ພະນັກງານໃນຂົງເຂດ ຖວທ 40 ກວ່າຄົນ ໄດ້ຮັບການຍົກລະດັບພາສາອັງກິດ 5 ເດືອນ
ພະນັກງານໃນຂົງເຂດກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ (ຖວທ) ຫລາຍກວ່າ 40 ຄົນ ໄດ້ສໍາເລັດການ ຍົກລະດັບພາສາອັງກິດໄລຍະສັ້ນ 5 ເດືອນ ໃນວັນທີ 29 ສິງຫາ 2024 ໂດຍການເຂົ້າຮ່ວມຂອງທ່ານ ທ່ານ ວຽງວັດທະນາ ຊະນະພານ , ຜູ້ຊິ້ນຳລວມໂຄງການໃຈບຸນສາກົນ ຫລືດີໄອຊິ, ທ່ານ Mr. John ແລະ Madam June Fryer, ຫົວໜ້າໂຄງການ ດີໄອຊິ ປະຈຳລາວ, ທ່ານ Rod ແລະ ທ່ານ ນາງ Viengxay Mikoberry ອາຈານສອນ ພ້ອມດ້ວຍນັກຮຽນເຂົ້າຮ່ວມ.
ໃນໂອກາດນີ້ ທ່ານ ນາງ ວິຈິດສະຫວັນ ຈັນເທຣີ ຫົວໜ້າພະ ແນກພາສາຕ່າງປະເທດ ວິທະຍຸກະຈາຍສຽງແຫ່ງຊາດລາວ ທັງເປັນຜູ້ປະສານງານໂຄງການ ແຈ້ງໃຫ້ຮູ້ວ່າ: ອົງການໃຈບຸນສາກົນ ຫລືວ່າ ດີໄອຊີ ໄດ້ໃຫ້ການຊ່ວຍວິທະຍຸກະຈາຍສຽງແຫ່ງຊາດລາວ ໃນການຍົກລະດັບຄວາມຮູ້ທາງດ້ານພາສາອັງກີດໃຫ້ພະນັກງານພາຍໃນ ວສລ ແລະ ກົມກອງອ້ອມຂ້າງກະຊວງ ຖວທ ລວມມີ 2 ຫ້ອງຮຽນ ຄື: ຫ້ອງ ລະດັບເລີ່ມຕົ້ນ (beginner) ແລະ ຫ້ອງລະດັບກາງ (Intermediate).
ຜ່ານການຮຽນການສອນ ເປັນເວລາ 5 ເດືອນ( ເລີ່ມແຕ່ວັນທີ 8 ເມສາ ຈົນຮອດວັນທີ 20 ສີງຫາ 2024 ) ສາມາດຕີ ລາຄາໄດ້ວ່າ ນັກຮຽນສ່ວນໃຫຍ່ໄດ້ເອົາໃຈໃສ່ມາຮຽນເປັນປົກກະ ຕິ ແລະ ຫ້າວຫັນ ເຮັດໃຫ້ຫລາຍຄົນເສັງໄດ້ຄະແນນສະເລ່ຍໃນລະດັບດີທັງສອງຫ້ອງ ນອກຈາກນີ້ພາຍໃຕ້ການສອນຂອງອາ ຈານທີ່ມີຄວາມເອົາໃຈໃສ່ຕໍ່ນັກຮຽນໃນການຝືກສະໜອງ ແລະ ທັກສະໃນການເວົ້າພາສາອັງກີດ, ປັບປຸງເຕັກນີກໃນການສອນຢ່າງສະໝໍ່າສະເໜີ ເພື່ອໃຫ້ເຂົ້າກັບສະພາບຕົວຈີງ ແລະ ຕອບສະ ໜອງຄວາມຕ້ອງການຢາກຮຽນຂອງນັກຮຽນ ຊື່ງຊ່ວຍໃຫ້ນັກ ຮຽນໄດ້ຮັບປະສົບການ ແລະ ຄວາມຮູ້ໃໝ່ ເພື່ອເພີ່ມທັກສະດ້ານພາສາໃຫ້ສາມາດນຳໄປໝູນໃຊ້ເຂົ້າໃນວຽກງານວິຊາສະເພາະ ແລະ ຊີວິດປະຈຳວັນ.
ໂຄງການໃຈບຸນສາກົນ Deseret International Charities ( DIC) ແມ່ນອົງການຈັດຕັ້ງສາກົນທີ່ບໍ່ຫວັງຜົນກຳໄລ, ໂດຍໄດ້ຮັບອະນຸຍາດໃຫ້ດຳເນີນວຽກ ໂດຍສະເພາະເລື້ອງການຮຽນການສອນ ຈາກກະຊວງການຕ່າງປະເທດ, ກົມອົງການຈັດຕັ້ງສາກົນ. DIC ໄດ້ດຳເນີນກິດຈະກຳຕ່າງໆທີ່ເປັນການກຸສົນ ແລະ ເພື່ອມະນຸດສະທຳ ແລະ ໄດ້ສ້າງຊື່ສຽງຈາກການດຳເນີນຫຼາຍໆໂຄງການໂດຍໄດ້ຮັບການຊ່ວຍເຫຼືອລັດຖະບານ ສປປ ລາວ ເພື່ອຕອບສະໜອງຄວາມຮຽກຮ້ອງຕ້ອງການ ແລະ ຄວາມຈຳເປັນໃຫ້ປະຊາຊົນລາວ ພະນັກງານທັງໝົດຂອງອົງການໃຈບຸນສາກົນ ດີໄອຊີ ເປັນອາສາສະໝັກທີ່ເຮັດວຽກເພື່ອການກຸສົນ ແລະ ເພື່ອມະນຸດສະທຳຢູ່ ສປປ ລາວ ເຮັດວຽກຢູ່ ສປປ ລາວ ດ້ວຍເງິນຂອງຕົນເອງ.
