ພາກລັດ ແລະ ພາກທຸລະກິດພົບປະເພື່ອລະດົມແນວຄວາມຄິດເຂົ້າໃນການພັດທະນາເສດຖະກິດ-ສັງຄົມ ຢູ່ແຂວງຄໍາມ່ວນ.

 ກອງປະຊຸມພົບປະລະຫວ່າງ ພາກລັດ ແລະ ພາກທຸລະກິດ ຂອງແຂວງ ປະຈໍາປີ 2023 ເພື່ອປຶກສາຫາລື ລະດົມແນວຄວາມຄິດ ເຂົ້າໃນການພັດທະນາເສດຖະກິດ-ສັງຄົມຢູ່ແຂວງຄໍາມ່ວນ ໄດ້ຈັດຂຶ້ນໃນວັນທີ 26 ເມສາ 2023 ທີ່ສະໂມສອນຂອງແຂວງ ໂດຍການເປັນປະທານຂອງ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ປະທານຄະນະກໍາມະການສົ່ງເສີມ ແລະ ຄຸ້ມຄອງການລົງທຶນຂັ້ນແຂວງ, ມີບັນດາທ່ານຮອງເຈົ້າແຂວງ, ພະແນກການ ແລະ ນັກທຸລະກິດ, ຜູ້ປະກອບການ ທັງພາຍໃນ ແລະ ຕ່າງປະເທດ ທີ່ດຳເນີນທຸລະກິດພາຍໃນແຂວງເຂົ້າຮ່ວມ.

   ທ່ານ ເດດສັກດາ ມະນີຄໍາ  ຫົວໜ້າພະແນກແຜນການ ແລະ ການລົງທຶນແຂວງໄດ້ລາຍງານໂດຍຫຍໍ້ກ່ຽວກັບຈຸດພິເສດ, ທ່າແຮງ, ສະພາບດ້ານການຄ້າ – ການລົງທຶນ ໂດຍສະເພາະ ສິ່ງທ້າທາຍຕ່າງໆ ທີ່ສົ່ງຜົນກະທົບທັງດ້ານດີ ແລະ ອຸປະສັກໃຫ້ແກ່ການຄ້າການລົງທຶນພາຍໃນແຂວງໃນໄລຍະ 1 ປີ ຜ່ານມາ ເຊິ່ງແຂວງຄຳມ່ວນ ໄດ້ກຳນົດເອົາ 3 ທ່າແຮງທີ່ເປັນພື້ນຖານໃນການພັດທະນາເສດຖະກິດສັງຄົມຄື :  ດ້ານກະສິກຳ ແລະ ປ່າໄມ້, ດ້ານພະລັງງານ ແລະ ບໍ່ແຮ່, ດ້ານການບໍລິການ ແລະ ການທ່ອງທ່ຽວ. ສະເພາະປີ 2022 ໄດ້ມີການອະນຸຍາດໂຄງການລົງທຶນກິດຈະການສໍາປະທານທັງໝົດ 68 ບໍລິສັດ/ໂຄງການ,  ທຶນທັງໝົດ 145,85 ລ້ານໂດລາສະຫາລັດ, ທຶນຈົດທະບຽນ 116,50 ລ້ານໂດລາສະຫາລັດ ແລະ ປີ 2022 ຜ່ານມາໄດ້ຍົກເລີກໂຄງການລົງທຶນທັງໜົດ 5 ບໍລິສັດ/ໂຄງການ ທຶນທັງໝົດ 1,74 ລ້ານໂດລາສະຫາລັດ, ທຶນຈົດທະບຽນ 1,74 ລ້ານໂດລາສະຫາລັດ. ໄດ້ອະນຸຍາດແຜນນໍາເຂົ້າດ້ວຍການຍົກເວັ້ນພາສີ ແລະ ອາກອນມູນຄ່າເພີ່ມໃນອັດຕາ 0% ຈໍານວນ 10 ບໍລິສັດ/ໂຄງການ ມູນຄ່າທັງໝົດ 17,30 ລ້ານໂດລາສະຫາລັດ ແລະ ມູນຄ່າ 273,02 ລ້ານກີບ.

     ພ້ອມນີ້, ກອງປະຊຸມຍັງໄດ້ຮັບຟັງການລາຍງານການຈັດເກັບລາຍຮັບຂອງແຂວງ, ການປະກອບຄໍາເຫັນຈາກແຕ່ລະພາກສ່ວນ, ບັນດານັກທຸລະກິດ ຢ່າງເລິກເຊິ່ງ, ກົງໄປກົງມາ ເພື່ອພ້ອມກັນຄົ້ນຄວ້າ, ປຶກສາຫາລື ແລະ ພ້ອມກັນກຳນົດມາດຕະການ, ວິທີການແກ້ໄຂບັນຫາຕ່າງໆ ທີ່ສ້າງຄວາມຫຍຸ້ງຍາກໃນການດໍາເນີນທຸລະກິດ ,ຫລຸດຜ່ອນຂອດຂັ້ນ ແລະ ການສ້າງສິ່ງອຳນວຍຄວາມສະດວກດ້ານຕ່າງໆ ຂອງຂະແໜງການທີ່ກ່ຽວຂ້ອງ ໃຫ້ມີຄວາມວ່ອງໄວ, ໂປ່ງໃສ, ຖືກຕ້ອງຕາມລະບຽບກົດໝາຍ ເພື່ອເສີມສ້າງຄວາມເຂັ້ມແຂງໃຫ້ແກ່ພາກທຸລະກິດຢູ່ພາຍໃນແຂວງ, ຮັບປະກັນໃຫ້ການລົງທຶນທີ່ມີປະສິດທິພາບສູງ, ສ້າງຄວາມອາດສາມາດໃນການແຂ່ງຂັນຂອງນັກທຸລະກິດພາຍໃນໃຫ້ສູງຂື້ນ ເຮັດໃຫ້ນັກລົງທຶນພາຍໃນ ແລະ ຕ່າງປະເທດມີຄວາມເຊື່ອໝັ້ນ ແລະ ຕັດສິນໃຈເຂົ້າມາດໍາເນີນ ແລະ ຂະຫຍາຍທຸລະກິດຢູ່ແຂວງຄໍາມ່ວນ ໃຫ້ນັບມື້ຫລາຍຂຶ້ນ ກາຍເປັນຄູ່ຮ່ວມພັດທະນາ, ເປັນກໍາລັງແຮງທີ່ສໍາຄັນໃນການປະກອບສ່ວນປະຕິບັດພັນທະຂອງຕົນຢ່າງຄົບຖ້ວນຕາມລະບຽບກົດໝາຍ, ສ້າງໃຫ້ແຂວງຄຳມ່ວນ ເປັນແຂວງທີ່ສາມາດກຸ່ມຕົນເອງທາງດ້ານງົບປະມານ, ພື້ນຖານເສດຖະກິດຂອງແຂວງໃຫ້ມີການຂະຫຍາຍຕົວຢ່າງໜັ້ນທ່ຽງ ແລະ ຍືນຍົງ.