ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ພາກລັດ ແລະ ເອກະຊົນ ຮ່ວມມືກັນພັດທະນາບຸກຄະລາກອນ ຂະແໜງກະສິກຳລາວ ໃຫ້ທຽບເທົ່າສາກົນ

ຄະນະວິທະຍາສາດປ່າໄມ້ມະຫາວິທະຍາໄລແຫ່ງຊາດລາວ ແລະ ບໍລິສັດບົວລະພາກະສິກໍາ ແລະ ປ່າໄມ້ຈໍາກັດ ໄດ້ຮ່ວມກັນເຊັນບົດບັນທຶກຮ່ວມດ້ານວິຊາການເພື່ອເປັນການກໍ່ສ້າງບຸກຄະລາກອນລາວ ໃຫ້ມີຄວາມາຮູ້, ຄວາມສາມາດໃນການປະກອບອາຊີບ.

ທ່ານນາງ ສຸໄພວັນ ທ່ຽງຈັນໄຊ, ຮອງອໍານວຍການບໍລິສັດ ບົວລະພາກະສິກໍາ ແລະ ປ່າໄມ້ຈໍາກັດກ່າວວ່າ: ການເຊັນສັນຍາຮ່ວມມືກັນໃນຄັ້ງນີ້ ຈະສ້າງຜົນປະໂຫຍດໃຫ້ທັງ​ສອງ​ຝ່າຍ, ເປັນຕົ້ນແມ່ນ ທາງບໍລິສັດບົວລະພາກະສິກໍາ-ປ່າໄມ້ ຈະຊ່ວຍສ້າງບຸກຄະລາກອນໄປຮັບໃຊ້ໃນທຸລະ​ກິດ ກໍ່ຄື ນັກສຶກສາທີ່ຮຽນຈົບຈາກຄະນະວິທະຍາສາດປ່າໄມ້ຈະໄດ້ໄປເຮັດວຽກຢູ່ນໍາບໍລິສັດ, ຢູ່ໂຮງງານໄມ້ອັດທີ່ກໍາລັງກໍ່ສ້າງ ເຊື່ງຈະສໍາເລັດໃນປີ 2021, ທາງຄະນະວິ​ທະຍາສາດປ່າໄມ້ຈະໄດ້ຮັບທຶນກໍ່ສ້າງບຸກຄະລາກອນພາຍໃນຄະນະ ໃຫ້ມີຄວາມຮູ້-ຄວາມສາມາດໃນການປະກອບສ່ວນເຂົ້າໃນອາຊີບວຽກງານ; ເມື່ອຮຽນຈົບອອກມາ ກໍ່ຖືວ່າເປັນການກະຕຸກຊຸກຍູ້ໃນຄະນະວິທະຍາສາດປ່າໄມ້ໃນການສ້າງບຸກຄະລາກອນ ຊຶ່ງຢູ່ພາຍໃຕ້ການຊ່ວຍເຫລືອຂອງລັດຖະບານອົດສະຕາລີ.
ໃນ​ໄລຍະຜ່ານມາ, ບໍລິສັດບົວລະພາກະສິກໍາ-ປ່າໄມ້ ໄດ້ຮ່ວມ​ກັບ ຄະນະວິທະຍາສາດປ່າໄມ້ ມາຫລາຍປີແລ້ວເປັນຕົ້ນ: ໄດ້ຮັບເອົານັກສຶກສາລົງຝຶກງານຢູ່ໃນສວນກ້າເບ້ຍໄມ້, ໂຮງງານປຸງແຕ່ງໄມ້, ສ່ວນໂຄງການຮ່ວມມືດັ່ງກ່າວມີໄລຍະເວລາ 5 ປີ ເຊຶ່ງບໍລິສັດບົວລະພາກະສິກໍາ-ປ່າໄມ້ ມີຄວາມຍິນດີທີ່ຈະນໍາໃຊ້ໂອກາດນີ້ ເພື່ອເຮັດໜ້າທີ່ໃຫ້ດີທີ່ສຸດໃນການ​ສະໜັບສະໜູນຄະນະວິທະຍາສາດປ່າໄມ້ ແລະ ບໍ່ພຽງແຕ່ໄລຍະເລີ່ມຕົ້ນຂອງອຸດສາຫະກໍາອັນໃໝ່ຂອງບໍລິສັດເທົ່ານັ້ນ ແຕ່ຍັງຈະສືບຕໍ່ໃຫ້ການສະໜັບສະໜູນຄະນະວິຊາ, ພາຍຫລັງທີ່ໂຮງງານໄມ້ອັດໄດ້ສືບຕໍ່ພັດທະນາຢ່າງເຕັມຮູບແບບໃນອະນາຄົດ.
ສຳລັບການຮ່ວມມືລະຫວ່າງພາກລັດ ແລະ ພາກເອກະຊົນໃນຄັ້ງນີ້, ຖືວ່າເປັນຮູບການທີ່ດີຊຶ່ງກໍາລັງໄດ້ຮັບການຈັດຕັ້ງປະຕິບັດໃນປະຈຸບັນຢູ່ລາວ, ທັງເປັນການປະກອບສ່ວນທີ່ສໍາຄັນໃນການພັດທະນາອຸດສາຫະກໍາໄມ້ລາວໃນອະນາ ຄົດຢ່າງມີປະສິດທິຜົນ.
ທ່ານນາງ ສຸໄພວັນ ທ່ຽງຈັນໄຊ, ຮອງອໍານວຍການບໍລິສັດ ບົວລະພາກະສິກໍາ ແລະ ປ່າໄມ້ຈໍາກັດ ໃຫ້ຮູ້ຕື່ມວ່າ: ຕະຫລອດໄລຍະໃນການດໍາເນີນທຸລະກິດຜ່ານມາໄດ້ປະກອບສ່ວນຊ່ວຍເຫລືອສັງຄົມ ກໍ່ຄື ສ້າງສາພັດທະນາປະເທດຊາດຈົນສາມາດຍາດໄດ້ຜົນງານຫລາຍດ້ານ, ເປັນຕົ້ນແມ່ນໄດ້ລາງວັນທຸລະກິດດີເດັ່ນຂອງອາຊຽນປີ 2018 ພ້ອມທັງ ໄດ້ຮັບລາງວັນນັກທຸລະກິດຊັ້ນນໍາດີເດັ່ນປີ 2019 ທີ່ຈັດຂຶ້ນໃນລະຫວ່າງວັນທີ 14 ກຸມພາ 2020 ຜ່ານມາ, ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ.

ຂຽນໂດຍ: ບຸນຍັງ ພຸດສະຫວັດ