ພາກສ່ວນກ່ຽວຂ້ອງເລັ່ງກວດກາພື້ນທີ່ ບ້ານຜາສັງ ທີ່ມີລະເບີດແຈກໃສ່ເດັກນ້ອຍ

ວັນທີ 31 ພຶດສະພາ 2024 ນີ້, ທ່ານ ຄຳເພັດ ຈັນສົມພູ ເຈົ້າເມືອງເຟືອງ ໃຫ້ສຳພາດຜ່ານລາຍການຮອບບ້ານຜ່ານເມືອງ ວິທະຍຸກະຈາຍສຽງແຫ່ງຊາດລາວ ກ່ຽວກັບເຫດລະເບີດແຕກໃສ່ເດັກນ້ອຍເສຍຊີວິດ 2 ຄົນ, ບາດເຈັບ 6 ຄົນ ຢູ່ບ້ານຜາສັງ ເມືອງເຟືອງ ແຂວງວຽງຈັນ ວ່າ: ເຫດການລະເບີດແຕກ ແມ່ນເກີດຂຶ້ນໃນເວລາ 16:30 ໂມງ ຂອງວັນທີ 28 ພຶດສະພາ 2024, ເດັກນ້ອຍທີ່ຖືກເຄາະຮ້າຍແມ່ນລູກຂອງຄອບຄົວທ້າວ ວາເມັ່ງທາວ, ຄອບຄົວ ທ້າວ ເຢຍທີທາວ ແລະ ຄອບຄົວ ທ້າວ ເຢີທາວ ທັງສາມຄອບຄົວເປັນຍາດພີ່ນ້ອງກັນ ແລະ ໄດ້ພາກັນໄປໄຮ່ຂອງ ທ້າວວາເມັ່ງທາວ ຢູ່ຫ້ວຍກະບືໃຫຍ່ ເພື່ອຊ່ວຍກຽມໃສ່ເຂົ້າໄຮ່ ໂດຍທີ່ລູກຂອງທັງສາມຄອບຄົວໄປນຳ 8 ຄົນ.

ຂະນະທີ່ໄປຮອດໄຮ່ແລ້ວພໍ່ແມ່ເດັກກໍ່ໄດ້ໄປເຮັດໄຮ່ ແລ້ວປ່ອຍລູກເລາະຫລິ້ນຕາມອັດຖະຍາໄສ ແລ້ວຖືກເຄາະຮ້າຍລະເບີດແຕກໃສ່ ມີຜູ້ເສຍຊີວິດ 2 ຄົນ ເປັນເພດຊາຍ 12 ປີ ແລະ 13 ປີ. ສ່ວນເດັກອີກ 6 ຄົນ ອາຍຸ 4-11 ປີແມ່ນບາດເຈັບ ແລະ ໄດ້ນຳສົ່ງປິ່ນປົວຢູ່ໂຮງໝໍ ມິດຕະພາບ 150 ຕຽງ.

ປັດຈຸບັນທາງເມືອງ ແລະ ພາກສ່ວນກ່ຽວຂ້ອງໄດ້ເລັ່ງກວດສອບກວດກາພື້ນທີ່ດັ່ງກ່າວ, ສຳລັບການຊ່ວຍເຫລືອຄອບຄົວຜູ້ເຄາະຮ້າຍນັ້ນ ອົງການປົກຄອງເມືອງ, ອົງການເກັບກູ້ລະເບີດບໍ່ທັນແຕກ ພວມເລັ່ງໃຫ້ການຊ່ວຍເຫລືອ ເຊິ່ງໄດ້ມີງົບປະມານຈຳນວນໜຶ່ງເຂົ້າຊ່ວຍເຫລືອຄອບຄົວຜູ້ເສຍຊີວິດແລ້ວ ພ້ອມທັງເລັ່ງຊ່ວຍເຫລືອຄອບຄົວຜູ້ໄດ້ຮັບບາດເຈັບຕື່ມອີກ.