເນື້ອທີ່ປ່າປົກຫຸ້ມເພີ່ມຂຶ້ນໃນແຕ່ລະປີ.
