ໃນທ້າຍອາທິດຜ່ານມາ, ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງວຽງຈັນ ຮ່ວມກັບ ເມືອງແກ້ວອຸດົມ ລົງເຄື່ອນໄຫວຊຸກຍູ້ສົ່ງເສີມ ບ້ານດອນໄຊອຸດົມ ເປັນບ້ານການທ່ອງທ່ຽວແບບປະຊາຊົນມີສ່ວນຮ່ວມ ຊຶ່ງນຳພາໂດຍ ທ່ານ ແສງແກ້ວ ສູນທະວົງສາ ຮອງຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວແຂວງວຽງຈັນ ພ້ອມດ້ວຍພະນັກງານທີ່ກ່ຽວຂ້ອງ.
ຈຸດປະສົງ ຂອງການລົງມາເຄື່ອນໄຫວວຽກງານໃນຄັ້ງນີ້ ກໍເພື່ອແລກປ່ຽນຄວາມຮູ້ ກ່ຽວກັບການບໍລິການ ການທ່ອງທ່ຽວແບບປະຊາຊົນມີສ່ວນຮ່ວມ, ຄວາມເປັນເຈົ້າການຂອງການປົກປັກສາຊັບພະຍາກອນການທ່ອງທ່ຽວ, ການອະນຸລັກຮັກສາວິຖີຊີວິດຂອງຊຸມຊົນ, ການບໍລິຫານ-ຈັດການທ່ອງທ່ຽວຂອງຊຸມຊົນ ແລະ ອື່ນໆ ເພື່ອກ້າວເຂົ້າສູ່ມາດຕະຖານການບໍລິການ ການທ່ອງທ່ຽວຂອງອາຊຽນໃນອະນາຄົດ ແລະ ເພື່ອເປັນການສ້າງຄວາມຮັບຮູ້ ແລະ ເຂົ້າໃຈຕໍ່ວຽກງານການທ່ອງທ່ຽວແບບປະຊາຊົນມີສ່ວນຮ່ວມ ເປັນຕົ້ນໄດ້ຮັບຟັງການນຳສະເໜີ ສະພາບລວມຂອງການຈັດຕັ້ງປະຕິບັດວຽກງານການທ່ອງທ່ຽວ ຢູ່ບ້ານຫລິ່ງຊັນ ໃນໄລຍະຜ່ານມາ, ສະພາບລວມຂອງການທ່ອງທ່ຽວແບບປະຊາຊົນມີສ່ວນຮ່ວມ ຢູ່ ສປປ ລາວ ແລະ ພາຍໃນແຂວງວຽງຈັນ ໃນໄລຍະຜ່ານມາ, ຮ່າງຂໍ້ຕົກລົງຂອງເຈົ້າເມືອງໆແກ້ວອຸດົມ ວ່າດ້ວຍການແຕ່ງຕັ້ງຄະນະຮັບຜິດຊອບ ການທ່ອງທ່ຽວແບບປະຊາຊົນມີສ່ວນຮ່ວມ ຢູ່ບ້ານດອນໄຊອຸດົມ ພ້ອມທັງ ນຳສະເໜີການພົວພັນ, ການຕ້ອນຮັບ ແລະ ການບໍລິການ (ມະນຸດສໍາພັນ ແລະ ຈິດຕະວິທະຍາໃນການບໍລິການ), ນຳສະເໜີຄວາມຮູ້ພື້ນຖານ ກ່ຽວກັບເຕັກນິກການນຳທ່ຽວ-ການບໍລິການ ແລະ ມາດຕະຖານການທ່ອງທ່ຽວ ແບບປະຊາຊົນມີສ່ວນຮ່ວມຂອງອາຊຽນ.
ບ້ານດອນໄຊອຸດົມ ມີຊັບພະຍາກອນທ່ອງທ່ຽວທີ່ໜ້າຄົ້ນຫາເຊັ່ນ: ດອນຫາດຊາຍຂາວ, ດອນທັບຫີນ, ອົງລູກແກ້ວນິລະມິດ ທີ່ມີເລື່ອງເລົ່າຕຳນານເຈົ້າປ່າເຈົ້າເຂົາ ເປັນສິ່ງສັກກາລະບູຊາ ຕາມຄວາມເຊື່ອຖືຂອງຊຸມຊົນ ອັນເປັນທ່າແຮງແກ່ການພັດທະນາການທ່ອງທ່ຽວແບບປະຊາຊົນມີສ່ວນຮ່ວມເປັນຕົ້ນ ການພັກແຮມນໍາປະຊາຊົນ, ການທ່ຽວຊົມທິວທັດທໍາມະຊາດອ່າງນໍ້າງື່ມ, ທ່ຽວຊົມວິຖີຊີວິດການຫາປາແກ້ວ, ປານາງໃນຍາມຄໍ່າຄືນ, ການຍ່າງປ່າ ແລະ ການຕັ້ງແຄ້ມຕາມດອນໃນອ່າງນໍ້າງື່ມ ແລະ ອື່ນໆ ຊຶ່ງເປັນທີ່ດຶງດູດນັກທ່ອງທ່ຽວໃຫ້ເຂົ້າມາທ່ຽວຊົມ ຢ້ຽມຢາມ ແລະ ຮຽນຮູ້ກ່ຽວກັບວິຖີຊິວິດ, ວັດທະນະທຳ ແລະ ສະພາບແວດລ້ອມໃນຊຸມຊົນ ຄຽງຄູ່ໄປກັບການສ້າງວຽກເຮັດງານທຳ ແລະ ການສ້າງລາຍໄດ້ເສີມໃຫ້ປະຊາຊົນທ້ອງຖິ່ນ ຖັດຈາກການຜະລິດກະສິກຳ. ຍ້ອນເຫັນໄດ້ທ່າແຮງດັ່ງກ່າວນັ້ນ ພະແນກ ຖວທ ແຂວງວຽງຈັນ ໄດ້ສົມທົບກັບ ເມືອງແກ້ວອຸດົມ ໄດ້ລົງຊຸກຍູ້ສົ່ງເສີມ, ສ້າງຄວາມຮັບຮູ້ ແລະ ເຂົ້າໃຈກ່ຽວກັບວຽກງານການທ່ອງທ່ຽວແບບປະຊາຊົນມີສ່ວນຮ່ວມ ແລະ ສ້າງຄວາມເຂັ້ມແຂງ ໃຫ້ອົງການຈັດຕັ້ງບ້ານ ແລະ ປະຊາຊົນ ໃຫ້ສາມາດຮອງຮັບນັກທ່ອງທ່ຽວໄດ້ໃນລະດັບໃດໜຶ່ງ ແລະ ກ້າວເຂົ້າສູ່ມາດຕະຖານການທ່ອງທ່ຽວຂອງອາຊຽນໃນຕໍ່ໜ້າ ພາຍໃຕ້ ໂຄງການພັດທະນາໂຄງລ່າງພື້ນຖານ ເພື່ອສົ່ງເສີມການທ່ອງທ່ຽວ ຊຶ່ງເປັນໂຄງການບຸລິມະສິດຂອງແຂວງວຽງຈັນ ທີ່ໄດ້ຮັບການຊ່ວຍເຫລືອລ້າ ຈາກທະນາຄານພັດທະນາອາຊີ.
ພາບ-ຂ່າວ : ບຸນມາ ແກ້ວບຸດດາ
