ວັນທີ 16 ສິງຫາ 2024, ສະຖາບັນການຕ່າງປະເທດ, ກະຊວງການຕ່າງປະເທດ ໄດ້ຈັດພິທີປິດຊຸດຝຶກອົບຮົມ ພິທີການທູດ ແລະ ພາສາອັງກິດ ສຳລັບ ພັນລະຍາການນຳ ເພື່ອປະກອບສ່ວນເຂົ້າໃນກິດຈະກໍາວຽກງານອາຊຽນ ປີ 2024 ທີ່ ໂຮງແຮມ ຄຣາວພລາຊ່າ, ໂດຍໄດ້ຮັບການສະໜັບສະໜູນຈາກ ສະຖານ ທູດອົດສະຕຣາລີ ປະຈໍາ ສປປ ລາວ ແລະ ກະຊວງການຕ່າງປະເທດ.
ຊຸດຝຶກອົບຮົມດັ່ງກ່າວໄດ້ດຳເນີນມາເປັນເວລາ 3 ວັນ, ນັບແຕ່ວັນທີ 14-16 ສິງຫາ 2024, ໃຫ້ກຽດເປັນປະທານໃນພິທີປິດໃນຄັ້ງນີ້ ໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ. ມີ ທ່ານເອກອັກຄະລັດ ຖະທູດອົດສະຕຣາລີ ປະຈຳ ສປປ ລາວ ພ້ອມດ້ວຍພະນັກງານສະຖານທູດ, ຕາງໜ້າຈາກບັນດາກົມຈາກກະຊວງການຕ່າງປະເທດ, ຄະນະສະຖາບັນການຕ່າງປະເທດ, ວິ ທະຍາກອນ, ຄະນະຮັບຜິດຊອບຊຸດຝຶກອົບຮົມ ແລະ ນັກສຳມະນາກອນຂອງຊຸດຝຶກອົບຮົມເຂົ້າຮ່ວມທັງໝົດ ຈຳນວນ 60 ທ່ານ, ໃນນີ້ ມີຜູ້ເຂົ້າຮ່ວມຝຶກອົບຮົມທັງໝົດ 43 ທ່ານ.
ຈຸດປະສົງຂອງການຈັດຊຸດຝຶກອົບຮົມໃນຄັ້ງນີ້ ເພື່ອເປັນການກະກຽມຄວາມພ້ອມໃນດ້ານຕ່າງໆ ໃຫ້ແກ່ບັນດາພັນລະຍາການນຳຂັ້ນສູງຈາກສຳນັກງານປະທານປະເທດ, ສຳນັກງານນາຍົກລັດຖະມົນຕີ, ກະຊວງການຕ່າງປະເທດ, ສະພາແຫ່ງຊາດ, ຄະນະພົວພັນຕ່າງປະເທດສູນກາງພັກ ແລະ ບັນດາກະຊວງທີ່ກ່ຽວຂ້ອງຈາກ 3 ເສົາຄໍ້າປະຊາຄົມອາຊຽນ ແລະ ອື່ນໆ, ກ່ຽວກັບວຽກງານພິທີການທູດ ແລະ ການສື່ສານພາສາອັງກິດຂັ້ນພື້ນຖານ ໃຫ້ແກ່ພັນລະຍາການນຳຂັ້ນສູງ ເພື່ອເປັນຄວາມຮູ້ພື້ນ ຖານ ໃນການເຄື່ອນໄຫວວຽກງານຕາມພາລະບົດບາດໃນການເປັນເຈົ້າພາບ, ໃນໂອ ກາດຕິດຕາມການເຄື່ອນໄຫວຕ່າງປະເທດ ແລະ ເນື່ອງໃນໂອກາດວັນສໍາຄັນຕ່າງໆ. ພ້ອມນີ້, ກໍເປັນການກະກຽມຄວາມພ້ອມໃນການຕ້ອນຮັບ ແລະ ເຂົ້າຮ່ວມກິດຈະກຳຕ່າງໆຂອງພັນລະຍາການນຳອາຊຽນ ໃນໄລຍະທີ່ ສປປ ລາວ ເປັນເຈົ້າພາບກອງປະ ຊຸມສຸດຍອດອາຊຽນ ປີ 2024 ແລະ ການເຄື່ອນໄຫວການພົບປະສອງຝ່າຍທາງລັດຖະການ.
ການຈັດຊຸດຝຶກອົບຮົມຄັ້ງນີ້ ແມ່ນໄດ້ຮັບຜົນສໍາເລັດເປັນຢ່າງດີ, ເຊິ່ງຜູ້ເຂົ້າຮ່ວມຝຶກອົບຮົມ ໄດ້ຮັບຮູ້ຂໍ້ມູນພື້ນຖານ ກ່ຽວກັບ ວຽກງານຕ່າງໆ ເປັນຕົ້ນ: ໄດ້ແລກປ່ຽນຄໍາຄິດຄໍາເຫັນ ກ່ຽວກັບ ພິທີການທູດ-ມາລະຍາດທາງສັງຄົມ, ການກະ ກຽມດ້ານພິທີການໃຫ້ແກ່ການໄປເຄື່ອນໄຫວ ຢູ່ ພາຍໃນ ແລະ ຕ່າງປະເທດ, ການຕ້ອນຮັບແຂກຂັ້ນສູງຂອງຕ່າງປະເທດ ພ້ອມທັງໄດ້ມີການຝຶກຊ້ອມການເຮັດຈຳ ລອງຕົວຈິງອື່ນໆ. ນອກຈາກນີ້, ຜູ້ເຂົ້າຮ່ວມກໍໄດ້ມີໂອກາດແລກປ່ຽນປະສົບການ, ການເປັນເຈົ້າພາບກອງປະຊຸມສຸດຍອດ ອາຊຽນ-ອົດສະຕຣາລີ ຂອງ ອົດສະຕຣາລີ ແລະ ແຜນການເຄື່ອນໄຫວກິດຈະກໍາຕ່າງໆຂອງພັນລະຍາການນໍາອາຊຽນ ສໍາລັບປີ 2024, ເຊິ່ງເຫັນວ່າເປັນບົດຮຽນທີ່ສໍາຄັນໃຫ້ແກ່ບັນດາຜູ້ເຂົ້າຮ່ວມ ເພື່ອນໍາມາໝູນ ໃຊ້ໃນການປະຕິບັດຕົວຈິງ ໂດຍສະເພາະປະກອບສ່ວນເຂົ້າໃນກິດຈະກໍາຕ່າງໆຂອງພັນລະຍາການນໍາອາຊຽນ ໃນໄລຍະທີ່ ສປປ ລາວ ເປັນປະທານອາຊຽນ ປີ 2024 ໃຫ້ໄດ້ຮັບໝາກຜົນຢ່າງຈົບງາມ.
