ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຈາກກໍລະນີທີ່ສື່ສັງຄົມອອນລາຍອອກຂ່າວວ່າ ມີປາຕາຍຈໍານວນຫລາຍຢູ່ເຂດບ້ານກໍຝຸງ ເມືອງ ກວັນ ແຂວງ ຫົວພັນ ເຮັດໃຫ້ສັງຄົມມີຄວາມສົນໃຈຢາກຮູ້ເຖີງສາເຫດຂອງປາຕາຍທີ່ເກີດຂຶ້ນ.
ຕໍ່ບັນຫານີ້, ທ່ານ ພອນສິນ ພົມປານດາ, ຮອງຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງຫົວພັນ ໄດ້ຊີ້ແຈງຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງຊາດລາວ ໃນວັນທີ 1 ເມສາ ນີ້ວ່າ: ຂ່າວດັ່ງກ່າວມີມູນຄວາມຈິງແທ້ ເນື່ອງຈາກໃນວັນທີ 30 ມີນາ ຜ່ານມານີ້, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ໄດ້ສົ່ງວິຊາການທີ່ກ່ຽວຂ້ອງໄປເຄື່ອນໄຫວກວດກາຕົວຈິງເຫັນວ່າ: ເຫດປາຕາຍ ແມ່ນເກີດຂຶ້ນແຕ່ວັນທີ 29 ມີນາ ຊຶ່ງເກີດຢູ່ສາຍນໍ້າເຢື້ອງ ໂດຍກວມເອົາ 4 ບ້ານ ຄື: ບ້ານກໍຝຸງ, ສັນຄູນ, ທ່າຄວາຍ ແລະ ບ້ານບວກ.
ແຕ່ປັດຈຸບັນຍັງບໍ່ທັນຮູ້ກ່ຽວກັບສາເຫດທີ່ເຮັດໃຫ້ປາຕາຍເທື່ອ ເນື່ອງຈາກວິຊາການທີ່ໄປກວດກາຕົວຈິງບໍ່ທັນມີເຄື່ອງມືວັດແທກຄຸນນະພາບຂອງນໍ້າ, ແຕ່ໃນຂອບເຂດທີ່ໃກ້ຄຽງແມ່ນເຄີຍມີການສໍາຫລວດແຮ່ເຫລັກມາແຕ່ດົນແລ້ວແຕ່ຍັງບໍ່ທັນໄດ້ມີການເຄື່ອນໄຫວຂຸດຄົ້ນຫຍັງເທື່ອ.
ທ່ານໃຫ້ຮູ້ຕື່ມວ່າ: ໃນຕອນບ່າຍວັນທີ 1 ເມສານີ້ ທີມງານທີ່ກ່ຽວຂ້ອງຂອງແຂວງໄດ້ນໍາເອົາເຄື່ອງໄປກວດຄຸນນະພາບຂອງນໍ້າ ຄາດວ່າຈະຮູ້ຜົນລະອຽດໃນໄວໆນີ້, ເຊິ່ງປັດຈຸບັນຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງກວັນ ໄດ້ແຈ້ງໄປຫາປະຊາຊົນໃນຂອບເຂດທີ່ມີປາຕາຍ ຫ້າມເອົາປາທີ່ຕາຍໄປບໍລິໂພກ, ລວມເຖິງຫ້າມນໍາໃຊ້ນໍ້າຢູ່ເຂດດັ່ງກ່າວເທື່ອໃນປັດຈຸບັນນີ້ ເພື່ອຮັບປະກັນຄວາມປອດໄພ ຈົນກວ່າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ຈະຮູ້ລະອຽດກ່ຽວກັບສາເຫດຂອງປາຕາຍທີ່ເກີດຂຶ້ນຢູ່ 4 ບ້ານຂອງເມືອງກວັນໃນຄັ້ງນີ້.
See insights and ads
Boost post
All reactions:

You and 8 others