ພິທີດັ່ງກ່າວຈັດຂື້ນໃນ ວັນທີ 20 ພະຈິກ 2023 ທີ່ ປະຕູໄຊ, ນະຄອນຫຼວງວຽງຈັນ, ເຂົ້າຮ່ວມມີທ່ານ ນາງອາລີ ວົງໜໍ່ບຸນທຳ ປະທານສູນກາງສະຫະພັນແມ່ຍິງລາວ, ຮອງປະທານ, ຜູ້ປະຈຳການ ຄຊກມດ, ມີທ່ານ ນາງ ດຣ. ເພຍ ເຣເບລໂລ ບຣິດໂຕ ຜູ້ຕາງໜ້າອົງການຢູນີເຊັບປະຈຳລາວ, ມີບັນດາທ່ານ ຄະນະນໍາ ຕາງໜ້າຈາກບັນດາກະຊວງ-ອົງການ, ທ່ານຜູ້ຕາງໜ້າອົງການຢູນິເຊັບ ປະຈຳ ສປປ ລາວ ແລະ ອົງການຈັດຕັ້ງສາກົນ, ບັນດາຄູອາຈານ ແລະ ນ້ອງນັກຮຽນ ເຂົ້າຮ່ວມ.
ພິທີຍ້ອມໄຟສີຟ້າທີ່ປະຕູໄຊມື້ນີ້ ໄປພ້ອມໆກັບປະຊາຊາດໃນທົ່ວໂລກເພື່ອສະເຫຼີມສະຫຼອງວັນຄົບຮອບ 34 ປີຂອງສົນທິສັນຍາ ວ່າດ້ວຍ ສິດທິເດັກ (ວັນເດັກໂລກ 20ພະຈິກ) ແລະ ໂອກາດສະເຫຼີມສະຫຼອງວັນຄົບຮອບ 50 ປີແຫ່ງການພົວພັນຮ່ວມມື ລະຫວ່າງລັດຖະບານແຫ່ງ ສປປ ລາວ ແລະ ອົງການຢູນິເຊັບປະຈຳ ສປປ ລາວ; ໃນປີນີ້ ພວກເຮົາສະເຫຼີມສະຫຼອງພາຍໃຕ້ຄຳຂັວນທີ່ວ່າ “ການລົງທຶນໃນອານາຄົດ ຄືການລົງທຶນໃສ່ເດັກ (Investing in Our Future means Investing in Our Children)”
ຄຽງຄູ່ກັບກິດຈະກຳຄັ້ງນີ້, ຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກໄດ້ມີຫຼາຍໆກິດຈະກໍາ ໂດຍຮ່ວມມືກັບບັນດາ ຄກມດ ກະຊວງ/ອົງການ, ແຂວງ, ຄູ່ຮ່ວມພັດທະນາ ແລະ ພາກທຸລະກິດເອກະຊົນ ລວມທັງຄູອາຈານ ແລະ ນ້ອງໆທີ່ເປັນຕົວແທນເດັກຫຼາຍກຸ່ມຄື ເດັກໃນຕົວເມືອງ, ເດັກຊົນນະບົດ, ເດັກຊົນເຜົ່າ ແລະ ເດັກພິການ
ຊຶ່ງກິດຈະກຳທັງໝົດລວມມີ : ການປະກວດຮູບແຕ້ມຂອງເດັກ, ກອງປະຊຸມຕົວແທນເດັກ ໃນຫົວຂໍ້ທີ່ກ່ຽວຂ້ອງກັບເດັກ ໃນ 03 ຫົວຂໍ້ຄື: ຜົນກະທົບຕໍ່ເດັກຈາກການປ່ຽນແປງດິນຟ້າອາກາດ ແລະ ໄພພິບັດ, ການແຕ່ງດອງແຕ່ອາຍຸຍັງນ້ອຍ ແລະ ການຖືພາຂອງເດັກ, ເດັກກັບສື່ສັງຄົມອອນລາຍ,
ທ່ານ ນາງອາລີ ວົງໜໍ່ບຸນທຳ ປະທານສູນກາງສະຫະພັນແມ່ຍິງລາວ, ຮອງປະທານ, ຜູ້ປະຈຳການ ຄຊກມດ ກ່າວວ່າ : ” ການຍ້ອມໄຟສີຟ້າໃສ່ສຳນັກງານອົງການ ແລະ ສະຖານທີ່ສຳຄັນ ເພື່ອປູກຈິດສໍານຶກ, ປຸກລະດົມສັງຄົມ ແລະ ທຸກຄົນ ເຂົ້າຮ່ວມ, ລົງທຶນໃສ່ເດັກ, ສົ່ງເສີມສິດທິເດັກ, ສ້າງຄວາມເຂັ້ມແຂງ, ສົ່ງເສີມສິດທິເດັກ ແລະ ຄວາມເປັນຢູ່ທີ່ດີສໍາລັບເດັກ ແລະ ເພື່ອເປັນສັນຍາລັກເຖິງສິດທິເດັກ ຮ່ວມກັບບັນດາປີຊາຊາດໃນທົ່ວໂລກ ໃນໂອກາດສະເຫຼີມສະຫຼອງວັນຄົບຮອບສົນທິສັນຍາ ວ່າດ້ວຍ ສິດທິເດັກ (ວັນເດັກໂລກ 20 ພະຈິກ) “
