ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີມອບປຶ້ມ ເສັ້ນທາງປະສານໃຈ ເຊິ່ງແມ່ນການໂຮມບົດປະພັນ ຮູບພາບ ແລະຮູບແຕ້ມຂອງນັກປະພັນລາວ ຈັດຂຶ້ນຕອນບ່າຍວັນທີ 8 ທັນວາ 2023 ທີ່ຫໍສະໝຸດແຫ່ງຊາດ ນະຄອນຫລວງວຽງຈັນ ໂດຍມີທ່ານນາງແສງແກ້ວ (MO XiaoLing) ຫົວໜ້າວິທະຍຸໂທລະພາບສູນກາງຈີນ ປະຈຳລາວ, ທ່ານ ທອງໃບ ໂພທິສານ ປະທານສະມາຄົມນັກປະພັນລາວ, ທ່ານ ສໍາລານ ຫຼວງອາໄພ, ຫົວໜ້າອໍານວຍການຫໍສະໝຸດແຫ່ງຊາດລາວ ພ້ອມດ້ວຍນັກປະພັນ, ນັກກະວີ ແລະພາກສ່ວນກ່ຽວຂ້ອງເຂົ້າຮ່ວມ.
ທ່ານນາງແສງແກ້ວ (MO XiaoLing) ກ່າວວ່າ: ຂ້າພະເຈົ້າຮູ້ສຶກດີໃຈແລະພາກພູມໃຈ ທີ່ໄດ້ມີສວ່ນຮວ່ມໃນຜົນສໍາເລັດ ຂອງການພິມປື້ມ ເສັ້ນທາງປະສານໃຈ, ເຊິ່ງເປັນຜົນງານໜຶ່ງຂອງໂຄງການ ບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນ ໂດຍການຮວ່ມມືກັນລະຫວ່າງສະມາຄົມນັກປະພັນລາວ ກັບວິທະຍຸໂທລະພາບສູນກາງຈີນ (CMG) ປະຈຳລາວ.
ໃນນາມວິທະຍຸໂທລະພາບສູນກາງຈີນປະຈຳລາວ ແລະໃນນາມສວ່ນຕົວຂ້າພະເຈົ້າຂໍສະແດງຄວາມຂອບໃຈເປັນຢ່າງສູງ ຕໍ່ກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ ທີ່ໄດ້ໃຫ້ກຳລັງໃຈ ແລະການສະໜັບສະໜູນຢ່າງແຂງແຮງ ຕໍ່ໂຄງການນີ້. ພ້ອມດຽວກັນນີ້ ກໍຂໍສະແດງຄວາມຂອບໃຈມາຍັງອໍານາດການປົກຄອງ 4 ແຂວງພາກເໜືອ ທີ່ໄດ້ຊ່ວຍປະສານງານ, ຈັດຕັ້ງພະນັກງານແລະເຈົ້າໜ້າທີ່ຕ່າງໆມາອຳນວຍຄວາມສະດວກ, ລວມທັງຈັດສັນລົດລາງພາຫະນະຕ່າງໆ ເພື່ອໃຫ້ພວກຂ້າພະເຈົ້າເດີນທາງໄປຮອດແຕ່ລະເປົ້າໝາຍສະຖານທີ່ ເພື່ອເກັບກຳຂໍ້ມູນ, ຂອບໃຈບໍລິສັດລົດໄຟລາວ-ຈີນ ອຳນວຍຄວາມສະດວກໃນການເດີນທາງ ແລະເກັບກຳຂໍ້ມູນ, ພິເສດ, ຂໍຂອບໃຈມາຍັງ ນັກປະພັນ ນັກຂຽນ ນັກແຕ້ມ ແລະນັກຖ່າຍພາບ ທີ່ໄດ້ເດີນທາງໄປນຳພວກຂ້າພະເຈົ້າ ໂດຍບໍ່ຢ້ານຄວາມອິດເມື່ອຍ, ບໍ່ຢ້ານແດດຢ້ານຝົນ, ບໍ່ຢ້ານເສັ້ນທາງທຸລະກັນດານ ສູ້ຊົນໄປນຳກັນ ເພື່ອໄດ້ຮັບຂໍ້ມູນຕົວຈິງ ແລະ ເປັນຂໍ້ມູນມືໜຶ່ງມາຜະລິດເປັນບົດກະວີ, ບົດເລື່ອງລາວເລື່ອງສັ້ນ, ຮູບພາບ, ຮູບແຕ້ມ ແລະຈຶ່ງໄດ້ເຫັນຜົນງານທີ່ປະກົດອອກມາສູ່ສັງຄົມໃນມື້ນີ້.
ໂຄງການນີ້ເລີ່ມມີຂຶ້ນໃນ ເດືອນພະຈິກ ປີ 2022, ແນໃສ່ ບັນທຶກຜົນງານແລະຄວາມຮັກຄວາມແພງຕາມເສັ້ນທາງລົດໄຟລາວ-ຈີນໂດຍຜ່ານບົດຂຽນ ຮູບພາບ ແລະຮູບແຕ້ມ ຈາກນັກປະພັນ, ນັກກະວີ, ນັກແຕ້ມ ແລະນັກຖ່າຍພາບ ທີ່ມີຊື່ສຽງ ຂອງສປປລາວ, ເຮັດໃຫ້ປະຊາຊົນສອງຊາດລາວ-ຈີນ ກໍຄືປະຊາຊົນທົ່ວໂລກຮັບຮູ້ເຖິງຜົນສຳເລັດຂອງເສັ້ນທາງສາຍນີ້, ມັກຮັກເສັ້ນທາງສາຍນີ້, ທັງປຸກລະດົມຄວາມກະຕືລືລົ້ນແລະຄວາມພາກພູມໃຈຂອງປະຊາຊົນລາວໃນພາລະກິດແຫ່ງການປົກປັກຮັກສາເສັ້ນທາງລົດໄຟລາວ-ຈີນ, ເຮັດໃຫ້ການຮ່ວມມືລາວ-ຈີນລົງເລິກເຂົ້າເຖິງໝາກຫົວໃຈຂອງປະຊາຊົນທັງ2ປະເທດ.
ໂດຍຜ່ານຄວາມພະຍາຍາມຮ່ວມກັນເປັນເວລາໜຶ່ງປີ, ປຶ້ມ ເສັ້ນທາງປະສານໃຈ ກໍໄດ້ຂຽນ ແລະຈັດພິມໃຫ້ສຳເລັດ ດັ່ງທີ່ພວກເຮົາໄດ້ເຫັນໃນມື້ນີ້, ຫວັງວ່າ, ຜ່ານປື້ມເຫຼັ້ມນີ້, ຈະສາມາດບອກເລົ່າເຖິງຄວາມຮູ້ສຶກທີ່ປະທັບໃຈຂອງທຸກຊັ້ນຄົນໃນສັງຄົມລາວນັບແຕ່ຊາວໜຸ່ມເຍົາວະຊົນ ຮອດ ປັນຍາຊົນ ນັກຮຽນຮູ້ ນັກສຶກສາ,ພໍ່ແມ່ປະຊາຊົນທີ່ຢູ່ລຽບຕາມທາງລົດໄຟລາວ-ຈີນ, ລວມທັງນັກທ່ອງທ່ຽວຕ່າງປະເທດທີ່ໄດ້ສຳພັດຕົວຈິງຢ່າງປະທັບໃຈ ໃນການເດີນທາງດວ້ຍລົດໄຟລາວ-ຈີນ. ຫວັງຢ່າງຍິ່ງວ່າ: ປື້ມເສັ້ນທາງປະສານໃຈເຫຼັ້ມນີ້ ຈະໄດ້ກາຍເປັນບົດບັນທຶກໜຶ່ງທີ່ສ່ອງແສງໃຫ້ເຫັນເຖິງຄວາມສະໜິດຕິດພັນທີ່ຮັກແພງກົມກຽວກັນຕະຫຼອດໄປ ລະຫວ່າງປະຊາຊົນສອງຊາດລາວ-ຈີນຜ່ານເສັ້ນທາງລົດໄຟລາວ-ຈີນ.
ທ່ານ ທອງໃບ ໂພທິສານ, ປະທານສະມາຄົມນັກປະພັນລາວ ກ່າວວ່າ: ໂຄງການນີ້ເປັນໂຄງການໃຫຍ່ ທີ່ມີຄວາມໝາຍ ແລະ ຄວາມສໍາຄັນທາງປະຫວັດສາດ ເວົ້າສະເພາະແມ່ນສໍາລັບວົງການນັກປະພັນລາວ, ສະນັ້ນທາງສະມາຄົມນັກປະພັນລາວ ຈິ່ງໄດ້ຄັດເລືອກເອົານັກປະພັນຜູ້ທີ່ດີເດັ່ນ ແລະ ມີຊື່ສຽງຂອງລາວຈໍານວນ 15 ທ່ານ ເຂົ້າຮ່ວມ, ໃນນີ້ ມີທັງນັກຂຽນຜູ້ອາວຸໂສ, ນັກຂຽນໜຸ່ມ, ນັກຂຽນຍິງ ແລະ ນັກຂຽນສົງ. ມີນັກປະພັນ ແລະ ນັກກະວີລາງວັນວັນນະກໍາສ້າງສັນຍອດຢ້ຽມແຫ່ງອາຊຽນ ຫຼືຊີໄຣ 5 ທ່ານ, ຜູ້ໄດ້ຮັບລາງວັນວັນນະກໍາພາກພື້ນແມ່ນໍ້າຂອງ 5 ທ່ານ ແລະ ຜູ້ໄດ້ຮັບລາງວັນຊະນະເລີດສິນໄຊ ແລະ ລາງວັນກວດສອບບົດປະພັນວັນນະຄະດີທົ່ວປະເທດມາແລ້ວ ທັງນີ້ກໍເພື່ອຮັບປະກັນໝາກຜົນທີ່ຈະໄດ້ຮັບຕາມຈຸດປະສົງເປົ້າໝາຍຂອງໂຄງການທີ່ໄດ້ວາງໄວ້.
ໃນຕະຫຼອດໄລຍະຂອງການເດີນທາງທາງລົດໄຟທີ່ຍາວໄກ ເປັນເວລາເຖິງ 2 ອາທິດຊຶ່ງເຕັມໄປດ້ວຍບັນຍາກາດທີ່ຕື່ນເຕັ້ນ ປະທັບໃຈ ຄຶກຄື້ນ ຟົດຟື້ນ ແລະມ່ວນຊື່ນໃນຄັ້ງນີ້ ທີ່ບັນດານັກປະພັນນັກກະວີທັງໝົດ ມີໂອກາດໄດ້ສໍາຜັດກັບເຫດການຕົວຈິງຜ່ານ 5 ແຂວງທີ່ແລວທາງລົດໄຟລາວ-ຈີນຜ່ານ ເປັນຕົ້ນ: ນະຄອນຫຼວງວຽງຈັນ, ແຂວງວຽງຈັນ, ຫຼວງພະບາງ, ອຸດົມໄຊ ແລະ ຫຼວງນໍ້າທາ, ໄດ້ສໍາຜັດກັບບັນຍາກາດຕົວຈິງ, ໄດ້ສໍາພາດ ແລະ ເກັບກໍາຂໍ້ມູນຕາມສະຖານນີຕ່າງໆ ຢູ່ແຕ່ລະແຂວງ ເພື່ອນໍາມາຂຽນເປັນບົດປະພັນວັນນະຄະດີ: ກະວີ, ບົດບັນທຶກ ແລະ ບົດເລື່ອງສັ້ນ. ຜ່ານການເຄື່ອນໄຫວໂຄງການໃນຄັ້ງນີ້ ພວກເຮົາສາມາດເຮັດສໍາເລັດໜ້າທີ່ເກີນຄາດໝາຍ ໄດ້ບົດເລື່ອງ ບົດບັນທຶກ ເລື່ອງສັ້ນ ເລື່ອງຍາວ ແລະ ບົດກະວີ ທັງໝົດ 23 ບົດ ຊຶ່ງທັງໝົດນີ້ ທາງວິທະຍຸໂທລະພາບສູນກາງຈີນປະຈໍາລາວ ຜູ້ໃຫ້ການສະໜັບສະໜູນ ແລະ ຮ່ວມມືຂອງໂຄງການ ໄດ້ທໍາການຮິບໂຮມ ແລະ ຈັດພິມເປັນປຶ້ມ ເພື່ອໂຄສະນາເຜີຍແຜ່ຕໍ່ໄປ ແລະ ໄດ້ໃສ່ຊື່ປຶ້ມທີ່ເຕັມໄປດ້ວຍຄວາມໝາຍວ່າ: ເສັ້ນທາງປະສານໃຈ.
ນີ້ເປັນໂຄງການໃຫຍ່ໂຄງການທໍາອິດ ທີ່ພວກເຮົາໄດ້ຮ່ວມມືກັນ ຂ້າພະເຈົ້າຂໍສະແດງຄວາມຊົມເຊີຍ ແລະ ຂອບໃຈບັນດາທ່ານນັກປະພັນ ນັກກະວີທຸກທ່ານທີ່ໄດ້ສຸມປາຍປາກກາທີ່ດີເດັ່ນ ແລະ ແຫຼມຄົມຂອງທ່ານ ປະດິດຄິດແຕ່ງບົດເລື່ອງທີ່ດີ ແລະ ໜ້າສົນໃຈສຳລັບຜູ້ອ່ານໃຫ້ແກ່ໂຄງການໄດ້ຕາມລະດັບຄາດໝາຍທີ່ວາງໄວ້. ການເດີນທາງທີ່ຍາວໄກໃນຄັ້ງນີ້ ໄດ້ເຮັດໃຫ້ບັນດາທ່ານມີຄວາມສຸກ ມີຄວາມເພີດເພີນ ຄວາມເບີກບານມ່ວນຊື່ນ ແລະ ໄດ້ຮັບຮູ້ສິ່ງໃໝ່ໆ ຫຼາຍສິ່ງຫຼາຍແນວຈາກໂຄງການນີ້ ທີ່ສະແດງໃຫ້ເຫັນຈິດໃຈແຫ່ງມິດຕະພາບ ແລະ ການຮ່ວມມື ຂອງຄູ່ຮ່ວມຊາຕະກໍາ ລາວ-ຈີນ.
ປຶ້ມໂຮມບົດປະພັນວັນນະຄະດີເລື່ອງ: ເສັ້ນທາງປະສານໃຈທີ່ມອບໃຫ້ຫໍສະໝຸດແຫ່ງຊາດຄັ້ງນີ້ ມີຈໍານວນ 200ຫົວ ແມ່ນຜົນໄດ້ຮັບຈາກໂຄງການບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນ ຂອງນັກຂຽນລາວ.