ນັບແຕ່ໄດ້ຮັບການສ້າງຕັ້ງຂຶ້ນ ພັກປະຊາຊົນປະຕິວັດລາວໄດ້ກໍານົດອຸດົມການຂອງຕົນຢ່າງຈະແຈ້ງຄື: ນໍາພາປວງຊົນລາວທັງຊາດ ດໍາເນີນການຕໍ່ສູ້ຕ້ານພວກຈັກກະພັດລ່າເມືອງຂຶ້ນ ເພື່ອນໍາເອົາຄວາມເປັນເອກະລາດມາໃຫ້ແກ່ປະເທດຊາດ ແລະ ສິດເປັນເຈົ້າມາໃຫ້ປະຊາຊົນສ້າງສາປະເທດຊາດສູ່ຈຸດໝາຍສັງຄົມນິຍົມ.
ເນື່ອງໃນໂອກາດວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 68 ປີ ຄືວັນທີ 22 ມີນາ 1955 ຫາ 22 ມີນາ 2023 ດຣ ສົມທະວີ ຈາງວິສົມມິດ ອາດີດຄະນະປະຈໍາພັກ ອາດີດຫົວໜ້າກົມອາຫານ ແລະ ຢາ ກະຊວງສາທາລະນະສຸກ ໄດ້ສະແດງຄວາມຮູ້ສຶກຂອງຕົນວ່າ : ພັກ ແມ່ນແກນນໍາໃນລະບົບການເມືອງ ແລະ ນໍາພາປະເທດຊາດ ກ້າວໄປສູ່ຄວາມຈະເລີນຮຸ່ງເຮືອງ ປະຊາຊົນມັ່ງຄັ່ງເຂັ້ມແຂງສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ.
ດຣ ສົມທະວີ ຈາງວິສົມມິດ ໃຫ້ຮູ້ຕື່ມວ່າ : ພາຍຫຼັງປະເທດຊາດໄດ້ຮັບການປົດປ່ອຍໃນປີ 1975 ເປັນຕົ້ນມາ ພັກໄດ້ສືບຕໍ່ນໍາພາປະຊາຊົນລາວບັນດາເຜົ່າ, ປົກປັກຮັກສາເອກະລາດ ແລະ ກໍ່ສ້າງຊີວິດໃໝ່ ມາຮອດປະຈຸບັນ ປະຊາຊົນລາວບັນດາເຜົ່າພາຍໄຕ້ການນໍາພາຂອງພັກ ເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າຫຼຸດພົ້ນອອກຈາກຄວາມທຸກຍາກເທື່ອລະກ້າວ.
