ພະແນກອຸດສາຫະກໍາ ແລະ ການຄ້າແຂວງ ຈໍາປາສັກ ວາງມາດຕະການເຂັ້ມງວດໃນຄຸ້ມຄອງລາຄາສິນຄ້າຕາມທ້ອງຕະຫລາດໃນໄລຍະສະເຫລີມສະຫລອງສົ່ງວທ້າຍປີເກົ່າ ແລະ ຕ້ອນຮັບປີໃໝ່ລາວ ພສ 2566 ເພື່ອບໍ່ໃຫ້ຊາວຄ້າຂາຍສວຍໂອກາດຂຶ້ນລາຄາສິນຄ້າຕາມລຳພັງໃຈ, ທັງຮັບປະກັນໃຫ້ມີສິນຄ້າພຽງພໍກັບຄວາມຕ້ອງການຂອງຜູ້ບໍລິ ໂພກ.
ທ່ານ ບຸນຍະເດດ ທອງສະຫວັນ, ຫົວໜ້າພະແນກອຸດສາຫະກໍາ ແລະ ການຄ້າແຂວງຈໍາປາສັກ ໃຫ້ສໍາພາດວ່າ: ພະແນກອຸດສາຫະກໍາ ແລະ ການຄ້າແຂວງ ໄດ້ຜັນຂະຫຍາຍດຳລັດຂອງນາຍົກ ລັດຖະມົນຕີວ່າດ້ວຍການຄຸ້ມຄອງລາຄາສິນຄ້າ ແລະ ຄ່າບໍລິການ ສະບັບເລກທີ 474, ລົງວັນທີ 8 ພະຈິກ 2010 ແລະ ບັນດານິຕິກໍາທີ່ກ່ຽວຂ້ອງຂອງແຂວງ ໂດຍນໍາໃຊ້ 2 ຮູບການໃນການຄຸ້ມຄອງລາຄາສິນຄ້າ ຄື: ມາດຕະການຄວບຄຸມລາຄາ ແລະ ມາດຕະການຕິດ ຕາມການເໜັງຕີງຂອງລາຄາ. ໃນນີ້ ມາດຕະການຄວບຄຸມລາຄາ ປະກອບດ້ວຍ 5 ມາດຕະການ ຄື: ການກໍານົດໂຄງປະກອບລາຄາ, ກຳ ນົດລາຄາສູງສຸດ, ລາຄາຕໍ່າສຸດ ຫຼື ຂອບເຂດລາຄາ, ຄວບຄຸມສິນຄ້າໃນຄັງແຮສໍາຮອງ, ຖົມຂຸມສິນຄ້າ ແລະ ການບໍລິການ, ການດັດສົມການສະໜອງ ແລະ ຄວາມຕ້ອງການ. ສ່ວນມາດຕະການຕິດຕາມການເໜັງຕີງຂອງລາຄາ: ແມ່ນການຕິດຕາມການເໜັງຕີງຂອງລາຄາ, ລວມທັງການຕິດປ້າຍລາຄາ ໂດຍສະເພາະລາຍການສິນຄ້າໃນບັນຊີຕິດຕາມ ຫລື ບັນຊີ ຂ ເຊີ່ງປັດຈຸບັນມີທັງໝົດ 206 ລາຍການ.
ໃນກໍລະນີກວດພົບເຫັນຊາວຄ້າຂາຍລະເມີດລະບຽບການ ຫລື ສວຍໂອກາດຂຶ້ນລາຄາສິນຄ້າຕາມລໍາພັງໃຈ ຈະມີມາດຕະການຢ່າງເໝາະສົມ, ເລີ່ມຈາກການກ່າວເຕືອນ, ການສຶກສາອົບຮົມ ແລະ ປັບໄໝ ຕາມລະບຽບກົດຫມາຍທີ່ກໍານົດໄວ້.
ສໍາລັບແຂວງ ຈໍາປາສັກ ມີຕະຫລາດທັງໝົດ 58 ແຫ່ງ, ໃນນີ້ ມີຕະຫລາດຂະໜາດໃຫຍ່ 1 ແຫ່ງ, ກາງ 5 ແຫ່ງ ແລະ ຂະໜາດນ້ອຍ 52 ແຫ່ງ, ຮ້ານຊຸບເປີມາເກັດ ແລະ ມິນິມາກ 24 ຫົວໜ່ວຍ, ຮ້ານຂາຍຍົກ 77 ແຫ່ງໜ່ວຍ, ຮ້ານຄ້າຂາຍຍ່ອຍ 3.278 ຫົວໜ່ວຍ, ສູນການຄ້າ 1 ແຫ່ງ ແລະ ຮ້ານສັບພະສິນຄ້າ 1 ແຫ່ງ.