ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ພະແນກກະສິກຳ ແລະ ປ່າໄມ້ແຂວງອຸດົມໄຊ ຈັດພິທີສະເຫຼີມສະຫຼອງວັນຊົນລະປະທານແຫ່ງຊາດ

ຕອນເຊົ້າວັນທີ 8 ພະຈິກນີ້ ທີ່ຊົນລະປະທານນ້ຳແບງ ບ້ານນາແມດ ເມືອງແບງ ແຂວງອຸດົມໄຊ ພະແນກກະສິກຳ ແລະ ປ່າໄມ້ແຂວງອຸດົມໄຊ ຮ່ວມກັບເມືອງແບງ ໄດ້ຈັດພິທີສະເຫຼີມສະຫຼອງວັນຊົນລະປະທານແຫ່ງຊາດ ( ວັນທີ 3 ພະຈິກ )ຂຶ້ນ ໂດຍການເຂົ້າຮ່ວມຂອງທ່ານ ຄຳອ່ອນ ຄຸນທະຈັກ ຄະນະປະຈຳພັກເມືອງ ຮອງເຈົ້າເມືອງ ເມືອງແບງ, ມີທ່ານ ຄຳພອນ ມຸນລະໄມ ວ່າການຫົວໜ້າພະແນກກະສິກຳ ແລະ ປ່າໄມ້ແຂວງອຸດົມໄຊ, ມີຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ, ຫົວໜ້າ-ຮອງຫົວໜ້າຂະແໜງການພາຍໃນພະແນກກະສິກກຳ ແລະ ປ່າໄມ້ແຂວງ ພ້ອມດ້ວຍພະນັກງານຫຼັກແຫຼ່ງ, ມີຄະນະພັກອົງການປົກຄອງບ້ານນາແມດ ແລະ ຊາວກະສິກອນຜູ້ຊົມໃຊ້ຊົນລະປະທານເຂົ້າຮ່ວມນຳ.

ວັນສະໜອງນ້ຳຊົນລະປະທານ 3 ພະຈິກ ແມ່ນໄດ້ກຳນົດໄວ້ໃນກົດໝາຍວ່າດ້ວຍຊົນລະປະທານ ເພື່ອເປັນການອານາໄມລະບົບຫົວງານ ແລະ ລະບົບຄອງເໝອງຊົນລະປະທານ ແນໃສ່ສະໜອງນ້ຳຊົນລະປະທານໃຫ້ແກ່ການຜະລິດລະດູແລ້ງ ສົກ 2019-2020 ທັງເປັນການປູກຝັງຈິດສຳນຶກໃຫ້ແກ່ຊາວກະສິກອນກຸ່ມຜູ້ນຳໃຊ້ນຳຊົນລະປະທານ ເແລະ ຊາວໜຸ່ມ-ເຍົາວະຊົນ ນັກສຶກສາປັນຍາຊົນ ໃຫ້ຮັບຮູ້ ແລະ ເຂົ້າໃຈກ່ຽວກັບຄວາມສຳຄັນຂອງຊົນລະປະທານ ພ້ອມທັງຕື່ນຕົວເປັນເຈົ້າການໃນການເຂົ້າຮ່ວມຂະບວນການ ອານາໄມ ແລະ ຮັກສາຕອງເໝືອງຊົນລະປະທານກາຍເປັນປະເພນີສືບຕໍ່ຮອດຊົ່ວລູກຊົ່ວຫຼານ.

ທ່ານ ຄຳອ່ອນ ຄຸນທະຈັກ ຄະນະປະຈຳພັກເມືອງ ຮອງເຈົ້າເມືອງ ເມືອງແບງ ໄດ້ໃຫ້ຮູ້ວ່າ: ໃນການຈັດພິທີສະເຫຼີມສະຫຼອງວັນຊົນລະປະທານຄັ້ງນີ້ແມ່ນມີຄວາມໝາຍອັນສຳຄັນເປັນຢ່າງຍິງໃນການອານາໄມຊົນລະປະທານ-ຄອງເໝືອງ ເພື່ອສະໜອງນ້ຳໃຫ້ແກ່ເນື້ອທີ່ທຳການຜະລິດ ພ້ອມດຽວກັນນີ້ກໍເປັນການສ້າງຂະບວນການຄຳນັບຮັບຄ້ອນກອງປະຊຸມໃຫ່ຍຄັ້ງທີ 12 ຂອງອົງຄະນະພັກເມືອງແບງທີ່ຈະໄຂ່ຂຶ້ນໃນມໍ່ໆນີ້ ແລະ ຂະບວນການແຂ່ງຂັນຮັກຊາດ ແລະ ພັດທະນາ ຕາມທິດສາມສ້າງ ທັງເປັນການຈັດຕັ້ງປະຕິບັດນະໂຍບາຍ 3 ເສົາຄ້ຳ 4 ແຜນງານ ແລະ 10 ແຜນດຳເນີນງານ ຂອງກະຊວງກະສິກຳ ແລະ ປ່າໄມ້, ແຜນພັດທະນາເສດຖະກິດ-ສັງຄົມຂອງແຂວງ ກໍຄືຂອງເມືອງແບງ ໃນແຜນງານຜະລິດ-ຄ້ຳປະກັນສະບຽງອາຫານ ຜະລິດເປັນສິນຄ້າ ໃຫ້ສຳເລັດ ແລະ ປະກົດຜົນເປັນຈິງ ຜະລິດລະດູແລ້ງປີ 2019 ນີ້ ໃຫ້ໄດ້ທັງໝົດ 2.6 ພັນກ່ວາເຮັກຕາ ນາແຊງໃຫ້ໄດ້ 54 ເຮັກຕາ ຄາດຄະເນຜົນຜະລິດໃຫ້ໄດ້ 189 ໂຕນ, ຜະລິດພືດຊະນິດຕ່າງໆໃຫ້ໄດ້ 2.5 ພັນກ່ວາເຮັກຕາ ຄາດຄະເນຜົນຜະລິດໃຫ້ໄດ້ 15 ພັນກ່ວາໂຕນ ແລະ ຜະລິດຊີ້ນ-ປາຈຳນວນໜຶ່ງ. ໂອກາດສຳຄັນນີ້ທ່ານ ຄຳອ່ອນ ຄຸນທະຈັກ ຈຶ່ງໄດ້ຮຽກຮ້ອງມາຍັງ ຄະນະພັກອົງການປົກຄອງບ້ານ ກຸ່ມຜູ້ຊົມໃຊ້ນ້ຳ ພໍ່ແມ່ປະຊາຊົນ ນັກຮຽນຮູ້ປັນຍາຊົນ ໃຫ້ຖືເອົາກິດຈະກຳການຜະລິດຂອງຕົນເອງໃຫ້ໄດ້ຮັບໝາກຜົນ ສ້າງໂດຍໂຕເອງ ແລະ ຄຸ້ມຄອງດ້ວຍຕົວເອງຢ່າງຂາດຕົວ ແນ່ໃສເຮັດໃຫ້ຊີວິດການເປັນຢູ່ຂອງຕົນໃຫ້ດີຂຶ້ນເທື່ອລະກ້າວ ແລະ ສ້າງໃຫ້ມີສະພາບແວດລ້ອມທີ່ດີ.