ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ພະແນກ ຖວທ ແຂວງຫຼວງພະບາງປາຖະກາຖາວັນສື່ມວນຊົນແລະການພີມຈຳໜ່າຍ

ວັນທີ່ 11 ສີງຫານີ້ ທີ່ໂຮງລະຄອນພະລັກ ພະລາມ ຫໍພິພິດທະພັນແຫ່ງຊາດຫຼວງພະບາງ ພະແນກ ຖວທ ແຂວງຫຼວງພະບາງ ໄດ້ຈັດຕັ້ງການປາຖະກາຖາວັນສື່ມວນຊົນ ແລະ ການພີມຈຳໜ່າຍແຫ່ງຊາດລາວຂື້ນ ໂດຍການປາຖະກາຖາຂອງ ທ່ານ ສຸລິທີບ ໜໍ່ຄຸນຜົນ ຫົວໜ້າພະແນກ ຖວທ ມີຫົວໜ້າ, ຮອງຫົວໜ້າຂະແໜງການ ກອງວິຊາການ, ບັນດານັກຈັດລາຍການຮ່ວມ ທາງສະຖານີວິທະຍຸກະຈາຍສຽງ, ຜູ້ປະກອບການທຸລະກິດທາງດ້ານສື່ສີ່ງພີມ ແລະ ສືເອເລັກໂທນິກ ຕະຫຼອດຮອດຜູ້ເຮັດວຽກງານສື່ມວນຊົນພາຍໃນພະແນກເຂົ້າຮ່ວມ. ທ່ານ ສຸລິທີບ ໜໍ່ຄຸນຜົນ ໄດ້ປາຖະກາຖາວ່າ: ໃນສະພາບການທີ່ປະເທດເຮົາ ພວມຖືກຈັກກະພັດ ເຂົ້າມາຮຸກຮານ ແລະ ຍຶດຄອງປະເທດ ວຽກງານສື່ມວນຊົນ ໄດ້ມີພາລະບົດບາດສຳຄັນ ໃນການປຸກລະດົມຈິດໃຈຮັກຊາດ ຂອງປະຊາຊົນລາວບັນດາເຜົ່າ ເຂົ້າຮ່ວມການຕໍ່ສູ້ກູ້ຊາດ ໃນນັ້ນ ໄດ້ມີການໂຄສະນາຜ່ານສືວິທະຍຸ ແລະ ການແຈກຢາຍໃບຂ່າວ ເຮັດໃຫ້ປະເທດເຮົາໄດ້ຮັບການປົດປ່ອຍຢ່າງມີໄຊຊະນະເປັນກ້າວໆ, ພາຍຫຼັງປະເທດຊາດໄດ້ຮັບການປົດປ່ອຍ ວຽກງານສື່ມວນຊົນຂອງລາວເຮົາ ຍີ່ງເຕີບໃຫຍ່ຂະຫຍາຍຕົວຂື້ນເປັນກ້າວໆ ພາຍໃຕ້ຮົ່ມທຸງໄຊຂອງພັກປະຊາຊົນປະຕິວັດລາວ ມາເຖີງປະຈຸບັນ ວຽກງານສື່ມວນຊົນ ໄດ້ຮັບການປັບປຸງຍົກລະດັບທາງດ້ານປະລິມານ ແລະ ຄຸນນະພາບ ນັບແຕ່ສູນກາງລົງຮອດທ້ອງຖີ່ນ ເຮັດໃຫ້ທົ່ວສັງຄົມລາວ ນັບທັງພາກພື້ນ ແລະ ສາກົນ ໄດ້ຮັບຮູ້ຂໍ້ມູນຂ່າວສານຈາກປະເທດລາວຫຼາຍຂື້ນ ເຮັດໃຫ້ສືສຽງຂອງ ສປປລາວ ໂດ່ງດັງໄປໃນພາກພື້ນ ແລະ ສາກົນ.

ໂອກາດນີ້ ຫົວໜ້າພະແນກ ຖວທ ແຂວງຫຼວງພະບາງ ໄດ້ຍົກໃຫ້ເຫັນຕື່ມກ່ຽວກັບການເຕີບໃຫ່ຍຂະຫຍາຍຕົວຂອງວຽກງານສື່ມວນຊົນ ຂອງແຂວງຫຼວງພະບາງໃນໄລຍະ 1 ປີຜ່ານມາ ພ້ອມທັງຮຽກຮ້ອງໃຫ້ນັກສື່ມວນຊົນ ຈົ່ງພ້ອມກັນສືບຕໍ່ໃນການປະຕິບັດໜ້າທີ່ເປັນກະບອກສຽງສຳຄັນຂອງພັດ ແລະ ລັດຖະບານ, ອັນຕົ້ນຕໍແມ່ນໃຫ້ສຸມໃສ່ການໂຄສະນາ ປີທ່ອງທ່ຽວລາວ ປີ 2018 ທີ່ຈະມາເຖີງໃຫ້ກວ້າງຂວາງ ເລິກເຊີ່ງ ທັງເປັນການດືງດູດເອົານັກທ່ອງທ່ຽວເຂົ້າມາທ່ຽວ ສປປລາວ ໂດຍສະເພາະ ແຂວງຫຼວງພະບາງໃຫ້ນັບມື້ນັບຫຼາຍຂື້ນ. ໂອກາດການປາຖະກາຖາຄັ້ງນີ້ ໄດ້ມີການມອບໃບຍ້ອງຍໍຂອງພະແນກໃຫ້ 4 ຂະແໜງການຂອງຂົງເຂດສື່ມວນຊົນ ທີ່ໄດ້ປະກອບສ່ວນວຽກງານສຳຄັນໃນປີຜ່ານມານໍຕື່ມອີກ.