ໂອກາດເຂົ້າຮ່ວມ ແລະໂອ້ລົມຕໍກອງປະຊຸມວຽກງານສາທາລະນະສຸກທົ່ວປະເທດ ຄັ້ງທີ VIII ທີ່ຈັດຂຶ້ນຢູ່ນະຄອນຫລວງວຽງຈັນ ລະຫວ່າງວັນທີ 28-29 ມັງກອນຜ່ານມານີ້ ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດຂອງວຽກງານສາທາລະນະສຸກ ໃນໄລຍະ 5ປີຜ່ານມາ, ພ້ອມເນັ້ນໃຫ້ຂະແໜງສາທາລະນະສຸກ ສືບຕໍ່ພັດທະນາວຽກງານໃຫ້ມີຜົນສໍາເລັດຍິ່ງຂຶ້ນ, ເປັນຕົ້ນການຮັກສາມູນເຊື້ອແພດປະຕິວັດ ໃນການເປັນແພດທີ່ດີ , ມີຄວາມເສຍສະຫຼະ ຖືເອົາຄົນເຈັບເປັນເປົ້າໝາຍປຽບ ເໝືອນຄົນທີ່ຕົນຮັກ, ມີຈັນຍາທຳ ແລະ ເປັນແພດຂອງປະຊາຊົນຢ່າງແທ້ຈິງ, ໃນໄລຍະຜ່ານມາ ພະນັກງານແພດໝໍໄດ້ເປັນຈິດໜຶ່ງໃຈດຽວ ຕໍ່ສູ້ຕ້ານພະຍາດໂຄວິດ-19 ແລະ ໄດ້ຂະໜານນາມໃຫ້ພະນັກງານແພດໝໍວ່າ ເປັນນັກຮົບເສື້ອຂາວ, ຕໍ່ຄວາມເຊື່ອໝັ້ນດັ່ງກ່າວພະນັກງານ-ແພດໝໍ ຕ້ອງໃຫ້ສືບຕໍ່ເສີມຂະຫຍາຍມູນເຊື້ອແພດປະຕິວັດ, ໝັ່ນອ່ານ, ໝັ່ນຮຽນ, ສຶກສາໃຫ້ຮູ້ແທ້ວ່າແພດປະຕິວັດຄິດແນວໃດ, ເຮັດແນວໃດ, ທຳຕົວແນວໃດ, ເສຍສະຫຼະເພື່ອປະຊາຊົນແນວໃດ, ຮັກຄົນເຈັບແນວໃດ, ຖືເອົາຄົນເຈັບເປັນຄົນທີ່ຕົນຮັກ ເພື່ອຫາວິທີປິ່ນປົວເອົາຄວາມເຈັບປວດຄວາມທຸກຈາກພະຍາດອອກຈາກໂຕເຂົາເຈົ້າ.
ທ່ານ ທອງລຸນ ສີສຸລິດ ກ່າວຕື່ມວ່າ ສາທາລະນະສຸກ ເປັນຂະແໜງໜຶ່ງທີ່ເຮັດໜ້າທີ່ປະກອບສ່ວນເຂົ້າໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງຂອງສະຫະປະຊາຊາດ, ໂຕຊີ້ວັດທີ່ສຳຄັນຢູ່ໃນຂະແໜງນີ້ແມ່ນ ຂະແໜງສາທາລະນະສຸກເປັນຜູ້ປະຕິບັດ, ເປັນຜູ້ຮັບຜິດຊອບ. ສະນັ້ນ ຕ້ອງເອົາໃຈໃສ່ປະກອບສ່ວນຢ່າງຕັ້ງໜ້າ ເພື່ອສ້າງສະພາບແວດລ້ອມໃນການນຳເອົາປະເທດເຮົາ ຫຼຸດພົ້ນອອກຈາກສະຖານະພາບດ້ອຍພັດທະນາ, ເອົາມະຕິຂອງກອງປະຊຸມໃຫຍ່ຄັ້ງທີ XI ຂອງພັກ ມາຜັນຂະຫຍາຍເປັນໂຄງການ, ເປັນແຜນງານລະອຽດຕົວຈິງປະຕິບັດໃຫ້ໄດ້, ໃຫ້ຮີບຮ້ອນສະຫຼຸບຖອດຖອນບົດຮຽນອັນລໍ້າຄ່າຂອງການປ້ອງກັນຕ້ານ ແລະ ແກ້ໄຂພະຍາດໂຄວິດ-19 ຢູ່ໃນປະເທດເຮົາ, ປົກປັກຮັກສາສຸຂະພາບ ແລະ ປ້ອງກັນບໍ່ໃຫ້ມີພະຍາດຮ້າຍແຮງເກີດຂຶ້ນຢູ່ໃນປະເທດເຮົາ ສືບຕໍ່ພົວພັນຮ່ວມມືກັບຕ່າງປະເທດ ດຶງດູດເອົາການລົງທຶນ, ການຮ່ວມມື ຫຼື ທາງດ້ານເຕັກໂນໂລຊີ ວິທະຍາສາດການແພດເຂົ້າມາປະເທດເຮົາໃຫ້ຫຼາຍເທົ່າທີ່ຈະຫຼາຍໄດ້.
Loading...