ວັນທີ 4 ກັນຍາຜ່ານມານີ້ ຢູ່ເມືອງເງິນ ແຂວງໄຊຍະບູລີ, ທ່ານ ໜູເກນ ພັນລັກ ຫົວໜ້າພະແນກ ແຮງງານສະຫວັດດີການສັງຄົມແຂວງ (ຮສສຂ) ໄຊຍະບູລີ ພ້ອມດ້ວຍທີມງານ ໄດ້ລົງມອບເຂົ້າສານ ຈໍານວນ 1 ໂຕນ, ນໍ້າດື່ມ 110 ແພັກ ມູນຄ່າ 26.600.000 ກີບ ມອບໃຫ້ອົງການປົກຄອງເມືອງເງິນ ກໍຄືຄະນະກໍາມະການຄຸ້ມຄອງໄພພິບັດຂັ້ນເມືອງ. ໃຫ້ກຽດຮັບໂດຍທ່ານ ທະວີສັກ ໄຊຍະວົງ ເຈົ້າເມືອງໆເງິນ ຕາງໜ້າຄະນະກໍາມະການຄຸ້ມຄອງໄພພິບັດຂັ້ນເມືອງ ກໍຄືຕາງໜ້າຊາວເມືອງເງິນ. ວັນດຽວກັນນີ້ ທ່ານ ຄະທາຍຸດ ຊູພູນ ຜູ້ອໍານວຍການໃຫຍ່ບໍລິສັດໄຟຟ້າຫົງສາຈໍາກັດໄດ້ມອບເງິນຊ່ວຍເຫຼືອເພື່ອຟື້ນຟູຫຼັງເຫດການນໍ້າຖ້ວມ ເປັນເງິນ 65.000.000 ກີບໃຫ້ກຽດຮັບມອບໂດຍທ່ານ ເຈົ້າເມືອງໆເງິນ. ການມອບເຄື່ອງຄັ້ງນີ້ ກໍເພື່ອສົມທົບທືນການຊ່ວຍເຫຼືອຟື້ນຟູໄພພິນໍ້າຖ້ວມຢູ່ເມືອງເງິນໃນຄັ້ງນີ້ ເປັນຕົ້ນແມ່ນນຳໄປຊື້ເຄື່ອງອຸປະໂພກ, ບໍລິໂພກ ແລະ ອື່ນໆ ທີຈຳເປັນ ນຳໄປຊ່ວຍເຫຼືອໃຫ້ແກ່ຜູ້ໄດ້ຮັບຜົນກະທົບ ເພື່ອເຮັດໃຫ້ຜູ້ທີ່ໄດ້ຮັບຜົນກະທົບກັບມາໃຊ້ຊີວິດເປັນປົກກະຕິໂດຍໄວ.
ຂ່າວ: ອິນແປງ ແຫວນຄໍາ
