ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ສະຫາຍ ພົນຈັດຕວາ ທຽມ ຫອມຊະນະ ຫົວໜ້າກົມເຄມີສາດ ກົມໃຫຍ່ເສນາທິການກອງທັບ ໄດ້ໃຫ້ສຳພາດວ່າ: ຕະຫຼອດໄລຍະ 75 ປີ ແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ພາຍໃຕ້ການນຳພາຂອງພັກປະຊາຊົນປະຕິວັດລາວ ແມ່ນ ປະຫວັດສາດແຫ່ງການທົດສອບອັນໃຫຍ່ຫຼວງໃນການຕໍ່ສູ້ອັນ ຍືດເຍື້ອຍາວນານ ເພື່ອຍາດເອົາຄວາມເປັນເອກະລາດແຫ່ງຊາດ ບົນເສັ້ນທາງທີ່ລະອິດລະອ້ຽວ, ຫຍຸ້ງຍາກລຳບາກທີ່ສຸດນັ້ນ, ແຕ່ກໍປ່ຽມລົ້ນໄປດ້ວຍຜົນງານ ແລະ ໄຊຊະນະອັນສະຫງ່າລາສີ ພາຍໃຕ້ການນຳພາອັນສະຫຼາດສ່ອງໃສຂອງພັກປະຊາຊົນ ປະຕິວັດລາວ, ກອງທັບເຮົາໄດ້ສາມັກຄີເປັນຈິດໜຶ່ງໃຈດຽວກັນ ສູ້ຮົບຢ່າງພິລະອາດຫານ, ອອກແຮງປັບປຸງກໍ່ສ້າງກໍາລັງຕົນເອງ ໃຫ້ນັບມື້ເຕີບໃຫຍ່ເຂັ້ມແຂງ ຂະຫຍາຍຕົວເປັນກ້າວໆມາ. ໃນໄລຍະຕໍ່ສູ້ປົດປ່ອຍຊາດ ກອງທັບປະຊາຊົນລາວ ໄດ້ປະເຊີນໜ້າ ກັບສັດຕູຜູ້ຮຸກຮານທີ່ເຂັ້ມແຂງ ຮ້າຍກາດ, ແຕ່ກອງທັບເຮົາກໍມີ ຄວາມເດັດດ່ຽວອາດຫານສູ້ຮົບ, ຍິ່ງຕີກໍຍິ່ງມີໄຊຊະນະ ແລະ ເຕີບໃຫຍ່ເຂັ້ມແຂງເປັນກ້າວໆ ຈົນສາມາດປົດປ່ອຍ ປະເທດຊາດໄດ້ຢ່າງສົມບູນ ໃນວັນທີ 2 ທັນວາ 1975 ເຮັດໃຫ້ ປະເທດຊາດໄດ້ຮັບການສະຖາປະນາມາເປັນ ປະເທດ ສາທາລະນະລັດ ປະຊາທິປະໄຕ ປະຊາຊົນລາວ, ການປະຕິວັດຢູ່ ປະເທດເຮົາໄດ້ກ້າວສູ່ໄລຍະໃໝ່, ໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ, ກອງທັບເຮົາໄດ້ກາຍເປັນ ກຳລັງຫຼັກແຫຼ່ງໃນການປະຕິບັດແນວທາງ ປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ ຕິດພັນກັບການພັດທະນາ ແລະ ວຽກງານ 3 ສ້າງ, ເດັດດ່ຽວ ປະຕິບັດແນວທາງປ່ຽນແປງໃໝ່ຂອງພັກ, ຮັກສາ ແລະ ເສີມຂະຫຍາຍທາດແທ້, ມູນເຊື້ອປະຕິວັດ, ຕັ້ງໜ້າປັບປຸງກໍ່ສ້າງ ກຳລັງໃຫ້ນັບມື້ເຕີບໃຫຍ່ເຂັ້ມແຂງທຸກດ້ານ ແລະ ເຮັດສຳເລັດ ທຸກໜ້າທີ່ການເມືອງຂອງຕົນ.
ສະຫາຍພົນຈັດຕະວາ ທຽມ ຫອມຊະນະ ໃຫ້ຮູ້ຕື່ມວ່າ: ເນື່ອງໃນໂອກາດກະກຽມສະເຫຼີມສະຫຼອງ ວັນສ້າງຕັ້ງ ກອງທັບ ຄົບຮອບ 75 ປີ ນີ້ ຄະນະພັກ-ຄະນະນໍາແຕ່ລະຂັ້ນຂອງກົມເຄມີສາດຍັງຈະໄດ້ ສືບຕໍ່ເອົາໃຈໃສ່ ເອົາໃຈໃສ່ເຮັດວຽກງານສຶກສາອົບຮົມ ການເມືອງ-ນໍາພາແນວຄິດເປັນປົກກະຕິ ເຮັດໃຫ້ພະນັກງານ-ນັກຮົບມີແນວຄິດອຸ່ນອຽນທຸ່ນທ່ຽງ, ອົດທົນຜ່ານຜ່າຄວາມຫຍຸ້ງຍາກ, ມີຄວາມບຸກບືນຫ້າວຫັນ ປະຕິບັດໜ້າທີ່ວຽກງານທີ່ໄດ້ຮັບມອບໝາຍເປັນຢ່າງດີ, ສືບຕໍ່ປັບປຸງ ກໍ່ສ້າງພັກໃຫ້ມີຄວາມເຂັ້ມແຂງ ແລະ ໜັກແໜ້ນໃນທຸກດ້ານ, ເອົາໃຈໃສ່ສ້າງ ກົມກອງ 3 ປອດ ໄປຄຽງຄູ່ກັບການສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ, ສ້າງນັກຮົບວັດທະນະທໍາ-ກົມກອງວັດທະນະທໍາ, ຍົກສູງການອົບຮົມຫັດແອບວິຊາສະເພາະເຄມີ ໂດຍສຸມໃສ່ການອົບຮົມ-ຫັດແອບເຮັດໃຫ້ຄຸນນະພາບຂອງວຽກງານກຽມພ້ອມສູ້ຮົບດີ ຂຶ້ນເປັນກ້າວ ໆ ນອກຈາກນັ້ນຍັງໄດ້ຈັດຕັ້ງຫັດແອບເພີ່ມເຕີມ ໃນບັ້ນການຊ້ອມຮົບປະສານສະແດງກໍາລັງ ໃນງານສະເຫຼີມສະຫຼອງ ວັນສ້າງຕັ້ງກອງທັບ ຄົບຮອບ 75 ປີ ໃຫ້ມີປະສິດທິຜົນສູງ ແລະ ໄດ້ຊີ້ນໍາວຽກງານແກ້ໄຂຊີວິດການ ເປັນຢູ່ຂອງກົມກອງໃຫ້ດີຂຶ້ນ ດ້ວຍການສ້າງພະລາທິການກັບທີ່, ຂົງເຂດຂະແໜງເຕັກນິກແມ່ນໄດ້ເອົາໃຈໃສ່ວຽກງານຄຸ້ມ ຄອງ,ບົວລະບັດຜັດເຊັດ ພາຫະ ນະ,ເຕັກນິກຢ່າງເປັນປົກກະຕິ ເພື່ອຮັບປະກັນໃຫ້ແກ່ວຽກງານ ອົບຮົມ-ຫັດແອບ, ທໍາລາຍເຄມີກຽມພ້ອມສູ້ຮົບ ແລະ ສູ້ຮົບ ໃນສະເພາະໜ້າ ແລະ ຍາວນານ; ອອກແຮງແຂ່ງຂັນກັນສ້າງຜົນງານດ້ານຕ່າງໆ ເປັນຕົ້ນແມ່ນ ຂະບວນການສິນລະປະ, ວັນນະຄະດີ, ຂະບວນການອານາໄມ, ປະດັບປະດາສະຖານທີ່ຄ້າຍຄູ ແລະ ຂະບວນການແຂ່ງຂັນກິລາໃຫ້ມີບັນຍາກາດຟົດຟື້ນມ່ວນຊື່ນ.
ໂດຍ: ເຊໂປນ ມະໂນກຸນ
May be an image of 1 person
May be an image of 9 people, grass and tree