ກະຊວງແຮງງານ ແລະ ສະຫວັດີການສັງຄົມ(ຮສສ) ຈັດກອງປະຊຸມປຶກສາຫາລືແຜນການແກ້ໄຂ ບັນຫາການຂາດເຂີນແຮງງານ ແລະ ປັບປຸງສະຫວັດດີການແຮງງານ ໃນວັນທີ 20 ມິຖຸນາ 2024 ໂດຍການເປັນປະທານຂອງ ທ່ານ ນາງ ໃບຄຳ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດີການສັງຄົມ.
ກອງປະຊຸມຄັ້ງນີ້ ເປັນກອງປະຊຸມປຶກສາຫາລືທາງດ້ານວິຊາການ ລົງເລິກປະກອບຄຳເຫັນຕໍ່ແຜນການແກ້ໄຂບັນຫາດັ່ງກ່າວ ຕົ້ນຕໍແມ່ນຕິດພັນກັບຄວາມຮັບຜິດຊອບຂອງແຕ່ລະພາກສ່ວນ ໂດຍສະເພາະ ບັນດາໜ້າວຽກສອດຄ່ອງແລ້ວບໍ, ຄວນຕັດ ຫລື ເພີ່ມບັນຫາໃດ?; ຈຸດບໍລິການຈັດຫາງານຂອງບັນດາເມືອງກຳນົດແນວນີ້ຈະເຮັດໄດ້ບໍ?; ບັນດາວິສາຫະກິດຈັດຫາງານ ເປັນອີກໜຶ່ງກົນໄກການຊ່ວຍບໍລິການຈັດຫາງານ? ແບ່ງຄວາມຮັບຜິດຊອບແນວນີ້ໄດ້ບໍ?; ພາກທຸລະກິດ, ຜູ້ປະກອບການທີ່ມີຄວາມຕ້ອງການແຮງງານຕ້ອງເຮັດແນວໃດຕື່ມບໍ ນອກຈາກກຳນົດຢູ່ໃນແຜນ ເປັນຕົ້ນ ການປັບປຸງສະພາບແວດ ລ້ອມ ໃນການເຮັດວຽກ, ສະຫວັດດີການແຮງງານ, ການສ້າງແຮງຈູງໃຈ, ການປະສານສົມທົບເຊິ່ງກັນແລະ ກັນແຕ່ຫົວທີ ໃນການສະໜອງແຜນຄວາມຕ້ອງການແຮງງານ, ການມີສ່ວນຮ່ວມໃນການປະກາດຮັບສະໝັກ, ບັນຈຸ ແລະ ຄຸ້ມຄອງແຮງງານ ແລະ ອື່ນໆ.
ທ່ານ ນາງ ໃບຄຳ ຂັດທິຍະ ມີຄຳເຫັນວ່າ: ການດູນດ່ຽງແຮງງານແມ່ນໜຶ່ງໃນ 5 ດູນດ່ຽງເພື່ອແກ້ໄຂບັນຫາຄວາມຫຍຸ້ງຍາກ ທາງດ້ານເສດຖະກິດຂອງລັດຖະບານ ໂດຍທ່ານນາຍົກລັດຖະມົນຕີ ໄດ້ອອກຂໍ້ຕົກລົງສະບັບເລກທີ 48/ນຍ, ແຕ່ງຕັ້ງຄະນະດຸ່ນດ່ຽງ ແລະ ສະໜອງແຮງງານເຂົ້າສູ່ບັນດາຫົວໜ່ວຍແຮງງານ, ໂຄງການລົງທຶນ ແລະ ບັນດາເຂດເສດຖະກິດ ຕາມຄວາມຕ້ອງການກຳລັງແຮງງານຕົວຈິງ. ພ້ອມນີ້, ກະຊວງ ຮສສ ໄດ້ອອກຂໍ້ຕົກລົງສະບັບເລກທີ 1932/ຮສສແຕ່ງ ຕັ້ງກອງເລຂາຂອງຄະນະດຸ່ນດ່ຽງທາງດ້ານການສະໜອງແຮງງານ ເພື່ອເປັນຈຸດປະສານງານ ແລະເປັນເສນາທິການໃຫ້ແກ່ຄະນະດຸ່ນດ່ຽງແຮງງານ.
ເພື່ອຜັນຂະຫຍາຍນິຕິກຳດັ່ງກ່າວ, ທັງເປັນການລົງເລິກແກ້ໄຂບັນຫາການຂາດແຄນແຮງງງານຢ່າງເປັນຮູບປະທຳ ໂດຍການມີສ່ວນຮ່ວມຢ່າງແຂງແຮງ ແລະ ເປັນເຈົ້າການຂອງທຸກພາກສ່ວນກ່ຽວຂ້ອງທັງພາກລັດ, ພາກທຸລະກິດ, ຜູ້ປະກອບການ ແລະ ແຮງງານເອງ, ກະຊວງ ຮສສ ໄດ້ລົງເລີກຄົ້ນຄວ້າແຜນການແກ້ໄຂບັນຫາການຂາດແຄນແຮງງານ ແລະ ປັບປຸງສະຫວັດດີການ, ເງື່ອນໄຂການເຮັດວຽກໃຫ້ຫົວໜ່ວຍແຮງງານ ເພື່ອສ້າງແຮງຈູງໃຈ ແລະ ດຶງດູດແຮງງານເຂົ້າສູ່ຕຳແໜ່ງງານ ຕາມຄວາມຕ້ອງການຂອງຕະຫລາດແຮງງງານ, ໃນແຜນດັ່ງກ່າວ ມີທັງການແກ້ໄຂບັນຫາໃນໄລຍະສັ້ນໆ, ໄລຍະຍາວ ເຊິ່ງຕິດພັນກັບການແບ່ງຄວາມຮັບຜິດຊອບ ລະຫວ່າງ ຂະແໜງ ຮສສ, ກະຊວງ, ກົມ, ພະແນກ ຮສສ ແຂວງ, ນະຄອນຫລວງ, ຈຸດບໍລິການຈັດຫາງານຂອງບັນດາເມືອງ, ສະມາຄົມຈັດຫາງານ, ວິສາຫະກິດບໍລິການຈັດຫາງານຢ່າງຊັດເຈນ, ຄວາມຮັບຜິດຊອບຂອງບັນດາກະຊວງຂະແໜງການ, ອົງການຕາງໜ້າຜູ້ອອກແຮງງານ, ອົງການຕາງໜ້າຜູ້ໃຊ້ແຮງງານ, ພາກທຸລະກິດ, ຫົວໜ່ວຍແຮງງານ, ຜູ້ປະກອບ ການ, ຄວາມຮັບຜິດຊອບຂອງອົງການປົກຄອງທ້ອງຖິ່ນ ໃນການຄຸ້ມຄອງການເຄື່ອນຍ້າຍຂອງພົນລະເມືອງ.
